Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Q&A’s médiko

Último informashon: 19 di mèi 2022

Entidat Públiko Boneiru a formulá e informashon aki den koperashon ku departamento di Salubridat Públiko i otro instansianan.

Kontinuamente ta aktualisá e lista aki. E desaroyonan rònt di COVID-19 ta impredisibel,  situashonnan,  reglanan i kondishonnan por kambia kada momentu. Pa e último informenan nos ta referí bo na komunikadonan di prensa di Entidat Públiko Boneiru riba nan página di Facebook. Bo tin un pregunta ku ainda no ta den e lista? E ora ei manda un email ku bo pregunta na traveltobonaire@bonairegov.com

No por derivá ningun derecho for di e informashon riba e lista ku Q&A.

Tèst i maneho di tèst

Resultado di mi tèst propio ta positivo. Kiko awor?

Bai hasi tèst mas pronto posibel na Salubridat Públiko!

  1. Yama e number grátis 0800 – 0800 pa un sita pa tèst. E number ta alkansabel for di djaluna te ku djasabra di 08.00 – 17.00 or i riba djadumingu di 08.00 – 16.00 or.
  2. Bai den isolashon i pone e hendenan ku ta biba huntu ku bo den kas i bo kontaktonan estrecho na altura ku probablemente bo tin COVID-19. Nan tin ku bai den karentena.

Dikon?

  • Resultado di e tèst propio por ta positivo miéntras bo no ta kontagiá. Un tèst di PCR ta mas konfiabel ku un tèst propio. Si bo bai tèst di nobo na Salubridat Públiko, bo ta evitá ku bo ta den isolashon pòrnada. I ku e personanan ku ta biba huntu ku bo den kas i bo kontaktonan estrecho ta den karentena sin motibu.
  • Ku solamente un tèst propio positivo bo no ta haña un prueba di rekuperashon. Bo tin mester di un prueba di rekuperashon pa por biaha despues di un kontagio ku COVID-19.

Pa mas informashon tokante isolashon i karentena, wak riba: https://www.bonairecrisis.com/pap/informashon-di-covid-19/

Ki ora mi no por hasi un tèst propio?

Ora bo tin un salú vulnerabel òf ora bo ta gravemente malu;
Ora bo ta traha ku hende ku tin un salú vulnerabel òf ku ta gravemente malu;
Ora bo tin kontakto ku hende ku tin un salú vulnerabel òf ku ta gravemente malu;
Ora bo ta den karentena. Bo por sali di karentena solamente si bo hasi un tèst di PCR na Salubridat Públiko. Bo ta hasi e tèst di PCR riba e di 5 dia despues di e último kontakto ku e persona kontagiá;

E ora ei traha un sita pa tèst na Salubridat Públiko. Yama 0800 0800 pa un sita.

Kiko ta e diferensia entre un tèst propio i un tèst di PCR?

Un tèst di PCR ta mas konfiabel ku un tèst propio.
Bo ta hasi un tèst di PCR serka un eksperto. E eksperto sa eksaktamente na unda e tin ku saka sleim for di bo nanishi i garganta pa e tèst.
Den un laboratorio nan ta wak si e vírùs di COVID-19 ta den e sleim. Un tèst di PCR ta haña partíkula di e vírùs di COVID-19 mas rápidamente ku un tèst propio. Tambe ora un persona (kasi) no tin keho ainda.

Si e tèst propio ta positivo, bai den isolashon na kas. Yama 0800 0800 i traha un sita pa un tèst di PCR pa sa sigur si bo tin corona.

Kiko e hendenan ku ta biba huntu ku mi den mesun kas i mi kontaktonan estrecho tin ku hasi ora e resultado di mi tèst propio ta positivo?

Nan tin ku bai den karentena na kas:

  • si nan no a pasa e angua di buster òf
  • si durante e último 8 simannan nan no tabatin COVID-19.

Nan tin ku warda resultado di bo tèst di PCR na kas. Si resultado di bo tèst di PCR ta positivo, nan ta keda den karentena. Riba dia 5 nan tin ku hasi un tèst di PCR.

Nan no tin mester di bai den karentena:

  • si durante e último 8 simannan nan tabatin COVID-19 òf
  • si mas ku 7 dia pasá nan a pasa nan angua di buster òf
  • si ta mucha bou di 18 aña

Mi ta biba den mesun kas ku un hende kontagiá òf mi ta un kontakto estrecho di un hende kontagiá. Ki dia mi tin ku bai tèst?

Esei por riba e di sinku dia despues di e último kontakto ku e persona kontagiá.

E dia ku bo tabatin e último kontakto, ta dia 0. E ora ei konta 5 dia aserka.

Por ehèmpel : bo último kontakto ku e persona kontagiá tabata riba djárason. E ora ei bo tin ku tèst riba djaluna.

Traha un sita pa esaki via 0800 0800.

Kua number mi por yama ora ku mi tin keho relashoná ku COVID-19 i kiko ta pasa e ora ei?

Ora bo tin e siguiente kehonan:

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Pèrdida diripiente di holó i sabor

Bo tin ku tuma kontakto ku departamentu di Salú Públiko via number di telefon 0800 0800 (djaluna – djasabra for di 8.00 or te ku 20.00 or i djadumingu 8.00 or te ku 16.00 or). Sigui e instrukshonnan ku bo ta haña einan. Si nan por konfirmá bo kehonan, nan lo regla ku bo ta bai hasi tèst pa COVID-19. Ta importante pa bo isolá bo mes si bo tin keho respiratorio. Esaki ta enserá ku bo ta keda kas, no ta risibí bishita i ta limitá kontakto ku bo hendenan di kas te na un mínimo.   

Mi no ta haña konekshon ora mi yama e number di Salubridat Públiko 0800-0800 ku un number for di eksterior. Tin un otro number mas ku mi por yama?

Por ta ku numbernan for di eksterior no por haña kontakto ku 0800 – 0800. E ora ei durante ora di ofisina bo por yama +599 715 5399 òf puntra por ehèmpel na bo hotèl si nan por hasi e yamada pa bo.

Mi a bakuná i mi tin keho di corona. Mi tin ku bai tèst?

Ora bo ta kompletamente bakuná tambe bo por haña COVID-19 ainda.

P’esei bai tèst mas rápido posibel ora bo tin un òf mas di e kehonan akí:
• Fèrkout di nanishi
• Nanishi ta kore
• Nistermentu
• Doló di garganta
• Tosamentu
• Sinti benout
• Kayente di kurpa
• Kentura
• Di ripiente no por hole òf sinti smak mas
• Doló di kabes
• Sinti kansá

Keda kas i yama Salubridat Públiko via e number grátis 0800 – 0800. E number akí ta alkansabel for di djaluna te ku djasabra di 08.00 te 20.00 or i riba djadumingu di 08.00 te 16.00 or.

Kiko un hende mester hasi despues ku el a haña un sita pa laga hasi tèst?

Bo ta yama Call Center i traha un sita, mayoria biaha e siguiente mainta nan ta hasi e tèst serka bo. Riba dia di e sita bo ta bai ku outo na e sitio di tèst riba tereno di Departamentu di Salú Públiko enfrente di stadion na Kaya Gilberto F. Croes number 24. Sòru pa bo bisti un tapaboka i bini ku lensu di papel. Na e sitio di tèst nan ta splika bo kiko e tèst ta enserá. E hasimentu di tèst ta dura un par di minüt. Despues di hasi tèst bo ta bai kas mesora. Pues bo no ta bai supermarket mas, pero stret kas. Bo ta keda kas te ora nan yama bo tokante e resultado. Mayoria biaha ta dura tres dia promé ku nan yama bo.

Pregunta tokante riesgo di infekshon

Mi a bakuná. Mi por haña COVID-19 ainda?

Si. Aunke bo ta kompletamente bakuná, ainda bo por pega ku e vírùs di corona. Mayoria biaha e kehonan ku bo tin ta leve. E chèns ku bo ta resultá den hòspital ta 22 biaha mas chikitu kompará ku un persona ku no a bakuná. Bo tin un òf mas di e kehonan akí?

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Diripiente bo no por hole ni sinti smak mas
  • Doló di kabes
  • Kansansio

E ora ei bai hasi tèst mas rápido posibel. Keda kas i yama Salubridat Públiko via e number di telefòn grátis 0800 0800. E number akí ta alkansabel for di djaluna te ku djasabra di 08.00 te 20.00 or i riba djadumingu di 08.00 te 16.00 or.

Kon un hende sa ku el a kura depues ku el a pega ku e vírùs di corona?

Ta bisa ku un hende ku a pega ku e vírùs di corona ta bira bon ora ku : E hende ta sinti su mes bon i no tabatin keho di salu mas durante 24 ora. I si ta mas ku 5 dia pasa ku e kehonan a surgi. Ta solamente den konsulta ku un zùster òf bruder di departamento di Salubridat Públiko.

Ademas ta asina ku despues di e tempu ei tambe hende por tin keho temporal ainda manera kansansio.

Kiko nos por bisa tokante ser kontagioso durante e periodo di inkubashon?

E periodo di inkubashon ta e periodo entre e momento ku un persona keda kontagiá i e momento ku e persona bira malu. Ta transmití e vírùs di corona nobo pa medio di drùpel ku ta plama ora por ehèmpel bo tosa, nister, papia i kanta. For di momento ku un persona tin síntoma e persona aki ta kontagioso. Sinembargo investigashon a mustra ku esaki por ta te dos dia promé ku e tin síntoma tambe. Ta konosí ku mas malu ku un hende ta sinti su mes, mas tantu e por plama e vírùs.

Karentena i isolashon relashoná ku COVID-19

Kon largu isolashon ta dura?

Bo tabatin keho? E ora ei e promé dia ku bo ta malu ta konta komo dia 0. Konta 5 dia serka esei. Riba e di 5 dia bo ta sin keho kaba? E ora ei bo por sali. Riba e di 5 dia bo tin keho ainda? E ora ei bo tin ku warda te ora bo ta sin keho durante 24 ora. Despues di esei bo tin mag di sali.

Por ehèmpel: bo a haña keho di COVID-19 riba djaluna. Esei ta dia 0. Sinku dia despues ta djasabra. Riba e djasabra ei bo tabata 24 ora sin keho kaba? E ora ei bo tin mag di sali.

Bo no tabatin keho? E ora ei bo ta kuminsá konta for di e dia ku bo a bai tèst. Esei ta dia 0. Konta 5 dia aserka. Esei ta e dia ku bo tin mag di sali.

Por ehèmpel: bo a bai tèst riba djaluna. Esei ta dia 0. Sinku dia despues ta djasabra. Riba djasabra bo tin mag di sali atrobe.

Mi tabatin kontakto estrecho ku un persona ku a tèst positivo. Mi a bakuná, mi tin ku bai den karentena?

Sí. Si bo ta kompletamente bakuná i bo tabatin kontakto estrecho ku un persona kontagiá, bo tin ku bai den karentena!

Tin un chèns ku bo mes a pega ku e vírùs di corona. E ora ei bo por pasa e vírùs pa otro hende.

Karentena ta dura 10 dia. Riba e di 5 dia di karentena bo por hasi un tèst di PCR na Salubridat Públiko. Si bo tèst ta negativo, bo tin mag di sali for di karentena. No bai den serkania di hende ku un salú vulnerabel.

Eksepshon:

Bo no tin mester di bai den karentena si bo no tin keho i:

  • bo tabatin COVID-19 ménos ku 8 siman pasá òf
  • bo a pasa bo angua di buster mas ku 1 siman pasá òf
  • si bo ta bou di 18 aña

Si bo haña keho di corona tòg, bai tèst e ora ei na Salubridat Públiko.

Komportashon i prevenshon

Mester bisti tapaboka na Boneiru?

Nò, na Boneiru tapaboka no ta obligatorio.

Un di mi empleadonan tin keho. Kua ta e pasonan ku mi tin ku tuma komo dunadó di trabou?

Un empleado den bo organisashon òf empresa tin keho ku ta mustra riba COVID-19? Mand’é kas mesora! Pidi e empleado ku insistensia pa e bai hasi tèst di COVID-19 na Salubridat Públiko.
Duna bo empleado oportunidat pa e warda riba resultado di e tèst na kas. No laga e empleado bin trabou te ora ku su resultado di tèst ta konosí. I si por, laga e traha na kas e ora ei. Asina bo ta evitá ku e empleado ta pega otronan ku e vírùs.
Un empleado tabata den kontakto estrecho ku un hende ku a tèst positivo? Duna e tambe oportunidat pa traha na kas, te ora ku e tin mag di sali for di karentena. Tur hende ku tabatin kontakto estrecho ku un persona kontagiá, mester bai tèst riba e di sinku dia despues di e kontakto.
No ta posibel pa e empleado traha na kas? I Salubridat Públiko a konsehá ku e tin ku keda kas? E ora ei e dunadó di trabou tin derecho riba kompensashon di suèldo pa motibu di malesa. Manera semper un dunadó di trabou por mèldu e empleado malu den e portal di Asuntunan Sosial i Empleo (SZW), MijnCN.nl.

Kiko ta un ambiente di trabou saludabel i seif?

Ta hopi importante pa laga aire pasa bon den espasio kaminda hende ta bini huntu. Pa e motibu akí habri bentana i/òf porta un par di biaha pa dia durante minimalmente 15 minüt.

Pa empleadonan mester ta posibel pa nan laba man regularmente ku awa i habon i seka despues ku lensu di papel.

Diariamente mester limpia edifisionan bon ku atenshon èkstra pa e lugánan  kaminda hopi hende ta pone nan man, manera man di porta. No ta nesesario pa desinfektá e edifisio.

Tin hende na e sitio di trabou ku tin keho? Mand’é kas ku e súplika urgente pa bai tèst. Duna e kolega e posibilidat pa bai den isolashon òf karentena.

Salú

Kiko ta COVID ku keho pa basta tempu, e asina yamá long COVID?

Despues di un infekshon ku COVID tin algun hende ta keda pa basta tempu ku keho. Esei nan ta yama ‘Long COVID’. E kehonan akí por keda algun siman te un par di luna despues di e infekshon.

E kehonan
Hende ku tin COVID ku keho pa basta tempu (Long COVID) tin ora tin keho manera kansansio, difikultat pa hala rosea, doló na pechu, doló di múskulo, doló di kabes, batimentu di kurason, kayente di kurpa persistente, pèrdida pa basta tempu di e abilidat pa sinti holó. Nan por kai den depreshon tambe òf sufri di pèrdida di memoria.

E pèrdida di memoria nan ta yama ‘brain fog’ tambe, esta neblina di serebro. Sierto kehonan ta keda durante hopi tempu, pero despues di algun tempu nan ta bira ménos grave.

Hende ku tin mas chèns pa haña COVID ku keho ku ta dura largu
No ta konosí dikon tin algun hende ku ta keda ku keho durante basta tempu despues di a pega ku e vírùs di corona. Ta parse ku ‘Long COVID’ tin di haber ku un edat mas haltu i e kantidat di keho den e promé fase di infekshon. ‘Long COVID’ ta aparesé mas tantu biaha serka hende ku a bai hòspital pa motibu di COVID, hende ku ta sufri di asma òf hende ku tin sobrepeso kompará ku nan estatura.

Den práktika ta resultá ku hende ku no a bai hòspital tambe por keda ku keho durante hopi tempu. Ta parse ku ‘Long COVID’ ta aparesé mas tantu biaha serka hende muhé. Serka hende ku a bai hòspital pa un infekshon grave, durante hopi tempu despues ku nan a sali for di hòspital, nan pulmonnan no por funshoná 100 %.

1 di kada 5
Segun un promé kalkulashon maksimalmente 1 di kada 5 persona ainda tin keho durante 4 òf 5 siman despues di un tèst positivo. E kantidat akí ta baha mas òf ménos 12 siman òf mas despues di e infekshon. Ainda no tin un tratamentu optimal pa ‘Long COVID.’ Pa e motibu akí rònt mundu nan ta investigando esaki.

Mi ta na estado. Mi mester ta preokupá si mi haña Covid?

Nò. Serka hende muhé na estado, infekshon ku vírùs di corona ta meskos ku serka hende muhé ku no ta na estado. Hende muhé ku a pega ku e vírùs no tin un riesgo mas grandi pa pèrdè yu. Nan no tin un riesgo mas grandi tampoko pa haña un yu ku ta nase ku sierto defekto. Esei ta loke sientífikonan sa te ku awor.