Entidat Públiko Boneiru ta hasi tur loke ta na su alkanse pa prepará nos siudadanonan mas mihó posibel pa kalamidat i krísis. Pero Entidat Públiko Boneiru no por hasi esaki sin yudansa di nos siudadanonan. Pa e motibu akí ta importante pa nos siudadanonan asumí nan responsabilidat i prepará nan mes bon pa un posibel kalamidat i krísis. Riba e wèpsait aki bo ta lesa kiko bo mes por hasi promé, durante òf despues di un kalamidat òf krísis. Akí bo ta haña informashon importante i e último informenan durante un kalamidat òf krísis.

Kiko Entidat Públiko Boneiru ta hasi?

Gobièrnu tin un propio tim di kalamidat i gezaghèber ta presidente di esaki. Den e tim tin representante di entre otro polis, kuerpo di bombero, Fundashon Mariadal i Krus Kòrá. Tur aña e tim ta tene treinen di krísis i kalamidat pa tur grupo ku mester drenta den akshon na momentu di un krísis òf kalamidat.

Den kaso di menasa di un kalamidat e miembronan di e tim di kalamidat ta bini huntu. E miembronan di e tim ta deliberá tokante kua ta e konsehonan ku nan por duna. Nan ta deliberá tambe tokante kua ta e medidanan ku nan mester tuma rápidamente. Por ehèmpel bai warda boto un otro kaminda ora tin menasa di mal tempu, òf seramentu di skol si esei ta nesesario. Durante un krísis òf kalamidat e tim di kalamidat ku regularidat ta duna e último informenan via medionan sosial, radio i televishon.