Bon tardi tur hende,
Awe mi ta aserká boso den un esfera distinto, un esfera ménos preokupante kompará ku e último dos añanan ku a transkurí. Mi ta kontentu di por anunsiá ku e kantidat di hende ku a pega ku e vírùs a baha siendo ku ya kaba nos a kuminsá suavisá e medidanan.
Awe nos tin en total 21 kaso aktivo di hende ku a pega ku e vírùs i no tin ningun hende na hospital pa motibu di corona. Nos por konkluí ku e vírùs di corona no ta plamando mas na gran eskala riba nos isla aworaki.
Pa e motibunan akí entrante mañan 4 di mart 2022 ta kita tur medida di COVID-19 ku no tin di aber ku biahamentu. Ke men por ehèmpel no ta obligatorio mas pa tene 1,5 meter di distansia, i tampoko no ta obligatorio mas pa bisti tapaboka den áreanan públiko. Tene kuenta sí ku doño di tienda i pakus i otro establesimentu ta liber pa disidí ku nan ke pa bo bisti tapaboka den nan lugá.Ta permití atrobe tur aktividat deportivo o festivo paden i pafó manera nos tabata konosé promé ku COVID-19 a hasi su entrada.
E úniko reglanan ku ta keda na vigor ta algun regla básiko esta
-laba man regularmente
-tosa òf nister den èlebog,
-bai tèst si bo tin keho
-tene bo kas limpi i laga airu fresku pasa regularmente.
Riba www.bonairecrisis.com por wak tur loke ta kambia entrante mañan.
For di otro siman nos ta bai publiká e sifranan di COVID-19 un biaha pa siman.
Den e simannan benidero lo bai suavisá tambe kondishonnan pa biaha di eksterior pa Boneiru. Esaki ta sosodé en konsulta ku ministerio di Salubridat Públiko, Bienestar i Deporte na Den Haag. Nos lo informá boso mas pronto ku ta posibel di e kambionan.
Nos por konsiderá ku nos ta drentando un fase nobo, un fase di bai bèk na e normal bieu. Den e fase nobo akí ku nos ta drenta entrante mañan, mi ke pidi tur hende pa por fabor tene kuenta ku nos siudadanonan vulnerabel. Esta nos grandinan, adultonan i muchanan ku enfermedat serio ku por bira gravemente malu si nan pega ku e vírùs di corona.
Si bo ta bai bishitá un hende vulnerabel, por fabor hasi un tèst propio promé pa seguridat, ta konsehabel pa usa un tapaboka durante bishita.
Mi ke pidi tambe na nos siudadanonan vulnerabel pa nan bakuná i tuma e angua di buster ya ku esei ta protehá nan pa nan no bira seriamente malu si nan pega ku e vírùs. Den e simannan benidero nos ta bai informá tur hende na plaka chikí kiko kada un di nos por hasi pa nos ta seif i keda seif.
Mi ta spera ku nos ta sigui mantené e kantidat di kaso di COVID-19 abou. Lástimamente nos no sa nunka adelantá si un variante nobo lo surgi ni ki dia esei lo ta. Nos no tin esei den nos man. Loke sí nos tin den nos man ta ku nos por sigui kuida nos mes i sigui kuida otronan. Si akaso nos haña nos ku variante nobo di e vírùs, nos lo mester wak kon pa atendé ku esei i hasi uso di e eksperensia di e último añanan.
A tuma nos basta tempu i sakrifisio pa nos a yega na e punto ku por kita e medidanan manera mi a anunsiá. Tabata un periodo difísil i ku hopi reto. Mi ta orguyoso di nos logro i esaki ta danki na bosnan. Mi ta yama danki di kurason na nos komunidat ku nos a logra esaki. Danki na nos bon akshon i komportashon ku nos por ta den e fase akí awe. Un biaha mas danki di kurason pa tur komprenshon i sakrifisio.
Kerido pueblo, dos aña tras di otro mi a haña mi obligá ta anunsiá ku selebrashon di Dia di Rincon no por a sigui. Awe mi ta sumamente kontentu ku mi por anunsiá ku awor ku nos no tin medidanan di COVID-19 mas, e aña akí sí nos por selebrá Dia di Rincon manera nos a bin ta hasi esaki den pasado.
Laga nos selebrá i disfrutá ku nos por bai bèk na e bida ku nos tabata kustumá kuné. I laga nos sigui tene kuenta tambe ku personanan vulnerabel den nos komunidat.
