.

Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Kompartí e página aki

Q&A’s médiko

Último informashon: 19 di òktober

Di Entidat Públiko Boneiru a formulá e informashon aki, den koperashon ku departamentu di Salú Públiko i otro interesadonan. Kontinuamente ta aktualisá e lista aki.

Nos ta publiká e bista general aki mas aktualisá posibel. E desaroyonan rònt di COVID-19 ta impredisibel i pa e motibu ei kondishonnan i sirkunstansianan por kambia kada momentu. Nos ta konsehá bo pa wak ki ora tin komunikado di prensa di Entidat Públiko Boneiru riba nos página di Facebook (Gobièrnu di Boneiru) i den medionan di komunikashon di Boneiru.

No por derivá ningun derecho for di e informashon den e bista general di preguntanan mas tantu hasí i nan kontesta (FAQ) aki.  

COVID-19 TÈST I MANEHO DI TÈST

kUA TA E MANEHO DI TÈST PA COVID-19 SI BO TA PERMANESÉ ÒF TA BIBA NA BONEIRU?

Serka tur persona ku e siguiente kehonan:

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Pèrdida diripiente di holó òf sabor

por mèldu nan mes i den mayoria kaso lo hasi un tèst di PCR pa COVID-19 ku nan. Tur hende ku tin keho respiratorio mester isolá nan mes te ora ku resultado di e tèst drenta. 

Na momentu ku bo tin e kehonan aki, bo ta tuma kontakto ku 0800-0800, òf ku un dòkter di kas na Boneiru.

KIKO E TÈST DI COVID-19 PROMÉ KU BIAHA PA BONEIRU MESTER KUMPLI KUNÉ?

Ta konsehá biaheronan fo’í Oropa ku ta drenta Boneiru i ku tin 13 aña òf mas pa laga hasi un PCR-tèst di COVID-19, 72 ora promé ku nan biaha. Esaki si nan no kier bai 14 dia den karentena.

E tèst aki mester kumpli minimalmente ku e siguiente kondishonnan:    

  • Solamente resultado di un tèst di PCR ta bálido. Pa e tèst aki ta hasi un sitologia (uitstrijkje) di nanishi i garganta ku un ‘q-tips’.
  • Un laboratorio akreditá mester hasi e tèst.
  • Resultado di e tèst no mag di ta mas bieu ku 72 ora na momentu di yegada na Boneiru.

Na unda mi por laga hasi un tèst di pcr pa covid-19 na hulanda?

Aktualmente vários partido ta ofresé un tèst di PCR pa hendenan ku ta bai biaha. Aki bou ta sigui algun ehèmpel:  

  • KLM health services
  • Het Huisartslab
  • Saltro laboratorium

Ta pèrmití tèst di otro laboratorionan akreditá tambe ku ta duna un resultado por eskrito òf digital.

MI TA OBLIGÁ PA LAGA HASI UN TÈST DI PCR ORA MI TA BIAHA PA BONEIRU?

Ta obligatorio pa un hende ku ta bai biaha fo’i Oropa pa e laga hasi un tèst di PCR 72 ora promé ku e biaha. Sin resultado negativo di PCR-tèst, e biahero ta obligá pa bai den karentena riba propio gastu na un sitio ku gobièrnu ta apuntá. Esaki relashoná ku e karakter di eskala chikitu di e isla i disponibilidat di fasilidat di kuido den region.  

Den e deklarashon di salú nan ta puntra bo si bo a laga hasi un tèst di PCR dentro di 72 ora promé ku salida, i kiko e resultado tabata.

Mi a lesa ku tèst komersial por tèst positivamente tambe si 3 luna pasá bo tabatin corona. esei ta kuadra?

Boneiru ta aseptá solamente resultado di tèst ku nan a ehekutá den un laboratorio akreditá. Ku esaki e chèns ku nan ta duna un resultado positivo inbálido ta mas chikitu posibel. Den e kaso ku tin un resultado positivo di e tèst di PCR, promé ku biaha pa Boneiru, e ora ei tuma kontakto ku bo dòkter òf e outoridat di salú den bo pais, i sigui nan instrukshonnan mas aleu.

KUA NUMBER MI POR YAMA ORA KU MI TIN KEHO RELASHONÁ KU COVID-19 I KIKO TA PASA E ORA EI?

Ora bo tin e siguiente kehonan:

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Pèrdida diripiente di holó i sabor

bo tin ku tuma kontakto ku departamentu di Salú Públiko via number di telefon 0800 – 0800. Sigui e instrukshonnan ku bo ta haña einan. Si nan por konfirmá bo kehonan, nan lo regla ku bo ta bai hasi tèst pa COVID-19. Ta importante pa bo isolá bo mes si bo tin keho respiratorio. Esaki ta enserá ku bo ta keda kas, no ta risibí bishita i ta limitá kontakto ku bo hendenan di kas te na un mínimo.   

Un hende ku ta ferkout òf ku tin keintura mester keda kas i laga nan tèst e. Si resultado di e tèst ta negativo, e persona ei tin mag di hasi tur kos atrobe tanten ku e kehonan no oumentá òf kambia. E ora ei e persona mester yama dòkter di kas òf yama 0800-0800 pa un tèst nobo.

Nò. Pasobra esei no ta duna siguridat. Awe resultado di e tèst por ta negativo, i e dia despues e por ta positivo tòg. Un tèst tin sentido si bo tin keho òf karakterístika di e malesa. E tèst por indiká e ora ei si ta e vírùs di corona ta okashoná e kehonan.

Tin mucha ku keho ku kisas tin di aber ku e vírùs di corona, pero no ta tèst nan. Dikon nò?

No ta asina ku departamento di Salubridat Públiko no ke tèst mucha. Si mester nos ta tèst sigur ku sí. Tèstmentu ta masha fèrfelu pa mucha chikitu. Ta p’esei nos ke tèst solamente si di bèrdè mester hasi esei. Nos ta wak huntu ku e mayornan i si mester ku dòkter di kas si mester tèst e mucha. Esei ta dependé di e tipo di keho. I si e mucha tabata den karentena kaba (i di e forma ei no ta un riesgo pa otro hende). Nos ta wak tambe si otro miembro di e famia tin keho, i si a tèst nan òf si por tèst nan. Tin biaha nos ta haña sa asina si e mucha tin COVID-19. Bo yu mester haña bon kuido, e no mester forma un riesgo pa otro hende. Esei ta loke ta mas importante pa nos.

Pakiko no ta bisa kuantu tèst a laga hasi pa dia?

No ta asina ku nos ta skonde e sifranan. A base di e sifranan ku nos ta publiká diariamente, bo por kalkulá e kantidat di tèst pa dia.

Unda hendenan ku ke biaha pa eksterior por laga tèst na mes pa e vírùs?

Na Boneiru no ta posibel pa laga hasi tèst si e persona no tin síntoma. Departamentu di Salú Públiko ta hasi e tèstnan. Na nos isla no tin empresa komersial ku por hasi tèst. No ta nesesario tampoko pa laga hasi tèst pa por biaha for di Boneiru pa eksterior.

Kiko un hende mester hasi despues ku el a haña un sita pa laga hasi tèst?

Bo ta yama Call Center i traha un sita, mayoria biaha e siguiente mainta nan ta hasi e tèst serka bo. Riba dia di e sita bo ta bai ku outo na e sitio di tèst riba tereno di Departamentu di Salú Públiko enfrente di stadion na Kaya Gilberto F. Croes number 24. Sòru pa bo bisti un tapaboka i bini ku lensu di papel. Na e sitio di tèst nan ta splika bo kiko e tèst ta enserá. E hasimentu di tèst ta dura un par di minüt. Despues di hasi tèst bo ta bai kas mesora. Pues bo no ta bai supermarket mas, pero stret kas. Bo ta keda kas te ora nan yama bo tokante e resultado. Mayoria biaha ta dura tres dia promé ku nan yama bo.

Ta tèst hende ku ta na final di nan periodo di karentena?

Nò, no ta tèst e hendenan aki. Ora ku un hende despues di 14 dia den karentena no a haña síntoma, bo por sali for di e punto di bista ku e persona aki no ta kontagiá.

PREGUNTA TOKANTE RIESGO DI INFEKSHON KU COVID-19

KON GRANDI E RIESGO TA KU UN HENDE TA BINI BONEIRU KU INFEKSHON, KU E MEDIDANAN KU A TUMA?

A base di e situashon epidemiológiko di un pais òf estado for di kua biaheronan ta bini, por hasi un kalkulashon di e riesgo di introdukshon di COVID-19 den e pais di destinashon. For di paisnan kaminda e prevalensia (prevenshon di e vírùs) ta haltu, e chèns pa haña un turista ku COVID-19 naturalmente ta mas haltu ku for di un pais kaminda e prevalensia ta abou.

Pa laga e chèns ku un hende ku ta infektá ku COVID-19 ta mas abou posibel, ta tuma e siguiente pasonan:     

  • ta apuntá un kantidat limitá di pais ku un prevalensia abou pa COVID-19, for di kua bo por biaha pa Boneiru,
  • kada biahero ta obligá pa yena un deklarashon di salú via www.bonairepublichealth.org,

biaheronan fo’i Oropa di 13 aña òf mas por laga hasi un tèst di PCR di COVID-19, maksimalmente 72 ora promé ku biaha pa asina no bai den karentena ora yega Bonaire. 

E medidanan aki ta sòru ku e riesgo ku un hende infektá ta bini Boneiru, ta aseptabel den relashon ku kapasidat di kuido na Boneiru.

MI TABATIN KONTAKTO KU UN HENDE KU A TÈST POSITIVAMENTE. KIKO MI TIN KU HASI?

Si pa mas ku 15 minüt bo tabata dentro di 1.5 meter for di e persona aki, ta bon pa bo keda kas i yama 0 800 – 0 800 pa konseho. 

Si bo tabata ménos ku 15 minüt dentro di 1.5 meter for di e persona aki, e ora ei yama 0 800 – 0 800 pa konseho.

Tin grupo ku ta kore riesgo pa pega ku e vírùs di corona. Mucha tambe ta kore riesgo ku nan ta pega ku e vírùs?

No sa sosodé hopi biaha ku mucha i hóben ta pega ku e vírùs di corona. I sin nan pega mes nan no ta bira masha malu. P’esei nan no ta un forma un grupo di riesgo. Ta sosodé masha poko biaha ku un hóben ta pega un adulto.

Tin pashènt ku tin e vírùs di corona na hospital. Ta seif pa mi bai hospital?

Ta seif pa bai hospital. Pashènt ku tin COVID-19, ta drumi den kamber di isolashon spesial. Otro pashènt no ta kore riesgo ku nan ta pega ku e vírùs. Personal di hospital ta bon di trein i nan ta kustumá di traha ku pashènt ku malesa di infekshon.

Kon un hende sa ku el a kura depues ku el a pega ku e vírùs di corona?

Ta bisa ku un hende ku a pega ku e vírùs di corona ta bira bon ora ku : E hende ta sinti su mes bon i no tabatin keho di salu mas durante 24 ora. I si ta mas ku 7 dia pasa ku e kehonan a surgi. Ta solamente den konsulta ku un zùster òf bruder di departamento di Salubridat Públiko.

Biahero ku ke bini Boneiru di Hulanda por ehèmpel mester hasi pa mas tardá 72 ora promé un tèst di PCR. Kon grandi e chèns ta ku den e tres dianan promé ku buelo un hende ta pega tòg ku e vírùs?

Ta posibel ku un hende ta pega tòg ku e vírùs ainda den e tres dianan ei. Pero ku e tèst di PCR por deskubrí mayoria kaso di kontagio. Mayoria biahero ta preferá pa nan no bira malu durante nan vakashon. P’esei nan lo tene nan mes bon na e reglanan promé ku nan biaha. Na Boneiru tambe nan mester tene nan mes na regla. Pasobra nan por pega ku e vírùs tambe na Boneiru si nan no paga tinu i no tene nan mes na regla.

Tin algun hende ku no tin keho pero ta tèst positivo tòg. Ta yama nan ‘pashènt asimtomátiko.’ Kon grandi e chèns ta ku e hendenan akí por pega otro hende na Boneiru?

Hende ku no tin keho i tòg ta haña resultado di tèst ku ta bisa ku nan tin e vírùs, por haña keho despues. Ta p’esei nan ta bai por si akaso tres dia den isolashon. Si despues di e tres dianan akí na haña keho tòg, nan ta keda mas largu den isolashon. Si despues di isolashon di tres dia nan no haña keho, e chèns ku nan tin e vírùs ta masha chikitu.

Si bo a keda kontagiá ku e vírùs di corona, kuantu tempu ta dura promé ku bo haña keho?

Despues ku bo keda kontagiá ku e vírùs di corona ta dura entre 2 i 14 dia promé ku bo haña keho.

Kiko nos por bisa tokante ser kontagioso durante e periodo di inkubashon?

E periodo di inkubashon ta e periodo entre e momento ku un persona keda kontagiá i e momento ku e persona bira malu. E vírùs di corona nobo ta keda transmití pa medio di tosamentu i nistermentu. For di momento ku un persona tin síntoma e persona aki ta kontagioso. Sinembargo investigashon a mustra ku esaki por ta te dos dia promé ku e tin síntoma tambe. Ta konosí ku mas malu ku un hende ta sinti su mes, mas tantu e por plama e vírùs.

Dikon ta enkurashá pueblo pa keda kas, mientras ku mayoria kontagio ta tuma lugá na kas?

Mayoria kontagio ta tuma lugá na trabou òf durante enkuentronan privá manera fiesta. T’asina tambe ku hopi kontagio ta tuma lugá na kas. Lamentablemente no por evitá esaki, pasobra hende ta biba ku otro den kas i tin kontakto estrecho ku otro. Si durante dia no tin hende na kas, na final di dia nan ta bini kas bèk. Manera nos a bisa, mayoria kontagio ta tuma lugá na trabou òf durante enkuentronan privá. Pa e motibu aki ta pidi pueblo pa mas tantu posibel traha na kas. Si hendenan ke bini serka otro, no ta pèrmití pa tin mas ku 10 hende presente. Tambe semper hendenan tin ku tene un distansia di 1,5 meter for di otro. Asina bo ta prevení ku hendenan ta bai kas ku e vírùs di corona i por kontagiá otronan na kas.

Dikon hende grandinan den un kas di kuido no por haña bishita, ta nan ta netamente un grupo vulnerabel òf nò?

Ta bèrdat ku hende grandinan ta forma un grupo vulnerabel. I ku mas tantu posibel nos tin ku protehá nos hende grandinan. Tur hende tin ku tene un distansia di 1,5 meter for di otro, apliká bon higiena i keda kas ora tin keho. Pa nos hende grandinan e reglanan aki ta èkstra importante. Kasnan di kuido pa hende grandinan tambe ta tuma medida èkstra pa ofresé siguridat èkstra. Si hendenan grandi no tin mag di haña bishita, esei no ta bon pa nan kalidat di bida. Esaki ta e motibu pakiko Departamentu di Salú Públiko no ta prohibí pa bishitá nos hende grandinan. Naturalmente nos hende grandinan mes por disidí si temporalmente nan no ke risibí bishita. Òf hendenan por disidí ku temporalmente nan no ta bai bishitá nan hende grandinan. E kasnan di kuido pa hende grandinan mes tambe por tuma medida, manera limitá hasimentu di bishita serka nan habitantenan. E ora ei ta partisipá esei na e habitantenan i bishitantenan.

Dikon pashèntnan den hòspital di Fundashon Mariadal no mag haña bishita i habitantenan di Kas di Kuido si (bishita limitá)?

Hende grandinan di Kas di Kuido ta biba einan. Bishita di famia ta importante pa hende grandinan ku por sinti nan mes so. Mayoria biaha pashèntnan no ta keda hopi dia den hòspital. Hòspital ke prevení mas tantu posibel ku ta pasa e vírùs pa pashèntnan. Pa e motibu aki nan a disidí ku pashèntnan no por haña bishita.

KARENTENA I ISOLASHON RELASHONÁ KU covid-19

KI ORA BO TIN KU BAI DEN KARENTENA SENTRAL I KI ORA BO POR BAI DEN KARENTENA NA KAS?

Biaheronan ku ta bini for di paisnan ku un riesgo abou pa COVID-19, no tin keho i no tin otro partikularidat mas aleu, no tin mester di bai den karentena ora nan yega Boneiru.

E siguiente personanan mester bai den karentena:

  • Biaheronan ku maksimalmente 14 dia promé ku nan biaha pa Boneiru a permanesé na un pais di riesgo haltu, mester bai direktamente den karentena ora nan yega Boneiru na un sitio sentral di karentena i e gastunan ta pa e biahero. Biaheronan ku ta biaha for di Aruba, Kòrsou, Sint Eustatius òf Sint Maarten pa Boneiru por bai te 14 dia despues di nan yegada na Boneiru den karentena na kas, si e sirkunstansianan ta pèrmití esei. Si esei no ta posibel, nan tambe mester bai den karentena na un sitio di karentena sentral.
  • Tambe bo tin ku bai den karentena si un persona ku ta biba den mes kas ku bo of un hende ku bo tabata den kontakto personal direkto kuné, a tèst positivo pa COVID-19. E karentena aki ta tuma lugá den bo propio kas (di vakansi), kamber di hotèl òf na un sitio di karentena indiká, dependiente di e motibu di e karentena i e sirkunstansianan na bo propio adrès (di vakansi). Departamentu di Salú Públiko lo informá bo tokante e sitio kaminda bo tin ku bai den karentena, i e reglanan ku bo mester tene bo mes na nan. 

Den koperashon ku doñonan di hotèl na Boneiru a indiká un hotèl ku ta sirbi komo karentena sentral.

Ta importante pa hendenan ku ta biaha pa Boneiru sa ku e gastunan di karentena ta pa nan propio kuenta.

KI ORA BO TIN KU BAI DEN ISOLASHON I BO POR BAI DEN ISOLASHON NA KAS ÒF NA BO Adrès DI VAKASHON?

Si bo tin keho ku ta kuadra ku COVID-19, ta pidi bo pa keda paden, limitá kontakto ku hendenan di kas te na un mínimo i no risibí bishita. Esaki nos ta yama isolashon. Tuma kontakto ku departamentu di Salú Públiko di Boneiru na 0800 – 0800 relashoná ku hasimentu di un tèst di PCR.

Isolashon ta tuma lugá den e kas di vakashon, kamber di hotèl, den propio kas òf na un sitio di isolashon indiká si e situashon na e adrès di vakashon no ta adekuá pa isolashon.  Den koperashon ku doñonan di hotèl na Boneiru a indiká un hotèl ku ta sirbi komo sitio di isolashon sentral. 

E gastunan di esaki ta pa kuenta di e persona ku nan a pone den isolashon, si bo no ta habitante di Boneiru. ZVK ta kubri e gastunan aki pa habitantenan di Boneiru ku ta sigurá via ZVK.

KEN TA PAGA E GASTUNAN SI MI TA KONTAGIÁ KU COVID-19 ÒF MESTER BAI DEN KARENTENA?

Si nan imponé un medida di karentena riba bo, bo mes ta responsabel pa e gastunan ku ta embolbí ku esei.

Si nan pone bo den isolashon, e ora ei esei ta gastu di malesa: si bo seguro di gastu di malesa ta kubri esei ta dependé di e kondishonnan di bo kompania di seguro di malesa. Pa habitantenan di Boneiru ku ta sigurá via ZVK, ZVK ta kubri e gastunan di isolashon. Pa otronan ta akonsehabel pa kontrolá bon serka bo kompania di seguro kua ta e gastunan ku nan ta kubri.

Kon ta para ku karentena si un miembro di famia pega ku e vírùs di corona? E persona ei ta bai den isolashon i sobrá di famia ta bai den karentena? Òf henter e famia ta bai den karentena den e mesun kas?

Si un miembro di famia tèst positivo, e persona akí mester bai den isolashon. E otro miembronan di e famia mester bai den karentena na kas. Departamento di Salubridat Públiko ta laga sa esaki na e famia. E departamento ta yuda e famia tambe.

Un biahero di Hulanda ku no por prueba ku resultado di tèst di PCR ku e no tin corona, mester bai den karentena na kas. Por kontrolá e biahero ei bon na su adrès di vakashon?

Un biahero di Hulanda ku no a laga nan tèst e promé ku su biahe, mester bai den karentena sentral ora e yega Boneiru. Ta mas simpel kontrolá si e biahero ei ta tene su mes na e reglanan ora e ta den karentena sentral.

Kiko ta pasa ku un biahero ku durante karentena ta pega tòg ku e vírùs di corona?

E biahero ei ta haña e mesun kuido médiko ku tur hende. Sektor di kuido no ta hasi distinshon entre hende. Tanten ku e biahero tin keho e no a bira bon, e ta keda den isolashon. E no tin mag di biaha bai kas bèk.

Tin un hende den karentena i el a haña resultado negativo di tèst. E hende akí tin mag di bai afó atrobe òf e mester tene su mes na e periodo di 14 dia?

Un hende den karentena mester keda den karentena 14 dia despues ku e tabatin kontakto ku un hende ku a pega ku e vírùs. Si resultado di su tèst ta negativo e mester keda den karentena tambe. Si e subi kaya tòg, e ta trese otro hende den peliger. Salubridat Públiko ta atvertí un hende asina hende enfátikamente i ta splik’é ku e mester keda den karentena. Si un hende ku no ta den karentena haña resultado di tèst negativo e persona akí tin mag di subi kaya despues ku e haña e resultado.

Kiko ta e diferensia entre karentena i isolashon?

Hende salú ta bai den karentena i hende ku a tèst positivo ta bai den isolashon. Hende salú ta bai den karentena durante 14 dia despues ku nan tabata den kontakto ku un hende ku ta kontagiá ku e vírùs. Un hende ku ta kontagiá ku e vírùs ta bai den isolashon. E persona aki ta keda den isolashon te ora ku e no tin keho mas. E por sali for di isolashon si e tabata minimalmente 7 dia den isolashon i pa 24 ora kaba no tin keho mas.

Kon karentena ta reglá si un persona den un famia a keda kontagiá? E persona ei mester bai den isolashon na un otro kaminda i sobrá di e famia ta keda kas den karentena?

Pa kada situashon Departamentu di Salú Públiko ta wak kiko ta nesesario. Pa un persona kontagiá ta mas plasentero pa bai den isolashon na kas. Tin ora no ta seif pa bai den isolashon na kas. E ora ei ta parti e famia i un persona òf mas hende di e famia ta bai den karentena sentral.

Komportashon i prevenshon

KI ORA MI TIN KU BISTI UN TAPABOKA (mondkapje)?

Na Boneiru bo tin ku bisti un tapaboka (mondkapje) ora no ta posibel pa mantené un distansia di 1,5 meter for di otronan, ku no ta forma parti direkto di bo hendenan di kas. Banda di esei semper bo tin ku bisti un tapaboka (mondkapje) ora ku bo yega Boneiru òf ora bo ta sali for di Boneiru na Flamingo Bonaire International Airport i durante bo transporte pa bo adrès di vakashon.

KUA TA E REGLANAN DI KOMPORTASHON KU TUR HENDE NA BONEIRU MESTER KUMPLI KUNÉ?

Tur hende na Boneiru, habitantenan i bishitantenan, mester kumpli ku e siguiente reglanan di komportashon i higiena:

  • Mantené 1,5 meter di distansia for di personanan ku no ta forma parti di bo hendenan di kas.
  • Regularmente laba bo mannan ku awa i habon: usa produkto pa desinfektá man solamente ora no tin awa i habon disponibel.
  • No pone bo mannan na bo kara.
  • No duna otro hende man.
  • Tosa òf nister den bo èlebog.
  • Usa lensu di papel, tira esaki afó despues di uso.
  • Keda kas (no bai traha, no bai skol, no bai kaya pa por ehèmpel hasi kompra) ora bo tin ku kontestá positivamente riba un di e siguiente preguntanan:
    • Durante e último 24 ora òf na e momentu aki bo tin un òf mas di e siguiente kehonan: fèrkout di nanishi, nanishi ku ta kore, nistermentu, doló di garganta, tosamentu leve, sinti benout, kayente di kurpa, kentura i/òf pèrdida diripiente di holó òf sabor?
    • Bo tabatin e vírùs di corona nobo (determiná ku un tèst di laboratorio) i a determiná esaki den e último 7 dianan?
    • Tin hende di kas ku e vírùs di corona nobo (determiná ku un tèst di laboratorio) i den ménos ku 14 dia bo tabatin kontakto ku e hende di kas aki, miéntras ku ainda e tabatin keho?
    • Bo ta den karentena na kas, pasobra bo tabatin kontakto direkto ku un persona serka kende nan a determiná e vírùs di corona nobo?
    • Si durante e último 14 dia bo a biaha pa paisnan ku no ta Kòrsou-Saba-St. Eustatius, Hulanda, Alemania, Fransia, Bélgika i Suisa.

Ki ora mi tin ku keda kas pa motibu di e vírùs di corona?

Pa evitá ku e vírùs ta plama mas ainda tur hende mester keda kas mas tantu posibel. Hende ku sigur mester keda kas ta : Pashènt ku tin COVID-19. Hende bibá den kas ku pashènt ku tin COVID-19, hende ku tabatin kontakto estrecho ku un pashènt ku tin COVID-19 i ku ta den karentena. Hende ku tabata den un área kaminda e virus ta reina òf hende ku tin e karakterístikanan di COVD-19 i ku a mèldu pa nan hasi un tèst. Bo por lesa tokante esaki na:

https://www.bonairecrisis.com/pap/keho-hasi-e-chek-di-corona/

Ta permití pa hende balia na establesimentunan di hòreka i bandanan musikal por toka atrobe?

Nò, den hòreka tin lugá di sinta fiho. E intenshon ta pa ménos hende posibel kana bai bini. Gruponan musikal no por duna konsierto na e momentunan aki, eventonan bailabel ta prohibí. Bandanan musikal por toka ‘background music’ sí.

Kua ta e uso korekto di tapaboka?

Pa uso korekto di tapaboka a skirbi un instrukshon, wak https://www.bonairecrisis.com/pap/2020/10/01/konseho-pa-tapa-boka/. Pero paga tinu: tene 1,5 meter di distansia ta loke ta mas importante pa prevení ku e vírùs ta plama. Si tene distansia no ta posibel, manera den un bùs, den outo, den sala di embarke etc, e ora ei bo ta bisti tapaboka.

Kua ta e reglanan di COVID di Departamentu di Salú Públiko pa empresanan i otro organisashonnan?

Esakinan ta e reglanan di COVID di Departamentu di Salú Públiko pa empresanan i organisashonnan: Tur hende mester tene nan mes na e regla di 1,5 meter di distansia for di otro. Den empresanan i organisashonnan tur hende mester laba man regularmente ku awa i habon. Hendenan mester tosa òf nister den nan èlebog. Ora ku tin keho hendenan mester bai kas i keda na kas. E ora ei nan mester yama Call Center di Departamentu di Salú Públiko 0800 – 0800 (for di 8.00 or te ku 22.00 or) pa traha un sita pa laga hasi tèst. Empresanan i organisashonnan mester sòru pa empleadonan i bishitantenan por tene 1,5 meter di distansia serka nan i ku nan por laba nan man regularmente. Ta importante tambe pa hasi limpiesa bon: diariamente mester hasi limpiesa den edifisionan ku atenshon èkstra pa puntonan kaminda hopi hende ta mishi, manera man di porta. No ta nesesario pa desinfektá e edifisio. Ta importante ku bo ta ventilá bo espasionan di trabou hopi bon i di e manera ei sòru pa aire fresku. P’esei no tene tur bentana será, pero ventilá e espasio bon, ora bo ta usa èrko tambe. Tin èrko ku solamente ta fria aire, nan no ta kambia i refreská aire. Den e kaso ei mihó bo paga e èrko dos biaha pa dia un ratu i durante minimalmente 15 minüt laga aire fresku drenta. Naturalmente esakinan ta reglanan en general, atendementu na midí ta keda importante, por ehèmpel den sektor di kuido.

Salú

Kuantu tempu un hende ku ta ferkout òf tin keintura mester kas

Un hende ku ta ferkout òf ku tin keintura mester keda kas i laga nan tèst e. Si resultado di e tèst ta negativo, e persona ei tin mag di hasi tur kos atrobe tanten ku e kehonan no oumentá òf kambia. E ora ei e persona mester yama dòkter di kas òf yama 0800-0800 pa un tèst nobo.

Mi ta na estado. Mi mester ta preokupá?

Nò. Serka hende muhé na estado, infekshon ku vírùs di corona ta meskos ku serka hende muhé ku no ta na estado. Hende muhé ku a pega ku e vírùs no tin un riesgo mas grandi pa pèrdè yu. Nan no tin un riesgo mas grandi tampoko pa haña un yu ku ta nase ku sierto defekto. Esei ta loke sientífikonan sa te ku awor.

Kiko ta konsehá hende ku tin otro problema di salú (astma, COPD chronic obstructive pulmonary disease, diabetes etsetera)?

Pa e hendenan aki ta èkstra importante pa nan tene nan mes na e reglanan pa evitá corona. Mantené distansia. Laba bo man regularmente. Keda leu di hende ku ta malu of hende ku tin problema na via respiratorio. Pa mas informashon :
https://www.bonairecrisis.com/pap/keho-hasi-e-chek-di-corona/
Bai buska bo angua kontra grip na òktober /novèmber

Si bo resistensia ta abou, kon bo por drecha bo resistensia pa redusí e chèns ku bo ta pega ku e vírùs?

Ta importante pa bo ta den bon kondishon. Pero no tin remedi pa mehora bo resistensia. Biba salu. Kome salu. Drumi i move sufisiente.

Tin un tratamentu kontra e vírùs di corona (COVID-19)?

Tratamentu hende ku ta basta malu ta dependé di e kehonan ku nan tin i di e forma ku e malesa ta desaroyá. Pashènt ku ta masha ansha di rosea por haña oksigeno. Awor tin basta remedi tambe ku ta on a pashent ku mester bira bon.

Hospital na Boneiru ta dediká hopi tempu i atenshon na kaso di corona. Kiko ta pasa si pa motibu di esei hospital no por tuma mas pashènt?

Hospital tin tur atenshon i tempu pa tur pashènt, ku si nan tin corona òf nò. Kuido médiko sigur no ta na peliger awor. Hospital ta kapas di tuma un kantidat grandi di pashènt ku keho ku tin di aber ku corona, mientras ta sigui duna kuido na otro pashènt. Tin palabrashon ku e islanan den besindario pa den e kaso ku nos hospital no por tuma mas pashènt, komo ku tin hopi pashènt di corona ei. Nos lo mester tuma medida tambe den komunidat pa redusí e kantidat di hende ku ta pega ku e vírùs i asina redusí e kantidat di malesa di COVID-19.

Kon mi por ventilá mi espasio di trabou mas mihó posibel? Mi tin miedu ku èrko por plama e vírùs.

Ta importante ku bo ta ventilá bo espasionan di trabou hopi bon i di e manera ei sòru pa aire fresku. P’esei no tene tur bentana será, pero ventilá e espasio bon, ora bo ta usa èrko tambe. Tin èrko ku solamente ta fria aire, nan no ta kambia i refreská e aire. Den e kaso ei mihó bo paga e èrko dos biaha pa dia un ratu i durante minimalmente 15 minüt laga aire fresku drenta.

Dikon awor aki si tapaboka ta obligatorio den sierto situashonnan, mientras ku hopi biaha a pretendé ku tapaboka no ta nesesario?

Tenementu di distansia di 1,5 meter for di otro ta ofresé un mihó protekshon kontra e vírùs ku uso di tapaboka. P’esei a bisa ku uso di tapaboka no ta nesesario. Den práktika a resultá ku hendenan ku tin un tapaboka bistí ta paga ménos tinu pa tene distansia. I esei ta nèt loke nos no ke. Pero tin algun situashon kaminda ta imposibel pa tene 1,5 meter di distansia. Manera den transporte públiko, den bùs, na trabou kaminda hendenan tin un profeshon di kontakto (por ehèmpel fisioterapista, barbero i pelukera). Den e tipo di situashonnan asina ta obligatorio pa bisti tapaboka. Ta importante tambe pa kumpli estriktamente ku reglanan di higiena den e situashonnan ei. Asina ta evitá ku hendenan por kontagiá otro den e situashonnan ei.