Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Q&A’s bakunashon

Último informashon: 21 di òktober 2021

Entidat Públiko Boneiru a formulá e informashon aki den koperashon ku departamento di Salubridat Públiko i otro instansianan.

Kontinuamente ta aktualisá e lista aki. E desaroyonan rònt di COVID-19 ta impredisibel,  situashonnan,  reglanan i kondishonnan por kambia kada momentu. Pa e último informenan nos ta referí bo na komunikadonan di prensa di Entidat Públiko Boneiru riba nan página di Facebook. Bo tin un pregunta ku ainda no ta den e lista? E ora ei manda un email ku bo pregunta na publichealth@bonairegov.com

No por derivá ningun derecho for di e informashon riba e lista ku Q&A.

Kon ta bai hasié

Ken ta bini na remarke pa e di tres angua kontra corona?

E di tres angua kontra corona ta pa hende ku resistensia hopi abou, nan tin un malesa inmune serio. E hendenan akí mester di un di tres angua kontra corona pasobra e promé dos anguanan no ta duna sufisiente protekshon kontra e vírùs di corona.

Ta trata di hende ku ta bou di tratamentu di un spesialista pa un malesa spesial. Òf hende ku tin ku bebe sierto remedi.

Via nan spesialista e pashèntnan akí ta haña un karta pa bai pasa e di tres angua.

Pa hóben i hende grandi ku no ta bou di tratamentu di un spesialista, e dos anguanan ta duna sufisiente protekshon. E dos angunan ta sòru pa hende den e grupo akí no bira gravemente malu i resultá den hòspital. Instituto di Reino pa Salubridat Públiko i Medio Ambiente (RIVM) ta vigilá bon si e anguanan ta duna sufisiente protekshon. Si ta nesesario pa tur hende haña un di tres angua, ta anunsiá esaki na tempu. Pero no ta asina leu ainda.

Na unda mi por registrá pa laga bakuná mi mes? I kon esei ta bai e ora ei?

Tur habitante di 12 aña bai ariba por registrá pa pasa angua contra corona.
Esaki por online durante 24 ora pa dia. Tambe bo por yama e grátis number 0800 – 0900 di e callcenter #Banbakuná pa un sita.

Mayornan di hóbennan den edat di 12 te ku 17 aña por traha un sita solamente via e number di telefòn. Lesa e informashon pa e grupo aki den e Q&A apart ku tambe ta riba e página akí.

Tin posibilidat tambe pa pasa angua sin sita. Pa dia i ora pa pasa angua, wak e Q&A apart riba e página akí i e mensahenan riba Facebook di Gobièrnu di Boneiru.

* Registrá online ta bai di e siguiente manera:
riba e wèpsait www.bonairecrisis.com/pap/ ta bini un boton ku e teksto ‘registrá pa bakuná kontra COVID’. Klek riba e boton, e ora ei bo ta haña un formulario di registrashon ku un chekeo di salú.
* E persona ku registrá su mes tin ku duna un number di telefòn òf un email.
* No ta posibel pa registrá mas ku un hende via un e-mailadres.
* Ora ku e formulario ta yená e registrashon ta kla. Nos empleadonan ta prosesá e registrashon.
* Si tin problema ku e registrashon online, por mèldu esaki na vaccinatie.info@bonairegov.com

* Pa mas tardá sinku dia despues di su registrashon, via email e persona ta risibí e fecha pa su promé i su di dos angua.
* Entre e promé i e di dos angua tin sinku siman.
* Ta posibel pa pasa angua di djaluna te ku djasabra.
* Bo no por skohe riba kua dia bo ta preferá pasa angua.

* Bo por yama grátis number 0800 – 0900 di e callcenter #Banbakuná pa un sita. Ta hasi e chekeo di salú via telefòn. Un empleado ta bisa bo ki dia bo ta haña e promé i e di dos angua. Ta konfirmá e sitanan via telefòn òf email. Si bo no tin email e ora ei bo por duna adrès di mail di un miembro di famia òf un konosí.

* E number ta disponibel di djaluna te ku djabièrnè entre 8’or di mainta i 5’or di anochi. Riba djasabra i djadumingu e number ta disponibel entre 8’or di mainta i 12’or di atardi.

* Pues bo por yama òf registrá bo mes online. Nos ta preferá pa, si ta posibel, bo registrá bo mes online.

Relashoná ku e chekeo di salú;
* Por sosodé ku na momento di registrashon bo ta tende ku bo tin ku traha un sita ku bo dòkter di kas, promé ku bo haña un sita pa pasa angua. Despues di konsultá ku bo dòkter di kas, bo por traha un sita via e callcenter. Por ta tambe ku e chekeo di salú ta indiká, ku na e sitio di pasa angua bo tin ku bai e dòkter ku tin einan promé. Nos ta pidi bo koperashon, esaki ta pa bo mes salú.
* Por haña e deklarashon di salú pa bakunashon kontra COVID-19 akinan: https://www.bonairecrisis.com/wp-content/uploads/2021/03/Formulier-Gezondheidsverklaring_Papiamentu.pdf

Riba e wèpsait tin pará kiko bo mester bini kuné ora di bo sita pa pasa angua. Bo mester bini ku un prueba di identidat bálido. Uso di un tapaboka ta obligatorio.
* Lesa e informashon riba e wèpsait bon, promé ku bo bini e lokalidat di pasa angua.

* Ta importante ku tur hende ku tin un sita, bini na e ora palabrá i tambe na e lokalidat di pasa angua. E bakunanan ta skars i karo. Si bo no bini, e ora ei podisé Asalubridat Públiko por saka ménos bakuna for di un bòter. I esei lo ta hopi lástima. Si di bèrdat bo no por bini, yama e ora ei mas lihé posibel pa mèldu esaki.

Kua number di telefon mi por yama pa un sita pa pasa angua kontra corona?

Por yama grátis e number nobo : 0800 0900. E number ta alkansabel for di djaluna te ku djabièrnè di 08:00 – 12:00 or i di 13:00 – 17:00 or.
Hende ku tin pregunta tokante bakunashon i e bakuna tambe por yama e number akí.

Ta posibel tambe pa mèldu online pa pasa angua kontra corona na www.bonairecrisis.com Por hasi esaki 24 ora pa dia. Esaki ta e forma mas fásil pa traha un sita pa pasa angua.

Dikon mucha di 12 te ku 17 aña tin mag di bakuná?

* Konseho di Salú na Hulanda a konsehá pa bakuná mucha den e edat ei. A resultá ku e bakuna ta adekuá pa e grupo di edat akí tambe.
* Mucha ku pega ku e vírùs di corona mayoria biaha tin keho leve.
* Pero tin ora nan por keda hopi tempu ku keho despues di kontagio.
* Meskos ku adultonan, muchanan tambe por transmití e vírùs pa otro.
* Un mucha ku a bakuná no solamente ta protehá su mes, pero tambe e hendenan rònt di dje.

Unda i kon hóben di 12 te ku 17 aña por mèldu pa pasa angua kontra corona?

Hóben di 12 te ku 17 aña por mèldu entrante 2 di yüli pa pasa angua kontra corona.
Por hasi esaki via e number grátis 0800-0900 di djaluna te ku djabièrnè di 08:00 – 17:00 or.

Na Boneiru e hóbennan di 12 te ku 17 aña di edat mester pèrmit di nan mayor òf tutor pa nan por pasa angua.
Mayornan tin ku firma un deklarashon na e sitio ku ta bakuná, dunando asin’ei pèrmit pa nan yu haña e bakuna. E mayornan mester por identifiká nan mes ku un sédula òf ID (di e mayor i di e yu).

Mayornan i nan yu por pasa angua tambe sin sita. Pa dia i ora pa pasa angua, wak e Q&A apart riba e página akí i e mensahenan riba Facebook.

Konseho di Salú esta Gezondheidsraad na Hulanda a konsehá pa bakuná hóben den e grupo di edat akí.
Delaster tempu tin mas i mas kaso di hóben i e hendenan ku ta biba ku nan den kas, ta pega ku e vírùs di corona. E hóbennan no ta bira gravemente malu, pero nan mester bai den isolashon sí. Den práktika ta resultá ku e hóbennan tin problema pa bai den isolashon. Si e hóbennan bakuná, esei ta yuda pa evitá ku e vírùs di corona ta plama na e isla. E chèns ta chikitu ku hóbennan ku a pega ku e vírùs ta bira gravemente malu. Ku e angua kontra corona e chèns akí ta bira mas chikitu ainda pa nan.

Na nos isla tin mas o ménos 1.400 hóben den e edat di 12 te ku 17 aña. Departamento di Salubridat Públiko tin bastante bakuna pa bakuná e hóbennan.

Mi por haña un prueba di bakunashon (kódigo QR) na Boneiru pa mi biahe pa Oropa? I e kódigo QR akí bor bai den Corona-app tambe?

Via 0800 – 0900 bo por pidi un prueba di bakunashon si bo ta kompletamente bakuná. E prueba akí ta un kódigo QR di papel. Ora bo hasi petishon pa e prueba, bo ta haña un sita pa bai tum’é.
Na momentu di pidi i bai tuma e kódigo QR bo mester tin bo karchi di bakunashon i bo pasport na man.

Pa biaha den Oropa bo mester por mustra e kódigo QR digitalmente. Upload e kódigo QR den e CoronaCheck app ta posibel awor akí tambe si bo ta habitante di Boneiru ku ta kompletamente bakuná. I por hasi esei awor akí ku un sédula tambe.
Bo ta haña instrukshon riba papel pa esaki ora bo bai tuma e kódigo QR di papel.

E callcenter 0800 – 0900 ta alkansabel for di djaluna te ku djabièrnè di 08:00 – 12:00 or i di 13:00 – 17:00 or.
Por sosodé ku numbernan for di den eksterior no por haña kontakto ku 0800 – 0900. E ora ei durante ora di ofisina bo por yama +599 715 5390.

Habitantenan di Boneiru ku aktualmente ta na Hulanda i no tin un kódigo QR, por pidi e kódigo na GGD na Utrecht. Por hasi esaki durante ora di ofisina na number di telefòn 030 – 800 2899.

Mi no ta haña konekshon ora mi yama e number di Salubridat Públiko di bakunashon 0800-0900 ku un number for di eksterior. Tin un otro number mas ku mi por yama?

Por ta ku numbernan for di eksterior no por haña kontakto ku 0800 – 0900. E ora ei durante ora di ofisina bo por yama +599 715 5390.

Awor akí mi por akudí SIN SITA tambe pa laga bakuná mi mes. Na unda i ki dia esei por?

Ta posibel pa pasa angua kontra corona sin sita na Kompleho Deportivo Jorge Nicolaas.
Ta pasa angua, di 09:00 or pa 14:00 or, riba:

Djasabra 23 di òktober
Djasabra 30 di òktober
Djasabra 6 di novèmber
Djasabra 13 di novèmber
Djasabra 20 di novèmber
Djasabra 27 di novèmber
Djasabra 4 di desèmber
Djasabra 11 di desèmber
Djasabra 18 di desèmber

Durante e oranan pa pasa angua sin sita habitantenan por hasi nan preguntanan serka e dòkter na e sitio di pasa angua.

Na unda mi por haña e Deklarashon di Salú ku nan ta usa pa registrá pa bakunashon?

Por haña e Deklarashon di salú pa bakunashon kontra COVID-19 akinan: https://www.bonairecrisis.com/wp-content/uploads/2021/03/Formulier-Gezondheidsverklaring_Papiamentu.pdf

Kon ta plania pa bakuná e habitantenan di Boneiru?

E bakunanan di Pfizer a yega Boneiru na luna di febrüari 2021.
* Personal di kuido a pasa angua kontra e vírùs di corona for di 22 di febrüari awor.
* For di 1 di mart e grupo di hende di 60 aña bai ariba por a pasa angua.
* For di 27 di mart habitantenan di 18 aña bai ariba por a registrá pa nan angua kontra corona.
* Hóben di 12 te ku 17 aña por mèldu entrante 2 di yüli 2021 pa pasa angua kontra corona.

* Pa e bakuna di Pfizer duna bon resultado mester pasa dos angua. E tempu entre e dos anguanan ta màksimo sinku siman.
* Pa tur habitante di 12 aña bai ariba por pasa angua, Hulanda ta manda vários karga di bakuna di corona pa Boneiru.

* E chèns ku bo por haña corona despues di dos angua ta hopi chikitu, pero no sero. Pa e motibu aki por lo pronto e mesun reglanan di corona ta konta pa hendenan ku a bakuná, ku pa hendenan ku no a bakuná ainda.

Hende ku ta temporalmente na nos isla tambe por bakuná?

Bishitantenan ku bini Boneiru por pasa nan promé angua kontra corona despues di un estadia di dos luna. Minimalmente tres siman despues di e promé angua nan mester ta na nos isla ainda pa pasa e di dos angua.

Despues di bakunashon mi tin ku tene mi mes na e medidanan di corona ainda?

Sí. Tur hende ku a bakuná, mester keda tene nan mes na e reglanan pa evitá plamamentu di e vírùs di corona.
E bakunashon ta protehá bo di manera ku bo no ta bira gravemente malu si bo haña corona.
Si bo ta kompletamente bakuná e chèns ku bo ta pega ku e vírùs ta mas chikitu ku ora bo no ta (kompletamente) bakuná. E chèns ku bo ta pega un otro hende ku e vírùs tambe ta mas chikitu, pero no nulo.
P’esei hendenan ku a bakuná i hendenan ku no a bakuná mester tene nan mes na e reglanan di corona.

Si mi ke biaha, i mi a bakuná kaba, e ora ei ainda mi tin di laga nan tèst mi?

Sí. Pa hende ku a bakuná kaba, por lo pronto e mésun medidanan ta na vigor ku pa hendenan ku no a bakuná ainda.
Motibu di esaki ta pasobra no ta konosí ainda si un hende ku a bakuná por plama e vírùs di corona.

Kua ta e bakunanan ku Boneiru ta haña for di Hulanda?

Boneiru ta haña e bakuna PfizerBioNTech for di Hulanda. E bakuna ei a haña aprobashon pa merkado oropeo. Mas informashon tokante bakuna kontra corona bo por lesa akinan:
https://www.rivm.nl/coronavirus-covid-19/vaccins/vragen-en-antwoorden-coronavaccin

Si mi disidí pa bakuná e ora ei mi mes por skohe e bakuna?

Nò, bo no tin e eskoho ei.

Mi tin ku paga pa bakuná kontra e vírùs di corona?

Nò, bakunashon kontra e vírùs ta grátis pa tur hende.

Mi ta haña un prueba di bakunashon despues ku mi a pasa angua?

Ora ku bo a haña e dos anguanan, nan ta duna bo un karchi di bakunashon. Riba e karchi tin bo informashon personal, e fechanan ku bo a haña bakunashon i nòmber di e bakuna. E karchi aki bo por warda na kas.

Tambe bo por pidi un prueba di bakunashon kódigo QR via 0800-0900.

Tin aweró sufisiente bakuna pa tur hende na Boneiru?

Sí Salubridat Públiko ta kere ku ta bakuná 19.000 hende na Boneiru.
A konta e hendenan ku no ta inskribí akinan i ta temporalmente riba nos isla tambe aden.  Salubridat Públiko ke bakuná mas tantu hende posibel na Boneiru. Di e manera ei e isla ta mihó protehá kontra plamamentu di e vírùs di corona.

Ken ta pasa bo e angua ku e bakuna na Boneiru?

Enfermeranan i brudernan i asistentenan di dòkter. Semper tin un dòkter presente pa wak si tur kos ta bai bon.

Mi ta obligá pa laga bakuná mi mes?

Nò, bo no ta obligá pa hasi esei. Departamento di Salubridat Públiko Boneiru ta informá bo tokante e bakuna i e bakunashon. Nan ta konta bo tambe kiko e konsekuensianan ta pa nos tur si hopi hende laga bakuná nan mes. Òf kiko e konsekuensia ta si esei no sosodé. Despues bo por skohe si bo ta laga bakuná bo mes kontra e vírùs di corona sí òf nò.

Ainda mi ta duda si mi ke laga bakuná mi mes. Mi por registrá despues tambe ainda?

Sí, esei por. Despues semper bo por registrá ainda pa e bakunashon grátis.

Dikon nos no ta bakuná solamente hende grandi i hende vulnerabel? E ora ei hende salú no tin mester di un bakuna tòg?

Ta bèrdat ku hende grandi i hende vulnerabel ta kore un riesgo mas grandi pa bira gravemente malu ora nan haña corona. Pero hende salú di tur edat tambe por haña corona. Mas tantu hende laga bakuná nan mes, ménos kaso di COVID-19 nos lo tin ku keho serio.

Si mi no bakuná, mi por biaha ainda, i tin mag di drenta sitio i edifisio públiko?

No por bisa hopi di esaki ainda. Bo por sali for di e punto di bista si, ku mas tantu hende laga bakuná nan mes, mas tantu chèns bo tin pa move i biaha libremente.
Bo ta liber pa laga bakuná bo mes. Na Boneiru no ta trata hende ku no ke tuma e bakunashon otro.

Funshonamentu di bakuna

Pakiko mi lo laga bakuná mi mes?

Ora bo laga bakuná bo mes, bo ta protehá bo mes kontra e vírùs di corona. Pero tambe bo famia, amigunan i koleganan i e hende vulnerabel rònt di bo. Ora hende a bakuná, e vírùs no por plama tur kaminda pa loko mas. E ora ei tin mester di ménos medida i regla pa sòru ku e vírùs no ta plama.

Kiko un bakuna ta presis?

Un bakuna ta un remedi ku ta protehá bo kontra un malesa infeksioso, manera sarampi, roihun, kachete pero tambe COVID-19. E bakuna ta sòru pa bo no bira malu ora bo pega ku un vírùs. Ora di ènter òf bakuná nan ta pasa bo un angua ku e bakuna den bo brasa parti ariba. Nan ta pasa bo dos angua. E di dos angua nan ta pasa bo despues di masoménos un luna.

Ora ku e bakuna drenta den bo kurpa, bo kurpa ta bai traha antikuerpo. Asina bo resistensia ta bira mas grandi. E ora ei na momentu ku bo pega ku un vírùs bo bo kurpa ta rekonosé esei. P’esei e chèns ku bo ta bira hopi malu e ora ei ta chikitu.

Dikon mester pasa dos angua, un angua mes no ta sufisiente?

Ku dos angua di e bakuna di Pfizer bo ta mihó protehá i bo no ta bira gravemente malu si bo pega ku e vírùs di corona. Ku un angua so bo ta ménos protehá. Ku un angua so e protekshon ta bira ménos i e ta ménos bon. Pues e chèns ta mas grandi ku den kaso ku bo pega ku e vírùs di corona bo ta bira gravemente malu. Despues di un angua so bo ta ménos bon protehá tambe kontra variantenan di e vírùs di corona, manera e variante di dèlta ku tambe ta na Boneiru awor akí.

Kiko e promé angua ta hasi:
E defensa kontra malesa den bo kurpa ta hasi ehersisio. E ta bira konsiente di e intruso den bo kurpa. E ora ei bo kurpa ta bai traha antikuerpo. Di e manera ei ta konstruí protekshon kontra e vírùs di corona. E base ta poné.

Kiko e di dos angua ta hasi:
E angua akí ta sòru na no ménos ku kuater manera pa reforsá e base.
1. E kantidat di antikuerpo ta oumentá enormemente.
2. E antikuerponan ta bira mihó den nan tarea. Nan ta pega mas mihó na e vírùs di corona i asina nan ta ataká.
3. Bo defensa ta keda mas tantu tempu alerta i e ta mas tantu tempu armá kontra e vírùs di corona.
4. Ku e di dos angua e chèns ku e otro variantenan di e vírùs por hasi bo malu ta bira mas chikitu.

Bo ta kompletamente bakuná ora bo a pasa e promé i e di dos angua kontra corona. E ora ei bo por pega ku e vírùs ainda, pero kompará ku un hende ku a pasa un angua so, bo ta hopi mas mihó protehá kontra malesa grave i hospitalisashon.

Bo no a pasa e di dos angua ainda? Yama 0800 – 0900 grátis pa un sita. Na luna di ougùstùs riba djasabra bo por kana drenta Kompleho Deportivo Jorge Nicolaas sin sita tambe. Bai ku bo sédula i bo karchi di bakunashon pa nota e di dos angua riba e karchi.

E bakuna ta traha bon ainda, si ta te despues di 5 siman mi ta pasa mi di dos angua?

E bakuna di Pfizer ta funshoná mihó, ora entre e promé i di dos angua tin tres te seis siman. Konseho di Salú (Gezondheidsraad) ta konsehá pa pasa e di dos angua tres te seis siman despues di e promé angua.
Boneiru ta sigui e konseho akí. Di manera ku un grupo mas grandi di habitante por haña e promé angua mas lihé. Asina mas tantu habitante lo ta protehá pa un parti kaba kontra infekshon ku e vírùs.

Ta bèrdat ku 1 angua ku e bakuna ta sufisiente, si mi tabatin corona kaba? Kiko ta e konseho pa habitantenan di Boneiru?

Konseho di Salú (Gezondheidsraad) na Hulanda a deklará ku hendenan ku tabatin corona kaba, ya kaba a akumulá un protekshon pa seis luna. Esaki ta nifiká ku den e periodo ei nan no por bira gravementu malu pa motibu di corona. Ora ku e hendenan aki haña 1 angua ku e bakuna, despues di un par di siman nan kurpa ta sufisientemente protehá, pues nan no ta bira gravemente malu pa motibu di corona. E ora ei nan tin e mesun protekshon ku hendenan ku no tabatin corona, pero ku sí a haña dos angua ku e bakuna.

Esaki ta konseho di Salubridat Públiko pa habitantenan di Boneiru ku tabatin corona:
* Ta te despues di 4 siman ku bo tabatin bo promé kehonan di corona bo por laga bakuná bo mes.
* Si bo tabatin COVID-19, bisa esaki mesora na momentu di traha sita pa pasa angua.
* Durante bo promé sita pa pasa angua, konsultá ku e dòkter na e sitio di pasa angua si ta konsehabel pa bo tuma e di dos angua.

Despues di bakunashon bo por transmití e vírùs pa un otro hende ainda?

Esei no ta konosí ainda. Tanten ku nos no sa esei, hendenan ku a pasa angua tambe mester tene nan mes na e regla di 1,5 meter.

Mi por pega otro hende ainda, ora mi mes a bakuná kaba?

No ta konosí ainda si un hende ku a bakuná kaba por plama e vírùs tòg. Pa e motibu akí nos tin ku skohe pa seguridat. P’esei pa hendenan ku a bakuná kaba, por lo pronto e mesun reglanan di corona ta na vigor ku pa hendenan ku no a bakuná ainda.

Tin chèns pa keho despues di pasa angua kontra e vírùs di corona?

Serka mayoria bakuna hende por haña molèster leve di keho despues, ta yama esaki efekto sekundario. Ta trata di doló òf un bòlòbònchi kòrá chikitu kaminda bo a pasa angua. Bo por haña molèster tambe di kansansio, doló di kabes, doló di múskulo, kayente di kurpa òf kalafriu. Un par di dia despues di a pasa angua mayoria hende no tin keho mas.

Bo ta gravemente malu, bo no por ku sierto remedinan òf bo ta na estado? Papia tokante esaki ku bo dòkter di kas, òf ku e tim di Salubridat Públiko pa wak si bo tin mag di bakuná.

Despues di mi bakunashon mi por haña corona ainda?

Sí, esei por. E bakunashon ta traha sí, pero ta dura poko promé ku e kurpa a traha antikuerpo kontra e vírùs di corona. Un siman despues di e di dos bakunashon mas ku 90% di hende ta protehá kontra corona. E chèns ku bo ta haña corona despues di e di dos angua ta chikitu, pero no sero. E chèns ku despues di e promé angua tòg bo ta haña corona ainda ta mas grandi. P’esei ta importante pa tuma e di dos angua tambe. Si bo tin keho ku ta bini dilanti hopi den kaso di e vírùs di corona, semper ta importante pa laga tèst bo mes.

Nan ta bisa ku e bakuna tin influensia riba hende hòmber su gana di hasi sèks. Nan ta bisa ku e tin influensia tambe riba fertilidat di hende muhé. Esaki ta bèrdat?

A tèst e bakuna ampliamente riba hende hòmber i hende muhé. For di e investigashonnan no a resultá ningun prueba ku e bakuna tin influensia riba hende hòmber su gana di hasi sèks. No a resultá tampoko ku e bakuna tin efekto riba fertilidat di hende muhé.

Si un hende ku a bakuná kaba, despues ta tèst positivo ku un tèst di PCR, esei por tin di haber ku e bakunashon?

Nò, e bakunashon mes no tin influensia riba e tèst di PCR òf e tèst antigéniko. Despues di un bakunashon no tin rastro di e vírùs di corona den kurpa di hende. Si un hende tèst positivo ku e tèst di PCR (pues ta infektá), esei no tin nada di haber ku e bakunashon.

E bakuna di Pfizer ta efektivo pa 95%. Kiko esei ta nifiká presis?

Awor aki ta bakuná habitantenan di Boneiru ku e bakuna di Pfizer. E bakuna aki pa 95% ta efektivo kontra corona. Esaki ta nifiká ku hendenan ku haña e bakuna di Pfizer, tin 95% ménos chèns pa bira malu debí na e vírùs di corona, kompará ku hendenan ku no a pasa angua.

E bakuna ta duna resultado serka un vershon nobo, kambiá di e vírùs?

Sí, e bakuna ta duna resultado e ora ei tambe. Ta normal ku un vírùs ta kambia. Esaki no ta nifiká mesora ku e bakuna no ta duna resultado mas, pasobra ta trata di kambionan chikitu den e vírùs. Mundialmente paisnan ta vigilá bon si e bakunashon ta protehá kontra formanan nobo, kambiá di e vírùs. Informashon ku sientífikonan tin aktualmente, ta ku bakunashon ta protehá tambe kontra vershonnan nobo, kambiá di e vírùs di corona ku tin awor aki.

Si mi tin keho despues di mi bakunashon, na unda mi tin ku mèldu esaki?

Serka mayoria bakuna hende por haña molèster tambe di keho despues di pasa angua. Ta trata e ora ei di por ehèmpel doló òf un bòlòmbònchi chikitu kòrá kaminda bo a pasa angua. Bo por haña molèster tambe di sinti kansá, doló di kabes, doló di múskulo, kentura òf kalafriu. Despues di un par di dia despues di pasa angua mayoria hende no tin keho mas. Si bo tin keho i bo ta preokupá tokante esei, e ora ei mèldu esaki mas rápido posibel serka bo dòkter di kas.

Na Hulanda nan ta mèldu i atministrá tur keho despues na di bakunashon na Sentro di Efekto Sekundario (Bijwerkingencentrum) Lareb. Habitantenan di Boneiru tambe por mèldu nan kehonan einan. Esei por riba www.lareb.nl
NB. Ora bo yena loke bo ke mèldu na Lareb, nan lo puntra bo pa bo postcode. E parti aki bo por laga bashí. Bo por manda e formulario sin postcode tambe.

Siguridat di bakuna

Mi sanger por kuaha (trombósis) despues di bakuná ku e bakuna di Pfizer?

Na Boneiru nan ta usa solamente e bakuna di Pfizer. Serka otro bakunanan kontra corona a surgi e efekto sekundario raro i grave di sanger ku ta kuaha. Ku e bakuna di Pfizer te ainda esei no a sosodé.

Si bo ta usa remedi pa hasi sanger delegá, kasi semper bo por pasa angua ku e bakuna di Pfizer sin problema. Konsultá ku bo dòkter di kas promé sí. Ora di traha sita pa pasa angua i ora di pasa angua na e sitio di bakunashon, bisa ku bo ta usa remedi pa hasi sanger delegá. Ta útil pa bai ku bo lista di remedi òf ku e remedinan ora bo bai e sita pa pasa angua.

Kon mi por sa sigur ku ta seif pa laga bakuná mi mes?

Promé ku un bakuna subi merkado, ta hasi masha hopi investigashon. Ta te ora ku ta sigur ku e ta seif i ta duna resultado, un bakuna ta subi merkado. P’esei ta tèst bakuna riba hopi hende promé durante investigashon, promé ku nan subi merkado. Ta hasi esaki pa ta sigur ku hende no ta haña keho despues di bakuná. E Agensia Oropeo di Remedi (European Medicines Agency – EMA) mester aprobá e bakunanan promé ku nan subi merkado oropeo.Boneiru ta haña e bakuna PfizerBioNTech for di Hulanda.

Mi a haña COVID-19 kaba; tòg mi tin ku laga bakuná mi e ora ei?

Konseho di Salú (Gezondheidsraad) na Hulanda a konsehá pa bakuná hendenan ku tabatin COVID-19 tambe. E konseho aki ta konta pa Boneiru tambe.
Esaki por for di 4 siman despues ku bo a haña keho ku parse corona. Na e sitio di pasa angua bo por konsultá ku e dòkter ku ta einan si un di dos bakunashon ta nesesario ainda.

 

Mi por tuma e bakuna di Pfizer den kombinashon ku píldora antikonseptivo?

Si, esei por. Bakuna no tin influensia riba funshonamentu di píldora antikonseptivo. E píldora antikonseptivo no tin influensia riba bo sistema di defensa. Nan no ta influensiá e reakshon di defensa ku e bakuna kontra corona ta generá tampoko.

For di luna di mei 2021 na Boneiru hende muhé na estado ta haña konseho pa laga bakuná nan mes. Dikon?

For di investigashon a resultá ku serka masha hopi hende muhé na estado no a registrá efekto sekundario serio despues di bakunashon.
Na Merka nan a bakuná 90.000 hende muhé na estado ku e bakuna di mRNA, entre otro ku Pfizer.
Pa e motibu akí for di luna di mei tur hende muhé na estado ta haña konseho pa laga bakuná nan mes i informá nan mes bon.
Bo ta na estado òf bo ke sali na estado? E ora ei konsultá ku bo dòkter di kas òf bo ginekólogo si bakunashon pa bo tambe ta e mihó eskoho.

Bo ke laga bakuná bo mes despues di esei? Traha un sita via 0800 0900 pa e promé angua òf bai pasa angua sin sita na kompleho deportivo. Bisa e dòkter na e sitio di pasa angua sí ku bo ta na estado.

Bon pa sa:
• Hende muhé na estado tin un chèns mas grandi pa bira gravemente malu di e vírùs di corona, kompará ku hende muhé ku no ta na estado. Esaki a resultá for di investigashon.
• Si bo ke sali na estado, bo por pasa angua kontra COVID-19.
• E bakunashon no tin influensia riba bo fertilidat òf riba e plasenta. Esaki a resultá for di investigashon ku tur fabrikante di bakuna a hasi.
• Bo ta hasiendo FIV (fertilisashon in vitro)? Konsultá ku e persona ku ta duna bo tratamentu di FIV si bo por pasa angua.
• Antikuerpo ta protehá beibi ku a kaba di nase kontra malesa infeksioso. E beibinan ta haña e antikuerponan di nan mama via e plasenta. E antikuerponan aki ta disparsé pokopoko den e lunanan despues di parto. No ta konosí si esaki ta pasa tambe ku e antikuerponan ku un hende ta produsí despues di bakunashon. Chèns ta grandi ku e antikuerponan ta disparsé.
• No tin indikashon ku e bakuna ta bai den lechi di mama, òf ku e beibi ta hañ’é via lechi di pechu.
• Bo ta na estado i bo ke laga bakuná bo mes? Kompartí bo eksperensianan riba e wèpsait www.moedersvanmorgen.nl

Tin kos ku mi no por hasi despues ku mi a bakuná?

Na Boneiru nan ta bakuná habitantenan ku e bakuna di Pfizer. Pfizer ta konsehá pa ta kouteloso durante e promé 48 ora despues di bakunashon. E konseho ta pa durante 48 ora no bai sambuyá. Bo tin keho (efekto sekundario) despues ku bo a bakuná? E ora ei e konseho ta pa bai sambuyá despues ku bo a pasa 24 ora sin keho.
E konseho ta tambe pa no laga hasi ningun operashon durante 48 ora promé ku bo bakunashon i 48 ora despues di bo bakunashon.