Q&A’s

Home » Q&A’s

Último informashon: 10 di yüni 2022

Entidat Públiko Boneiru a formulá e informashon aki den koperashon ku departamento di Salubridat Públiko i otro instansianan.

Kontinuamente ta aktualisá e lista aki. E desaroyonan rònt di COVID-19 ta impredisibel, situashonnan, reglanan i kondishonnan por kambia kada momentu. Pa e último informenan nos ta referí bo na komunikadonan di prensa di Entidat Públiko Boneiru riba nan página di Facebook. Bo tin un pregunta ku ainda no ta den e lista? E ora ei manda un email ku bo pregunta na info@bonairegov.com.

No por derivá ningun derecho for di e informashon riba e lista ku Q&A.

Q&A's habitante

Kas

Tin un skema kaminda bo por mira kua ta e medidanan ku ta na vigor awor?

Pa un bista general di e medidanan bo por wak riba: https://www.bonairecrisis.com/pap/medidanan/

Kua ta e reglanan básiko ku ta na vigor na Boneiru?

  • Laba bo mannan regularmente;
  • No mishi ku bo wowonan, nanishi òf boka;
  • Ora bo ta tosa òf nister, tapa bo boka òf nanishi ku e parti paden di bo èlebog òf ku un lensu;
  • Laga aire fresku pasa regularmente den espasionan paden, tene kas i ofisina limpi;
  • Bo tin keho? Keda kas i yama 0800 0800 (grátis).

Semper tene bo mes na e reglanan akí. Protehá personanan vulnerabel rònt di bo.

Hende tin mag di bini huntu i ta pèrmití evento?

Sí esei tin mag i ta pèrmití evento.
No ta importá kuantu hende ta bini huntu. Ta pèrmití kantamentu i baliamentu paden i pafó.
Tapaboka no ta obligatorio.

Semper tene bo mes na e reglanan básiko.

Gruponan musikal tin mag di toka pa públiko i públiko tin mag di balia?

Gruponan musikal tin mag di toka i kanta pa públiko. Públiko tin mag di balia i kanta paden i pafó.

No tin un máksimo pa e kantidat di bishitante.

Semper tene bo mes na e reglanan básiko.

Empresa

Kua ta e reglanan pa hóreka for di 4 di mart 2022?

Pa hóreka e orarionan normal ta konta.

No tin un máksimo pa e kantidat di bishitante. Ta pèrmití kantamentu i baliamentu paden i pafó.

No ta obligatorio pa bisti tapaboka òf sinta na lugá fiho.

Doñonan di establesimentu di hóreka mes por formulá regla, nan por obligá bishitantenan pa usa tapaboka òf handsanitizer.

Semper tene bo mes na e reglanan básiko.

Kua ta e reglanan awor akí pa tienda?

Tiendanan mes por formulá nan reglanan pa laga hende drenta. Nan por obligá kliente pa bisti un tapaboka, usa un garoshi òf handsanitizer.

Semper tene bo mes na e reglanan básiko.

Kua ta e reglanan pa barbero i otro profeshon di kontakto?

Tapaboka no ta obligatorio.

Empresarionan mes por formulá regla pa laga hende drenta, manera uso di tapaboka òf handsanitizer.

Semper tene bo mes na e reglanan básiko.

Kua ta e reglanan pa kasino, i teater di sine?

Pa kasino, i teater di sine e orarionan normal ta konta.

No tin un máksimo pa kantidat di bishitante. Ta pèrmití kantamentu i baliamentu paden i pafó.

Tapaboka i lugá fiho pa sinta no ta obligatorio.

Empresarionan mes por formulá regla, nan por obligá bishitantenan pa usa tapaboka òf handsanitizer.

Semper tene bo mes na e reglanan básiko.

Kua ta e reglanan pa sauna?

Tapaboka no ta obligatorio.

Empresarionan mes por formulá regla pa laga hende drenta, manera uso di tapaboka òf handsanitizer.

Semper tene bo mes na e reglanan básiko.

Dunadónan di trabou i empresanan por nenga personal/kliente ku no a bakuná?

Dunadónan di trabou no mag nenga personal si e hendenan akí no a bakuná. Empresanan tampoko no mag nenga kliente. Bakunashon no ta obligatorio.

Dunadónan di trabou no mag puntra nan empleadonan si nan a bakuná. Empleadonan tin derecho riba privasidat.

Skol i instansia

Kua ta e reglanan pa skol di deporte i deporte (kompetitivo)?

Ta pèrmití públiko pa ta presente, paden i pafó. No tin un máksimo pa públiko den skol di deporte òf den stadion.

Tapaboka no ta obligatorio.

Empresarionan mes por formulá regla pa laga hende drenta, manera uso di tapaboka òf handsanitizer.

Semper tene bo mes na e reglanan básiko.

Kua ta e reglanan pa misa, sirbishi i orashon di djabièrnè?

No tin un máksimo pa e kantidat di hende ku por bini huntu.
Ta pèrmití kantamentu huntu.
Tapaboka no ta obligatorio.

Semper tene bo mes na e reglanan básiko.

Kua ta e reglanan di corona pa skol?

Adultonan i alumnonan mester tene nan mes na e siguiente reglanan básiko: laba man regularmente, tosa i nister den èlebog òf den un lensu i no mishi ku wowo i nanishi. Limpia e espasionan na skol regularmente i laga aire fresku pasa.

No ta obligatorio pa tene distansia i bisti tapaboka.

Enseñansa avansá i MBO:

Ta konsehá alumnonan i dosentenan di enseñansa avansá i MBO pa hasi un tèst  propio dos biaha pa siman.

Si e resultado di e tèst propio ta negativo, e ora ei nan tin mag di bai skol. Si e resultado ta positivo, e ora ei nan ta bai den isolashon i nan ta traha un sita na Salubridat Públiko pa hasi tèst di nobo.

Q&A's biahero

Hendenan ku ta biaha pa Boneiru

Kua ta e kondishonnan pa biaheronan pa Boneiru?

Pa informashon tokante biahamentu pa Boneiru: www.bonairecrisis.com/pap/biaha

Promé ku salida biaheronan no mester tin keho ku ta normal serka COVID-19, manera: fèrkout di nanishi, doló di garganta, tosamentu, nistermentu, sinti benout, pèrdida di holó i smak, kayente di kurpa, kentura.

Biaheronan mes mester kontrolá si nan seguro di malesa ta kubri gastu di malesa durante nan estadia na Boneiru i tambe posibel gastunan relashoná ku COVID-19.

Kiko ta e kondishonnan pa biaheronan entre Boneiru I Kòrsou i vice versa?

Biaheronan di Kòrsou pa Boneiru

Pa informashon tokante biahamentu pa Boneiru: www.bonairecrisis.com/pap/biaha

Biaheronan ku ta biaha di Boneiru pa Kòrsou

Pa informashon tokante e kondishonnan pa biaha pa Kòrsou:

www.covid19.cw/biaha/

Informashon adishonal

Biaheronan mester por mustra tur dokumentu ku nan ta pidi na salida i yegada.

Kiko ta e kondishonnan pa biaheronan entre Boneiru i Aruba I vice versa?

Biaheronan ku ta biaha di Aruba pa Boneiru

Pa informashon tokante biahamentu pa Boneiru: www.bonairecrisis.com/pap/biaha

E kondishonnan pa biaheronan di Boneiru pa Aruba

Pa informashon tokante e kondishonnan pa biaha pa Aruba: https://www.aruba.com/nl/traveler-health-requirements

Informashon adishonal

Na salida i na yegada biaheronan mester por mustra tur e dokumentunan ku nan ta pidi.

Hendenan ku ta biaha saliendo for di Boneiru

Mi tin mester di un resultado di tèst pa biaha. Na unda mi por laga hasi tèst di corona na Boneiru ?

Bo por bai na algun lugá komersial:

Departamentu di Salubridat Públiko ta tèst bo solamente ora bo tin síntoma.

Biaheronan ku ta biaha di Boneiru pa Hulanda mester mustra un prueba di corona na yegada?

No. Entrante 23 di mart 2022 biaheronan no tin mester mustra un ‘prueba di corona’.

Q&A's médiko

Tèst i maneho di tèst

Resultado di mi tèst propio ta positivo. Kiko awor?

Bai hasi tèst mas pronto posibel na Salubridat Públiko!
Yama e number grátis 0800 – 0800 pa un sita pa tèst. E number ta alkansabel for di djaluna te ku djabièrnè di 08.00 – 17.00 or i riba djasabra i djadumingu di 08.00 – 13.00 or.

Dikon?
1) Resultado di e tèst propio por ta positivo miéntras bo no ta kontagiá. Un tèst di PCR ta mas konfiabel ku un tèst propio. Si bo bai tèst di nobo na Salubridat Públiko, bo ta evitá ku bo ta den isolashon pòrnada.
2) Ku solamente un tèst propio positivo bo no ta haña un prueba di rekuperashon. Bo tin mester di un prueba di rekuperashon pa por biaha despues di un kontagio ku COVID-19.
Pa mas informashon tokante isolashon i karentena, wak riba: https://www.bonairecrisis.com/pap/informashon-di-covid-19/

Ki ora mi no por hasi un tèst propio?

Ora bo tin un salú vulnerabel òf ora bo ta gravemente malu;
Ora bo ta traha ku hende ku tin un salú vulnerabel òf ku ta gravemente malu;
Ora bo tin kontakto ku hende ku tin un salú vulnerabel òf ku ta gravemente malu;
Ora bo ta den karentena. Bo por sali di karentena solamente si bo hasi un tèst di PCR na Salubridat Públiko. Bo ta hasi e tèst di PCR riba e di 5 dia despues di e último kontakto ku e persona kontagiá;

E ora ei traha un sita pa tèst na Salubridat Públiko. Yama 0800 0800 pa un sita.

Kiko ta e diferensia entre un tèst propio i un tèst di PCR?

Un tèst di PCR ta mas konfiabel ku un tèst propio.
Bo ta hasi un tèst di PCR serka un eksperto. E eksperto sa eksaktamente na unda e tin ku saka sleim for di bo nanishi i garganta pa e tèst.
Den un laboratorio nan ta wak si e vírùs di COVID-19 ta den e sleim. Un tèst di PCR ta haña partíkula di e vírùs di COVID-19 mas rápidamente ku un tèst propio. Tambe ora un persona (kasi) no tin keho ainda.

Si e tèst propio ta positivo, bai den isolashon na kas. Yama 0800 0800 i traha un sita pa un tèst di PCR pa sa sigur si bo tin corona.

Mi tin mester di un resultado di tèst pa biaha. Na unda mi por laga hasi tèst di corona na Boneiru?

Bo por bai na algun lugá komersial:

Departamento di Salubridat Públiko ta tèst bo solamente si bo tin keho.

Kua number mi por yama ora ku mi tin keho relashoná ku COVID-19?

Tuma kontakto ku departamento di Salubridat Públiko via number di telefòn 0800 0800 ora bo tin e siguiente kehonan:

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Di repente bo no por hole òf sinti smak mas

E number grátis 0800 0800 ta alkansabel di djaluna te ku djabièrnè di 08.00 am – 5.00 pm or i djasabra i djadumingu di 08.00 am – 01.00 pm or. Bo ta bai mesora den isolashon. Bo ta keda kas i no ta risibí bishita. Bo no tin niun kontakto ku e hendenan ku ta biba huntu ku bo den kas.

Mi no ta haña hende na liña ora mi yama 0800 0900. Tin un otro number di telefòn?

E ora ei durante ora di ofisina bo por yama +599 715 5390. E number akí no ta grátis.

Mi a bakuná i mi tin keho di corona. Mi tin ku bai tèst?

Ora bo ta kompletamente bakuná tambe bo por haña COVID-19 ainda.

P’esei bai tèst mas rápido posibel ora bo tin un òf mas di e kehonan akí:
• Fèrkout di nanishi
• Nanishi ta kore
• Nistermentu
• Doló di garganta
• Tosamentu
• Sinti benout
• Kayente di kurpa
• Kentura
• Di ripiente no por hole òf sinti smak mas
• Doló di kabes
• Sinti kansá

Keda kas i yama Salubridat Públiko via e number grátis 0800 – 0800. E number ta alkansabel for di djaluna te ku djabièrnè di 08.00 – 17.00 or i riba djasabra i djadumingu di 08.00 – 13.00 or.

Kon kos ta bai den e kaya di tèst pa COVID-19?

Riba e dia di bo sita pa tèst bo ta bai ku bo outo na e kaya di tèst na Salubridat Públiko. Esaki ta enfrente stadion na Kaya Gilberto F. Croes 24.

Bai ku un tapaboka i bo sédula òf pasport.

Na e sitio di tèst nan ta bisa bo na unda bo tin ku bai ku bo outo. Einan nan ta splika bo kiko e tèst ta enserá. Pa hasi e tèst ta dura algun minüt. Despues di e tèst bo ta bai kas mesora. Pues bo no ta bai pasa supermarket òf serka amistatnan.  Bo ta keda kas te ora nan yama bo tokante e resultado. E resultado ta positivo? E ora ei Salubridat Públiko ta duna bo informashon tokante kiko bo tin ku hasi. E tèst ta negativo? E ora ei bo tin mag di sali for di kas atrobe.

Pregunta tokante riesgo di infekshon

Mi a bakuná. Mi por haña COVID-19 ainda?

Si. Aunke bo ta kompletamente bakuná, ainda bo por pega ku e vírùs di corona. Mayoria biaha e kehonan ku bo tin ta leve. E chèns ku bo ta resultá den hòspital ta 22 biaha mas chikitu kompará ku un persona ku no a bakuná. Bo tin un òf mas di e kehonan akí?

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Diripiente bo no por hole ni sinti smak mas
  • Doló di kabes
  • Kansansio

E ora ei bai hasi tèst mas rápido posibel. Keda kas i yama Salubridat Públiko via e number di telefòn grátis 0800 0800. E number ta alkansabel for di djaluna te ku djabièrnè di 08.00 – 17.00 or i riba djasabra i djadumingu di 08.00 – 13.00 or.

Si mi a pega ku e vírùs di corona, kuantu tempu ta dura promé ku mi haña keho?

Despues ku bo pega ku ku e vírùs di corona ta dura entre 2 i 14 dia promé ku bo haña keho.

Ki ora mi por sali atrobe despues ku mi a pega ku COVID-19?

Riba e di 5 dia despues di e promé kehonan di COVID-19 bo tin mag di sali atrobe. Pero solamente si durante 24 ora bo no tabatin keho mas. Si ainda bo tin keho, e ora ei warda te ora bo no tin keho durante 24 ora. Despues di esei bo tin mag di sali.

Isolashon ta dura maksimalmente 10 dia. Si despues di 10 dia ainda bo tin keho, e ora ei bo tin mag di sali atrobe sí.

Bo no tabatin keho ainda, pero bo a tèst positivo sí? E ora ei riba e di 5 dia despues di bo tèst di COVID-19 bo tin mag di sali atrobe.

Salubridat Públiko ta tuma kontakto ku bo na final di bo isolashon.

For di ki momentu bo por pega otro hende ku COVID-19?

Esei por for di momentu ku bo tin keho ku ta kuadra ku COVID-19.

For di investigashon a resultá ku bo por pega otro hende tambe for di 2 dia promé ku bo tin keho.

Hende ta pasa e vírùs di corona pa otro via drùpel ku ta plama ora bo tosa, nister, kanta òf papia.

Karentena i isolashon relashoná ku COVID-19

Kon largu isolashon ta dura?

Bo tabatin keho? E ora ei e promé dia ku bo ta malu ta konta komo dia 0. Konta 5 dia serka esei. Riba e di 5 dia bo ta sin keho kaba? E ora ei bo por sali. Riba e di 5 dia bo tin keho ainda? E ora ei bo tin ku warda te ora bo ta sin keho durante 24 ora. Despues di esei bo tin mag di sali.
Por ehèmpel: bo a haña keho di COVID-19 riba djaluna. Esei ta dia 0. Sinku dia despues ta djasabra. Riba e djasabra ei bo tabata 24 ora sin keho kaba? E ora ei bo tin mag di sali.

Isolashon ta dura maksimalmente 10 dia. Si despues di 10 dia ainda bo tin keho, e ora ei bo tin mag di sali atrobe sí.

Bo no tabatin keho? E ora ei bo ta kuminsá konta for di e dia ku bo a bai tèst. Esei ta dia 0. Konta 5 dia aserka. Esei ta e dia ku bo tin mag di sali.
Por ehèmpel: bo a bai tèst riba djaluna. Esei ta dia 0. Sinku dia despues ta djasabra. Riba djasabra bo tin mag di sali atrobe.

Mi tin ku bai den karentena despues di kontakto ku un persona ku a pega ku e vírùs?

Nò. Si bo tabatin kontakto (estrecho) ku un persona ku a pega ku e vírùs, bo no tin mester di bai den karentena. Personanan ku ta biba den kas huntu ku un persona ku a pega ku e vírùs tampoko no tin mester di bai den karentena. Un persona ku ta biba den mesun kas ta tene distansia sí di e persona ku a pega ku e vírùs i no ta bai den kamber serka e persona ku a pega ku e vírùs.

Paga èkstra bon tinu pa wak si bo no ta haña keho di corona.

Tuma kontakto ku departamento di Salubridat Públiko pa traha un sita via number di telefòn 0800 0800 si bo tin un òf mas di e siguiente kehonan:

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Diripiente bo no por hole òf sinti smak mas

E number grátis akí ta alkansabel di djaluna te ku djabièrnè di 08.00 or te 17.00 or i djasabra i djadumingu di 08.00 or te 13.00 or. Hende ku ta yama for di eksterior por yama e number +599 715 5399 tambe, e number akí no ta grátis.

Komportashon i prevenshon

Mester bisti tapaboka na Boneiru?

Nò, na Boneiru tapaboka no ta obligatorio.

Un di mi empleadonan tin keho. Kua ta e pasonan ku mi tin ku tuma komo dunadó di trabou?

Un empleado den bo organisashon òf empresa tin keho ku ta mustra riba COVID-19? Mand’é kas mesora! Pidi e empleado ku insistensia pa e bai hasi tèst di COVID-19 na Salubridat Públiko.

Duna bo empleado oportunidat pa e warda riba resultado di e tèst na kas. No laga e empleado bin trabou te ora ku su resultado di tèst ta konosí. I si por, laga e traha na kas e ora ei. Asina bo ta evitá ku e empleado ta pega otronan ku e vírùs.

No ta posibel pa e empleado traha na kas? I Salubridat Públiko a konsehá ku e tin ku keda kas? E ora ei e dunadó di trabou tin derecho riba kompensashon di suèldo pa motibu di malesa. Manera semper un dunadó di trabou por mèldu e empleado malu den e portal di Asuntunan Sosial i Empleo (SZW), MijnCN.nl.

Kiko ta un ambiente di trabou saludabel i seif?

Ta hopi importante pa laga aire pasa bon den espasio kaminda hende ta bini huntu. Pa e motibu akí habri bentana i/òf porta un par di biaha pa dia durante minimalmente 15 minüt.

Pa empleadonan mester ta posibel pa nan laba man regularmente ku awa i habon i seka despues ku lensu di papel.

Diariamente mester limpia edifisionan bon ku atenshon èkstra pa e lugánan  kaminda hopi hende ta pone nan man, manera man di porta. No ta nesesario pa desinfektá e edifisio.

Tin hende na e sitio di trabou ku tin keho? Mand’é kas ku e súplika urgente pa bai tèst. Duna e kolega e posibilidat pa bai den isolashon.

Salú

Kiko ta Long COVID?

Tin hende ta keda hopi tempu ku keho despues di a pega ku COVID-19. Esaki nan ta yama ‘Long COVID’ (COVID ku ta dura largu). Bo por keda ku e kehonan akí durante algun siman te un par di luna despues ku bo a pega ku e vírùs.

Na Boneiru hende ku tin keho ku ta dura largu despues di corona hopi biaha tin molèster di:

  • Kansansio
  • Kondishon ku a bira ménos
  • Sinti benout
  • Ménos apetit
  • Ménos forsa den múskulo
  • Pèrdè rosea
  • Doló di kabes
  • Tosamentu
  • Problema ku drumimentu
  • Problema ku konsentrashon

Tin hende ku ta haña keho mental tambe pa motibu di keho di COVID-19 ku ta dura largu.

Bo tin molèster di keho di COVID-19 ku ta dura largu? Bo no por hasi bo trabou bon pa motibu di e kehonan akí? Òf pa motibu di e kehonan akí bo no por pasa bo dia bon?

E ora ei tuma kontakto ku bo dòkter di kas i papia kuné tokante bo kehonan.

Mi ta na estado. Mi por bira gravemente malu di e vírùs di corona?

Sí, esei por. Hende muhé na estado ta kore mas riesgo pa bira gravemente malu di COVID-19 ku hende muhé ku no ta na estado. Pa e motibu akí nan tin mas chèns pa resultá den hòspital òf den kuido intensivo. Hende muhé na estado ku tin un malesa, ta kore un riesgo mas grandi pa bira gravemente malu ora nan pega ku e vírùs di corona.

Bo tin keho di COVID-19? Yama 0800 0800 pa un sita pa hasi tèst na Salubridat Públiko.

Bo ta na estado i bo tin keho di COVID-19 i/òf kentura haltu? E ora ei tuma kontakto mesora ku bo dòkter di kas.

Hende muhé na estado ta haña konseho pa bai pasa angua. Ta seif pa pasa angua. E angua ta protekshon pa no bira gravemente malu. Ta seif tambe pa bai pasa e angua di buster.

Q&A's bakunashon

Bon pa sa

Na unda mi por haña e deklarashon di salú pa registrá pa bakunashon?

Bo por haña e deklarashon di salú pa registrá bakunashon kontra COVID-19 akinan:

E di promé i e di dos angua di buster

E di promé i e di dos angua

Kiko ta un prueba di corona? Pakiko mi tin mester di esaki?

Esaki ta un prueba ku bo ta kompletamente bakuná òf ku bo a rekuperá di corona. Un resultado negativo di tèst tambe ta un prueba di corona.

Un prueba di corona ta bini den forma di un QR-code. E QR-code akí ta disponibel riba papel òf digital, por ehèmpel den un app riba bo telefòn. Sa yama e prueba digital di corona ‘coronapas’ tambe.

Bo tin mester di un prueba di corona pa biaha.

Bo ke pidi bo QR-code òf bo tin pregunta tokante e QR-code? E ora ei yama 0800 0900 pa un sita. Bo por yama di djaluna te ku djabièrnè di 08:00 – 17:00 or.

Na unda mi por haña mi QR-code?

Bo ta kompletamente bakuná? E ora ei bo por yama i pidi bo QR-code na 0800 0900. E number akí ta alkansabel di djaluna te ku djabièrnè di 08:00 – 17:00 or. Tene bo prueba di bakunashon i bo pasport òf sédula na man ora bo ta yama pa bo QR-code.

Bo ta haña un sita pa buska bo QR-code na Departamento di Salubridat Públiko. Por hasi esei di djaluna te ku djabièrnè entre 12:00 am i 13:00 or segun sita.

Ora bo bin busk’é, bo ta haña bo QR-code personal riba papel. Bo ta haña splikashon kon bo tin ku upload e QR-code akí den e CoronaCheck-app.

Kon mi ta hinka mi QR-code di papel den e CoronaCheck-app?

Download e CoronaCheck-app via  Google Play Store òf Apple App Store.

Habri  e CoronaCheck-app.

Klek parti ariba na man robes den e menú riba ‘Añadí prueba di papel’.

Yena e kombinashon di lèter i skèn e QR-code internashonal di bo QR-code di papel.

Bo no ta logra pa upload e QR-code den e CoronaCheck-app? Yama 0800 0900.

Na unda mi por registrá pa laga bakuná mi mes?

Tur habitante di 5 aña bai ariba por pasa angua kontra corona sin traha sita na Kompleho Deportivo Jorge Nicolaas.

Pa dia i ora pa pasa angua, wak página di Gobièrnu di Boneiru riba Facebook.

Mucha di 12 te ku 17 aña por bakuná?

Sí, esaki por. Konseho di Salú na Hulanda a konsehá pa bakuná mucha di 12 te ku 17 aña. E bakuna ta adekuá pa e grupo di edat akí tambe.

Mayoria biaha mucha ku pega ku e vírùs tin keho leve. Pero tin ora nan por keda hopi tempu ku keho despues di kontagio. Meskos ku adultonan, muchanan tambe por transmití e vírùs pa otro.

Un mucha ku a bakuná no solamente ta protehá su mes, pero tambe e hendenan vulnerabel rònt di dje.

Unda mucha di 5 te ku 17 aña por mèldu pa pasa angua kontra corona?

Mucha di 5 aña bai ariba por pasa angua contra corona sin traha sita na Kompleho Deportivo Jorge Nicolaas. Pa dia i ora pa pasa angua, wak e página di Facebook di Gobièrnu di Boneiru.

Na Boneiru mucha di 5 te ku 17 aña di edat mester pèrmit di nan mayor òf tutor pa nan por pasa angua.

Mayornan tin ku firma un deklarashon na e sitio ku ta bakuná, dunando asin’ei pèrmit pa nan yu haña e bakuna. E mayornan mester por identifiká nan mes ku un sédula òf ID (di e mayor i di e yu).

Mi no ta haña hende na liña ora mi yama 0800 0900. Tin un otro number di telefòn?

E ora ei durante ora di ofisina bo por yama +599 715 5390. E number akí no ta grátis.

Mi ta obligá pa laga nan bakuná mi?

Nò, bo no ta obligá pa hasi esei. Bo por skohe si bo ta laga bakuná bo mes kontra e vírùs di corona sí òf nò.

Angua di buster

Kon mi por haña e angua di buster?

Por pasa angua di buster sin traha sita tur djasabra di 09:00 -12:30 or na Kompleho Deportivo Jorge Nicolaas, Kaya Amsterdam.

Pa ken e angua di buster ta?

E promé angua di buster ta pa hende di 12 aña bai ariba ku ta ful bakuná. Bo por pasa e promé angua di buster 3 luna despues di bo di dos angua kontra corona.

E dos angua di buster ta pa :

  • Personanan riba 60 aña
  • Hende ku problema médiko serio ku un karta di referensia di nan spesialista
  • Habitantenan di kasnan di kuido i hende grandi.

Bo por pasa e dos angua di buster 3 luna despues di bo di promé angua di buster òf 3 luna despues di un infekshon di COVID-19.

Mi tabatin COVID-19 i mi a pasa dos angua kontra corona. Mi tin ku pasa un angua di buster ainda?

Si. Bo tin ku pasa e angua di buster, aunke bo tabatin COVID-19 i bo a pasa dos angua kontra corona.

Kuantu tempu mester tin entre mi di dos angua i e angua di buster?

Por lo ménos tres luna despues di e di dos angua kontra corona. No tin sentido pa pasa e angua di buster den un periodo mas kòrtiku despues di e di dos angua kontra corona.

Despues di mi di dos angua mi tabatin COVID-19. Kuantu tempu mi tin ku warda pa pasa e angua di buster?

Por lo ménos tres luna despues ku bo a test positivo pa COVID-19.

Kuantu tempu mester tin entre e angua di buster i e angua di grip?

Bo por pasa e angua di grip, si por lo ménos 2 siman promé ku esei bo a pasa e angua di buster.

Mi ta biba na kas i mi no por bai e sentro di pasa angua. Mi por pasa angua kontra corona tòg?

Si, yama 0800 0900 pa un sita pa pasa angua kontra corona na kas.

E angua di buster tambe ta bini den e QR-code?

Si, ta posibel pa añadí bo angua di buster na e CoronaCheck-app.

Yama 0800 0900 pa pidi bo QR-code di papel.

Tene bo prueba di bakunashon i bo sédula of bo pasport na man.

Ku sita adelantá bo por buska bo kódigo di buster na Salubridat Públiko for di djaluna te ku djabièrnè entre 12:00 or i 13:00 or.

Bo no tin un QR-code ainda pa bo promé i di dos angua? E ora ei bo por pidi esaki mesora tambe.

Kiko ta un angua di buster

Un angua di buster kontra COVID-19 ta un angua èkstra pa oumentá protekshon di e anguanan kontra corona. Esaki ta nesesario pasobra protekshon di e anguanan kontra corona ta bira ménos despues di algun tempu..

E anguanan kontra corona ta protehá personanan ku a bakuná bon, di manera ku nan no ta bira gravemente malu ora nan pega ku e vírùs di corona

Kua bakuna nan ta usa na Boneiru pa e angua di buster?

E bakuna di pfizer. Na Boneiru nan ta usa Pfizer pa e promé i e di dos angua kontra corona.

Ta seif pa pasa e angua di buster di Pfizer, miéntras ku mi a pasa e anguanan kontra corona di un otro marka?

Si bo a pasa e anguanan kontra corona di AstraZeneca, Janssen òf Moderna, trankilamente bo por pasa e angua di buster di Pfizer.

Kua ta e kehonan ku mi por haña despues di e angua di buster?

E mesun kehonan ku bo por haña despues di e angua kontra corona tambe. Por ehèmpel kentura, doló di kabes, kansansio, doló di múskulo, doló di skarnir, kalafriu, walmentu di stoma i sakamentu. Bo por haña e keho akí dentro di un dia òf mas dia despues di e angua kontra corona.

Bo por mèldu e kehonan serka bo dòkter di kas.

Kiko ta e diferensia entre un buster i e di tres angua kontra corona pa hende ku resistensia abou?

Hende ku resistensia normal ta pasa e angua di buster despues di e di dos angua kontra corona. Pa e hendenan akí e angua di buster ta e di tres angua kontra corona. E angua di buster ta sòru pa un persona ku a bakuná haña èkstra protekshon atrobe.

Tin hende ku despues di e dos anguanan kontra corona, ainda no tin sufisiente antikuerpo den nan kurpa. Nan tin un enfermedat inmune grave, por ehèmpel pashènt di diálisis òf hende ku tabatin un transplante di órgano. Pa e motibu akí nan ta pasa un di tres angua kontra corona i despues di esei e angua di buster. Serka nan spesialista nan ta haña un karta pa e di tres angua kontra corona.

Ta nota e di tres angua pa nan komo e di tres angua kontra corona, no komo angua di buster. E hendenan den e grupo akí a pasa nan di tres angua kontra corona via nan spesialista, promé ku por a pasa e angua di buster na Boneiru.

Ken ta bini na remarke pa e di tres angua kontra corona?

E di tres angua kontra corona ta pa hende ku resistensia hopi abou, nan tin un malesa inmune serio. E hendenan akí mester di un di tres angua kontra corona pasobra e promé dos anguanan no ta duna sufisiente protekshon kontra e vírùs di corona.

Ta trata di hende ku ta bou di tratamentu di un spesialista pa un malesa spesial. Òf hende ku tin ku bebe sierto remedi.

Via nan spesialista e pashèntnan akí ta haña un karta pa bai pasa e di tres angua.

Pa hóben i hende grandi ku no ta bou di tratamentu di un spesialista, e dos anguanan ta duna sufisiente protekshon. E dos angunan ta sòru pa hende den e grupo akí no bira gravemente malu i resultá den hòspital. Instituto di Reino pa Salubridat Públiko i Medio Ambiente (RIVM) ta vigilá bon si e anguanan ta duna sufisiente protekshon. Si ta nesesario pa tur hende haña un di tres angua, ta anunsiá esaki na tempu. Pero no ta asina leu ainda.

Mucha di 5 te ku 11 aña

Kua muchanan di 5 te ku 11 aña por pasa angua kontra corona?

Mucha ku tin problema médiko. Ta trata di mucha ku ta gravemente malu i ta bou di tratamentu di dòkter di mucha. Nan ta kore riesgo grandi pa bira gravemente malu debí na COVID-19.

Mucha di 5-11 aña ku no ta kore riesgo, pero ku regularmente tin kontakto estrecho ku personanan vulnerabel, tambe por pasa angua kontra corona. Pensa por ehèmpel riba mucha ku ta biba den kas huntu ku nan wela i welo.

Dikon ta konsehá pa no pasa mucha salú di 5 te ku 11 aña angua kontra corona?

E muchanan akí tin un chèns chikitu pa bira gravemente malu debí na COVID-19.

Ta trata di un konseho. Ta posibel sí pa nan pasa angua, si nan mayornan/tutornan ke esaki.

Dikon mucha di 5 te ku 11 aña no tin mester di pasa angua kontra corona si nan tabatin COVID-19?

Nan a akumulá asina tantu resistensia ku nan ta bon protehá.

Kua bakuna mucha di 5 te ku 11 aña ta haña?

Nan ta haña e bakuna di Pfizer. Pero e kantidat ku mucha di 5 te ku 11 aña ta haña ta ménos.

Kuantu tempu mucha di 5 te ku 11 aña tin ku warda pa pasa angua kontra corona si nan tabatin COVID-19?

Por lo ménos 12 siman despues ku e mucha a tèst positivo pa COVID-19.

Si bo tabatin COVID-19 algun tempu pasá bo por haña mas efekto sekundario di un angua kontra corona. Pa e motibu akí mucha di 5 te ku 11 aña mester warda por lo ménos 12 siman.

Mucha di 5 te ku 11 aña ta pasa angua di buster?

Nò, nan no ta pasa angua di buster. E angua di buster ta pa hende di 12 aña bai ariba. E angua di buster ta importante pa hende di 18 aña bai ariba. Serka e grupo akí e protekshon ta bira ménos despues di algun luna. Mester oumentá nan resistensia ku un angua di buster.

Kua ta e efektonan sekundario serka mucha di 5 te ku 11 aña?

E efektonan sekundario di e angua kontra corona serka mucha ta meskos ku serka adulto.
Ta e mesun efektonan sekundario ku serka otro bakunashonnan. Ta trata e ora ei di por ehèmpel doló òf un pèshi kòrá chikitu kaminda ku bo a pasa angua. Bo por haña molèster di kansansio, doló di kabes, doló di múskulo òf kalafriu tambe. Algun dia despues ku nan a pasa angua mayoria hende no tin molèster mas di efekto sekundario.

Kuantu tempu mester tin entre e promé i e di dos angua serka mucha di 5 te ku 11 aña?

Serka mucha vulnerabel ku ta bou di tratamentu serka dòkter di mucha: minimalmente 4 siman i maksimalmente 8 siman.

Serka tur otro mucha di 5 te ku 11 aña : minimalmente 8 siman i maksimalmente 12 siman.

Siguridat di bakuna

Ta seif pa laga nan bakuná mi?

Sí. Ta te ora ku ta sigur ku e ta seif i ta duna resultado, un bakuna ta subi merkado.

Promé ku un bakuna subi merkado, ta hasi masha hopi investigashon.. P’esei ta tèst bakuna riba hopi hende promé i durante investigashon. Ta hasi esaki pa ta sigur ku hende no ta haña keho despues di bakuná. E Agensia Oropeo di Remedi (European Medicines Agency – EMA) mester aprobá e bakunanan promé ku nan subi merkado oropeo.

Mi por tuma e bakuna siendo ku mi ta tuma píldora antikonseptivo?

Sí, esei por. Bakuna no tin influensia riba funshonamentu di píldora antikonseptivo. Ta asina tambe ku píldora antikonseptivo no ta influensiá efekto di e bakuna.

Mi ta na estado. Mi mester laga bakuná mi mes?

Si bo na estado, bo tin un chèns mas grandi pa bira gravemente malu di e vírùs di corona, kompará ku hende muhé ku no ta na estado. Esaki por tin konsekuensia pa mama i pa yu. P’esei hende muhé na estado ta haña konseho pa laga bakuná nan mes.

Konsultá ku bo dòkter di kas òf bo ginekólogo si bakunashon ta e mihó eskoho pa bo tambe.

Si mi ke sali na estado, mi por pasa angua kontra COVID-19?

Sí bo por. E bakunashon no tin influensia riba bo fertilidat òf riba e plasenta. Esaki a resultá for di investigashon ku tur fabrikante di bakuna a hasi.

Bo ta hasiendo FIV (fertilisashon in vitro) Konsultá ku e persona ku ta duna bo tratamentu di FIV si bo por pasa angua.

Funshonamentu di bakuna

Pakiko mi lo laga nan bakuná mi?

Un hende ku ta laga nan bakun’é ta protehá su mes kontra e vírùs di corona. E chèns pa bira gravemente malu ta mas chikitu. Bo ta protehá tambe hende vulnerabel rònt di bo. Si bo ta bakuná, bo tin ménos chèns pa pega ku e vírùs.

Si tin hopi hende bakuná, lo tin ménos hende ku ta bira gravemente malu. Asina nos ta tene preshon riba kuido abou.

E bakuna ta duna resultado serka un vershon nobo, kambiá di e vírùs?

Sí, e bakuna ta duna resultado e ora ei tambe. Ta normal ku un vírùs ta kambia. Esaki no ta nifiká mesora ku e bakuna no ta duna resultado mas, pasobra ta trata di kambionan chikitu den e vírùs. Mundialmente paisnan ta vigilá bon si e bakunashon ta protehá kontra formanan nobo, kambiá di e vírùs. Informashon ku sientífikonan tin aktualmente, ta ku bakunashon ta protehá tambe kontra vershonnan nobo, kambiá di e vírùs di corona ku tin awor aki.

Tin chèns pa keho despues di pasa angua kontra e vírùs di corona?

Serka mayoria bakuna hende por haña molèster leve di keho despues, ta yama esaki efekto sekundario. Ta trata di doló òf un bòlòbònchi kòrá chikitu kaminda bo a pasa angua. Bo por haña molèster tambe di kansansio, doló di kabes, doló di múskulo, kayente di kurpa òf kalafriu. Un par di dia despues di a pasa angua mayoria hende no tin keho mas.

Bo ta gravemente malu, bo no por ku sierto remedinan òf bo ta na estado? Papia tokante esaki ku bo dòkter di kas, òf ku e tim di Salubridat Públiko pa wak si bo tin mag di bakuná.

E bakuna kontra COVID ta hasi bo ménos fértil?

A tèst e bakuna ampliamente riba hende muhé i hende hòmber. E  investigashonnan ta indiká ku e bakuna no tin ningun influensia riba fertilidat di hòmber i muhé.

E bakuna ta influensiá gana di tin sèks serka hende hòmber?

No tin prueba ku e bakuna ta afektá gana di hende hòmber pa nan tin sèks.