Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Kampaña eksitoso ‘Biba kuné’ durante Dia di Rincon i Simadan na Playa

Kralendijk – Departamento di Salubridat Públiko ta mira tras ku satisfakshon riba un kampaña eksitoso di ‘Biba kuné’ durante Dia di Rincon i e Simadan na Playa. Empleadonan di e departamento a kana den e marcha tras di e grupo di ’TCB and Friends’ i repartí steker i sanitizer na públiko. Hendenan tabata kontentu ku stekernan ku e lema ‘Biba kuné’ i e hand sanitizernan den un bòter blou ku logo di Entidat Públiko Boneiru.

A krea e kampaña ‘Biba kuné’ pa hasi komunidat konsiente di biba ku e vírùs di corona i COVID-19 meimei di nos. Den e periodo promé ku Dia di Rincon, Salubridat Públiko a tene un drive thru kaminda representantenan di gruponan di muzik i baile por a buska tèst propio grátis pa usa riba e dia di fiesta.

Ta konosí pa e departamento ku Dia di Rincon algun partisipante na e dia akí tabatin un resultado di tèst positivo ora nan a hasi e tèst propio. E partisipantenan akí mes a skohe e ora ei pa no partisipá na e simadan. E departamento tin hopi apresio pa esaki.

Salubridat Públiko ke gradisí Angelo Domacassé di Tourist Corporation Bonaire pa e bon koperashon. I pa e echo ku el a mira importansia di e kampaña ‘Biba kuné’ i a koperá desinteresadamente.

Awor ku dianan di fiesta a pasa, empleadonan di Salubridat Públiko ta bishitá skolnan di enseñansa sekundario. Entre otro ta informá alumnonan di e importansia di tèst propio. Durante esei ta hasi uso tambe di un video tokante tèst propio i e video ku e djengel di ‘Biba kuné.’ A lansa e video ei aprel último.

Leave a Comment