.

Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Kompartí e página aki

Q&A’s

Di Entidat Públiko Boneiru a formulá e informashon aki, den koperashon ku departamentu di Salú Públiko i otro interesadonan. Kontinuamente ta aktualisá e lista aki.

Nos ta publiká e bista general aki mas aktualisá posibel. E desaroyonan rònt di COVID-19 ta impredisibel i pa e motibu ei kondishonnan i sirkunstansianan por kambia kada momentu. Nos ta konsehá bo pa wak ki ora tin komunikado di prensa di Entidat Públiko Boneiru riba nos página di Facebook (Gobièrnu di Boneiru) i den medionan di komunikashon di Boneiru.

No por derivá ningun derecho for di e informashon den e bista general di preguntanan mas tantu hasí i nan kontesta (FAQ) aki.  

Kas

Te ku fin di sèptèmber no por organisá, ni asistí na niun evento. Mi no por bai un kasamentu tampoko pa kua mi a haña invitashon?ERÁ KOMO RIESGO ABOU PA COVID-19?

Den e Ordenansa di Emergensia ku ta na vigor te 30 di sèptèmber nan ta hasi un eksepshon pa kasamentu, basta ku no tin mas ku 10 persona presente i e presentenan na tur momentu por mantené 1,5 meter di distansia for di e persona mas serka di nan. Pa mas eksepshon wak artíkulo 7 di e Ordenansa di Emergensia di 21 di sèptèmber 2020.

https://www.bonairecrisis.com/wp-content/uploads/2020/09/20200921-Noodverordening-21-09-2020-2020003327.pdf?fbclid=IwAR2P2vjGvQWzXIZln4FEUfscl98aR49bIGVvVr1LRK5DhAB-PFqUWNGbFb8

Empresa

Kuantu kliente por ta presente den mi minimarket òf supermarket?

Bo por sali for di e punto di bista ku kada kliente tin mester di mas òf ménos 10 m² di e superfisie bruto di flur di bo negoshi. Bo negoshi ta 10 meter hanchu i 15 meter bai aden. E superfisie di flur ta 150 m². E ora ei maksimalmente 15 kliente por ta presente den bo negoshi.

Mi ta responsabel pa e manera ku mi klientenan ta komportá nan mes den mi negoshi?

E punto di salida ta ku bo ta tuma bo medidanan di tal sistema, ku bo klientenan por/mester komportá nan mes na un manera ‘COVID-proof’.

Skol i instansia

HENDENAN KU TA BIAHA PA BONEIRU

KUA TA E KONDISHONNAN PA POR BIAHA PA BONEIRU?

Bo por biaha pa Boneiru si bo:

  • tur persona, di 13 aña bai ariba, ku ta bini Bonaire ta obligá, riba propio gastu, pa bai 14 dia den karentena. Si e persona por demonstrá ku el a hasi un PCR-tèst di COVID-19 no mas bieu ku 72 ora promé ku e orario di biahe i e resultado ta negativo, no mester bai den karentena. Esaki ta konta solamente pa persona ku ta biaha fo’i Oropa.
  • ta obligá pa yena un deklarashon di salú via www.bonairepublichealth.org.
  • a permanesá minimalmente 14 dia konsekutivo den un pais di riesgo abou pa COVID-19 (na e momentunan aki esakinan ta Saba, Hulanda, Alemania, Fransia, Bèlgika i Suisa).
  • na momentu di salida di e pais bo no tin keho ku ta kuadra ku COVID-10 (fèrkout di nanishi, doló di garganta, tosamentu, nistermentu, pèrdida di holó i sabor, kayente di kurpa, kentura).
  • e último 14 dia bo no tabatin kontakto direkto ku un pashènt di COVID-19 konfirmá.

Banda di esaki Boneiru ta konsehá tur hende ku tin 13 aña òf mas, i ku ke biaha pa Boneiru, pa pasa un tèst di PCR pa COVID-19. Na momentu ku e persona ta sali pa Boneiru resultado di e tèst aki no mester ta mas bieu ku 72 ora. Resultado di e tèst mester ta negativo. Pa biahamentu dentro di e ‘air-bubble’ esaki no ta nesesario.

Banda di esei Boneiru ta konsehá hendenan ku ta biaha pa Boneiru pa kontrolá si nan ta sigurá pa gastunan di malesa durante nan estadia na Boneiru, i si esaki no ta e kaso, sera un seguro di biahe pa esaki.

DIKON MI TIN KU SERA UN SEGURO DI BIAHE?

Gastunan médiko ku un biahero hasi na Boneiru ta pa su propio kuenta, gastunan relashoná ku COVID-19 tambe. Biaheronan mes ta responsabel pa sera un seguro di biahe.

Tuma kontakto ku bo kompania di seguro pa averiguá si nan ta kubri gastunan ku bo a hasi pa kuido médiko na Boneiru.

KUA TA E REGLANAN PA PASAHERONAN KU DEN TRÁNSITO TA BAHA KU NAN AVION NA BONEIRU?

Tanten ku e pasahero por keda na bordo di e avion, e reglanan di e destinashon final ta vigente. Si e tránsito ta dura mas tantu i ta pidi e pasaheronan pa baha for di avion i sinta den sala di embarke te ora di salida pa e siguiente destinashon, e reglanan di aeropuerto ta vigente (wak e protokól di Flamingo Internashonal Airport). Den kaso ku, debí na sirkunstansianan imprevisto, tòg bo tin ku keda Boneiru, e ora ei e reglanan ta vigente manera nan ta pa biaheronan ku a bini Boneiru for di áreanan ku no ta seif: e ora ei departamentu di Salú Públiko lo informá bo tokante esei. Durante e biahe naturalmente e reglanan di higiena di e kompania di aviashon ta vigente. 

NA UNDA MI POR HAÑA E DEKLARASHON DI SALÚ I KON I NA UNDA MI TIN KU ENTREGÁ ESAKI?

Bo por yena e deklarashon di salú ‘online’ via https://bonairepublichealth.org/en/form. Despues ku bo a yena esaki, bo ta risibí un imeil ku e formulario ku bo a yena i un karta di bon biní den kua bo ta haña e informashonnan mas importante relashoná ku COVID-19 pa durante bo estadia na Boneiru. Si nan ta haña esaki nesesario, departamentu di Salú Públiko lo tuma kontaktó ku bo promé ku bo biaha.

Bo tin ku prent e formulario ku bo a yena òf warda un kopia digital den bo telefon, tèblet òf kòmpiuter. Un empleado di departamentu di Salú Públiko por pidi bo pa mustra esaki.

Nan ta tèst mi na aeropuerto di boneiru?

Nò. No por tèst na aeropuerto di Bonaire. Den kaso ku departamentu di Salú Públiko ta haña ku ta nesesario ku na momentu di yegada bo tin ku pasa un tèst, e ora ei na e momentu ei nan lo determiná na unda lo hasi e tèst.

COVID-19 TÈST I MANEHO DI TÈST

kUA TA E MANEHO DI TÈST PA COVID-19 SI BO TA PERMANESÉ ÒF TA BIBA NA BONEIRU?

Serka tur persona ku e siguiente kehonan:

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Pèrdida diripiente di holó òf sabor

por mèldu nan mes i den mayoria kaso lo hasi un tèst di PCR pa COVID-19 ku nan. Tur hende ku tin keho respiratorio mester isolá nan mes te ora ku resultado di e tèst drenta. 

Na momentu ku bo tin e kehonan aki, bo ta tuma kontakto ku 0800-0800, òf ku un dòkter di kas na Boneiru.

KIKO E TÈST DI COVID-19 PROMÉ KU BIAHA PA BONEIRU MESTER KUMPLI KUNÉ?

Ta konsehá biaheronan fo’í Oropa ku ta drenta Boneiru i ku tin 13 aña òf mas pa laga hasi un PCR-tèst di COVID-19, 72 ora promé ku nan biaha. Esaki si nan no kier bai 14 dia den karentena.

E tèst aki mester kumpli minimalmente ku e siguiente kondishonnan:    

  • Solamente resultado di un tèst di PCR ta bálido. Pa e tèst aki ta hasi un sitologia (uitstrijkje) di nanishi i garganta ku un ‘q-tips’.
  • Un laboratorio akreditá mester hasi e tèst.
  • Resultado di e tèst no mag di ta mas bieu ku 72 ora na momentu di yegada na Boneiru.

NA UNDA MI POR LAGA HASI UN TÈST DI PCR pa COVID-19 NA HULANDA?

Aktualmente vários partido ta ofresé un tèst di PCR pa hendenan ku ta bai biaha. Aki bou ta sigui algun ehèmpel:  

  • KLM health services
  • Het Huisartslab
  • Saltro laboratorium

MI TA OBLIGÁ PA LAGA HASI UN TÈST DI PCR ORA MI TA BIAHA PA BONEIRU?

Ta obligatorio pa un hende ku ta bai biaha fo’i Oropa pa e laga hasi un tèst di PCR 72 ora promé ku e biaha. Sin resultado negativo di PCR-tèst, e biahero ta obligá pa bai den karentena riba propio gastu na un sitio ku gobièrnu ta apuntá. Esaki relashoná ku e karakter di eskala chikitu di e isla i disponibilidat di fasilidat di kuido den region.  

Den e deklarashon di salú nan ta puntra bo si bo a laga hasi un tèst di PCR dentro di 72 ora promé ku salida, i kiko e resultado tabata.

Mi a lesa ku tèst komersial por tèst positivamente tambe si 3 luna pasá bo tabatin corona. esei ta kuadra?

Boneiru ta aseptá solamente resultado di tèst ku nan a ehekutá den un laboratorio akreditá. Ku esaki e chèns ku nan ta duna un resultado positivo inbálido ta mas chikitu posibel. Den e kaso ku tin un resultado positivo di e tèst di PCR, promé ku biaha pa Boneiru, e ora ei tuma kontakto ku bo dòkter òf e outoridat di salú den bo pais, i sigui nan instrukshonnan mas aleu.

KUA NUMBER MI POR YAMA ORA KU MI TIN KEHO RELASHONÁ KU COVID-19 I KIKO TA PASA E ORA EI?

Ora bo tin e siguiente kehonan:

  • Fèrkout di nanishi
  • Nanishi ku ta kore
  • Nistermentu
  • Doló di garganta
  • Tosamentu
  • Sinti benout
  • Kayente di kurpa
  • Kentura
  • Pèrdida diripiente di holó i sabor

bo tin ku tuma kontakto ku departamentu di Salú Públiko via number di telefon 0800 – 0800. Sigui e instrukshonnan ku bo ta haña einan. Si nan por konfirmá bo kehonan, nan lo regla ku bo ta bai hasi tèst pa COVID-19. Ta importante pa bo isolá bo mes si bo tin keho respiratorio. Esaki ta enserá ku bo ta keda kas, no ta risibí bishita i ta limitá kontakto ku bo hendenan di kas te na un mínimo.   

Pregunta tokante riesgo pa pega ku e vírùs di corona.

KON GRANDI E RIESGO TA KU UN HENDE TA BINI BONEIRU KU INFEKSHON, KU E MEDIDANAN KU A TUMA?

A base di e situashon epidemiológiko di un pais òf estado for di kua biaheronan ta bini, por hasi un kalkulashon di e riesgo di introdukshon di COVID-19 den e pais di destinashon. For di paisnan kaminda e prevalensia (prevenshon di e vírùs) ta haltu, e chèns pa haña un turista ku COVID-19 naturalmente ta mas haltu ku for di un pais kaminda e prevalensia ta abou.

Pa laga e chèns ku un hende ku ta infektá ku COVID-19 ta mas abou posibel, ta tuma e siguiente pasonan:     

  • ta apuntá un kantidat limitá di pais ku un prevalensia abou pa COVID-19, for di kua bo por biaha pa Boneiru,
  • kada biahero ta obligá pa yena un deklarashon di salú via www.bonairepublichealth.org,

biaheronan fo’i Oropa di 13 aña òf mas por laga hasi un tèst di PCR di COVID-19, maksimalmente 72 ora promé ku biaha pa asina no bai den karentena ora yega Bonaire. 

E medidanan aki ta sòru ku e riesgo ku un hende infektá ta bini Boneiru, ta aseptabel den relashon ku kapasidat di kuido na Boneiru.

KON GRANDI E CHÈNS TA KU BO TA INFEKTÁ KU COVID-19 SI BO TIN SÍNTOMA?

Na e momentunan aki mas ku 3% di hendenan for di Hulanda ku tin síntoma ku lo por ta un indikashon di un infekshon ku COVID-19, ta tèst positivo pa COVID-19. Nos ta mira ku na e momentunan aki na Hulanda i e paisnan alrededor e sifranan aki ta subi: nos ta vigilá e situashon aki minusiosamente.

MI TABATIN KONTAKTO KU UN HENDE KU A TÈST POSITIVAMENTE. KIKO MI TIN KU HASI?

Si pa mas ku 15 minüt bo tabata dentro di 1.5 meter for di e persona aki, ta bon pa bo keda kas i yama 0 800 – 0 800 pa konseho. 

Si bo tabata ménos ku 15 minüt dentro di 1.5 meter for di e persona aki, e ora ei yama 0 800 – 0 800 pa konseho.

KARENTENA I ISOLASHON RELASHONÁ KU covid-19

KI ORA BO TIN KU BAI DEN KARENTENA SENTRAL I KI ORA BO POR BAI DEN KARENTENA NA KAS?

Biaheronan ku ta bini for di paisnan ku un riesgo abou pa COVID-19, no tin keho i no tin otro partikularidat mas aleu, no tin mester di bai den karentena ora nan yega Boneiru.

E siguiente personanan mester bai den karentena:

  • Biaheronan ku maksimalmente 14 dia promé ku nan biaha pa Boneiru a permanesé na un pais di riesgo haltu, mester bai direktamente den karentena ora nan yega Boneiru na un sitio sentral di karentena i e gastunan ta pa e biahero. Biaheronan ku ta biaha for di Aruba, Kòrsou, Sint Eustatius òf Sint Maarten pa Boneiru por bai te 14 dia despues di nan yegada na Boneiru den karentena na kas, si e sirkunstansianan ta pèrmití esei. Si esei no ta posibel, nan tambe mester bai den karentena na un sitio di karentena sentral.
  • Tambe bo tin ku bai den karentena si un persona ku ta biba den mes kas ku bo of un hende ku bo tabata den kontakto personal direkto kuné, a tèst positivo pa COVID-19. E karentena aki ta tuma lugá den bo propio kas (di vakansi), kamber di hotèl òf na un sitio di karentena indiká, dependiente di e motibu di e karentena i e sirkunstansianan na bo propio adrès (di vakansi). Departamentu di Salú Públiko lo informá bo tokante e sitio kaminda bo tin ku bai den karentena, i e reglanan ku bo mester tene bo mes na nan. 

Den koperashon ku doñonan di hotèl na Boneiru a indiká un hotèl ku ta sirbi komo karentena sentral.

Ta importante pa hendenan ku ta biaha pa Boneiru sa ku e gastunan di karentena ta pa nan propio kuenta.

KI ORA BO TIN KU BAI DEN ISOLASHON I BO POR BAI DEN ISOLASHON NA KAS ÒF NA BO Adrès DI VAKASHON?

Si bo tin keho ku ta kuadra ku COVID-19, ta pidi bo pa keda paden, limitá kontakto ku hendenan di kas te na un mínimo i no risibí bishita. Esaki nos ta yama isolashon. Tuma kontakto ku departamentu di Salú Públiko di Boneiru na 0800 – 0800 relashoná ku hasimentu di un tèst di PCR.

Isolashon ta tuma lugá den e kas di vakashon, kamber di hotèl, den propio kas òf na un sitio di isolashon indiká si e situashon na e adrès di vakashon no ta adekuá pa isolashon.  Den koperashon ku doñonan di hotèl na Boneiru a indiká un hotèl ku ta sirbi komo sitio di isolashon sentral. 

E gastunan di esaki ta pa kuenta di e persona ku nan a pone den isolashon, si bo no ta habitante di Boneiru. ZVK ta kubri e gastunan aki pa habitantenan di Boneiru ku ta sigurá via ZVK.

KEN TA PAGA E GASTUNAN SI MI TA KONTAGIÁ KU COVID-19 ÒF MESTER BAI DEN KARENTENA?

Si nan imponé un medida di karentena riba bo, bo mes ta responsabel pa e gastunan ku ta embolbí ku esei.

Si nan pone bo den isolashon, e ora ei esei ta gastu di malesa: si bo seguro di gastu di malesa ta kubri esei ta dependé di e kondishonnan di bo kompania di seguro di malesa. Pa habitantenan di Boneiru ku ta sigurá via ZVK, ZVK ta kubri e gastunan di isolashon. Pa otronan ta akonsehabel pa kontrolá bon serka bo kompania di seguro kua ta e gastunan ku nan ta kubri.

HENDENAN KU TA BIAHA SALIENDO FOR DI BONEIRU

kUA TA E KONDISHONNAN PA BIAHA FOR DI BONEIRU?

E  kondishonnan pa baiha pa destinashonnan saliendo for di Boneiru ta kai bou di responsabilidat di bo destinashon. Wak e kondishonnan pa e pais di destinashon riba https://www.nederlandwereldwijd.nl/reizen, 

òf tuma kontakto ku e kompania di aviashon ku bo ta biaha kuné, òf bo agente di biahe, òf wak riba un wèpsait di e pais di destinashon.

Ora ku bo ta biaha saliendo for di Flamingo Bonaire International Airport, bo tin ku tene bo mes na instrukshonnan di aeropuerto. Esakinan bo por haña aki:  http://www.bonaireinternationalairport.com/wp-content/uploads/2020/06/PROTOCOL-BIA-COVID-19-Versie-3-22-6-2020-def.pdf.

Komportashon i prevenshon

KUA TA E REGLANAN DI KOMPORTASHON KU TUR HENDE NA BONEIRU MESTER KUMPLI KUNÉ?

Tur hende na Boneiru, habitantenan i bishitantenan, mester kumpli ku e siguiente reglanan di komportashon i higiena:  

  • Mantené 1,5 meter di distansia for di personanan ku no ta forma parti di bo hendenan di kas.
  • Regularmente laba bo mannan ku awa i habon: usa produkto pa desinfektá man solamente ora no tin awa i habon disponibel.
  • No pone bo mannan na bo kara.
  • No duna otro hende man.
  • Tosa òf nister den bo èlebog.
  • Usa lensu di papel, tira esaki afó despues di uso.
  • Keda kas (no bai traha, no bai skol, no bai kaya pa por ehèmpel hasi kompra) ora bo tin ku kontestá positivamente riba un di e siguiente preguntanan:
    • Durante e último 24 ora òf na e momentu aki bo tin un òf mas di e siguiente kehonan: fèrkout di nanishi, nanishi ku ta kore, nistermentu, doló di garganta, tosamentu leve, sinti benout, kayente di kurpa, kentura i/òf pèrdida diripiente di holó òf sabor?
    • Bo tabatin e vírùs di corona nobo (determiná ku un tèst di laboratorio) i a determiná esaki den e último 7 dianan? 
    • Tin hende di kas ku e vírùs di corona nobo (determiná ku un tèst di laboratorio) i den ménos ku 14 dia bo tabatin kontakto ku e hende di kas aki, miéntras ku ainda e tabatin keho?
    • Bo ta den karentena na kas, pasobra bo tabatin kontakto direkto ku un persona serka kende nan a determiná e vírùs di corona nobo?
    • Si durante e último 14 dia bo a biaha pa paisnan ku no ta Kòrsou-Saba-St. Eustatius, Hulanda, Alemania, Fransia, Bélgika i Suisa.

KI ORA MI TIN KU BISTI UN TAPABOKA (mondkapje)?

Na Boneiru bo tin ku bisti un tapaboka (mondkapje) ora no ta posibel pa mantené un distansia di 1,5 meter for di otronan, ku no ta forma parti direkto di bo hendenan di kas. Banda di esei semper bo tin ku bisti un tapaboka (mondkapje) ora ku bo yega Boneiru òf ora bo ta sali for di Boneiru na Flamingo Bonaire International Airport i durante bo transporte pa bo adrès di vakashon.

PREGUNTA GENERAL

DIKON NA BONEIRU OTRO REGLA TA VIGENTE KU NA KÒRSOU I/ÒF ARUBA?

Kada isla ta stipulá su propio instrukshonnan pa por drenta e isla, di manera ku esakinan ta konektá mas mihó posibel ku e situashon lokal i di manera ku nan ta kuadra ku kompetensianan di gobièrnu di e islanan.

Kontinuamente ekspertonan i trahadónan di maneho di e 6 islanan ta den konsulta ku otro i tambe ku Hulanda tokante e instrukshonnan pa drenta e islanan. Mas tantu posibel ta sinkronisá e reglanan ku otro, pero esei no tur ora ta posibel.

AKTUALMENTE TIN UN ORDENANSA DI EMERGENSIA APLIKABEL NA BONEIRU?

Na e momentunan aki e ordenansa di emergensia di 9 sèptèmber 2020 ta na vigor. Den esaki a fiha e kondishonnan a base di kua por duna biaheronan akseso na Boneiru, i e medidanan di karentena ku ta na vigor. E informashon den e vershon di FAQ (preguntanan mas tantu hasí i nan kontesta) aki ta den liña ku esaki.

A BASE DI KIKO TA KONSIDERÁ KU UN PAIS TA ‘SEIF’ ÒF ‘DI RIESGO HALTU’?

Kada dos siman a  base di konsehonan di RIVM ta pone den balansa kua ta e paisnan ku mester konsiderá komo seif i kua ta e paisnan ku mester konsiderá komo di riesgo haltu, den relashon ku kapasidat di kuido di salú di e isla.

KON BON KAPASIDAT DI KUIDO TA NA ÒRDU NA BONEIRU?

Boneiru huntu ku dòkternan di kas, hòspital, salú públiko, laboratorionan i Entidat Públiko Boneiru na fin di yüni a kontrolá tur aspekto di kuido relashoná ku COVID-19. Por ehèmpel a wak maneho di tèst, investigashon di fuente i kontakto, maneho di karentena i isolashon i kuido agudo / médiko. Riba tur e puntonan aki a konkluí ku en prinsipio nan ta sufisientemente organisá, di manera ku por spera ku konfiansa riba fleksibilisashon di e medidanan.

KUA TA E PROTOKÒLNAN KU AKTUALMENTE TA VIGENTE?

A  base di konseho di RIVM, Boneiru a formulá algun regla di komportashon i medida pa entrada na Boneiru. A base di esakinan den koperashon estrecho ku departemantu di Salú Públiko a formulá e siguiente protokòlnan:   

Por haña e protokòlnan aki komo anekso serka e Roadmap Bonaire COVID-19.

Banda di esei organisashonnan individual i empresanan a formulá nan propio protokòlnan: tokante esaki nan ta komuniká via nan propio kanalnan.

Kuantu tempu informashon di turista mester keda wardá?

Pa investigashon di fuente i kontakto ta importante ku maksimalmente 14 dia despues ku e bandoná Boneiru ainda por aserká un turista den kaso ku konstatá kontagio ku COVID-19 serka un hende ku kende e turista aki posibelmente tabata den kontakto. Pa e motibu aki departamentu di Salú Públiko ta warda informashon i kontakto di bishitantenan di Boneiru te 14 dia despues ku nan bandoná nos isla. 

Nos hotèlnan, ‘resort’-nan i transportadónan di turista ta traha ku un diario (logboek) den kua nan ta nota tur posibel momentu di kontakto ku i entre e turistanan. Esaki tambe mester keda wardá te 14 dia despues ku e turista bandoná nos isla.

NOS TA BAI DIREKTAMENTE DEN ‘LOCKDOWN’ ATROBE SI BINI OTRO INFEKSHON?

Pa Boneiru tambe un posibel konstatashon di infekshon ku COVID-19 ta un realidat. Boneiru a traha duru riba ampliashon di kapasidat di kuido, di manera ku nos ta bon prepará pa un posibel kaso di infekshon den futuro i nos no tin mester di bai direktamente den ‘lockdown’ ora un kaso di infekshon presentá su mes.

Dependiente di e situashon lo wak si tin mester di medida i kua medida ta nesesario pa protehá poblashon di Boneiru kontra un brote di infekshon ku COVID-19. Pa esaki a elaborá vários senario. E ora ei den esaki no solamente ta tuma e situashon di Boneiru na konsiderashon na e momentu ei, pero tambe esun di e paisnan for di kua hendenan por biaha pa Boneiru.

KIKO TA BIRA E PERIODO ENTRE ANUNSIO DI UN PROHIBISHON PA BULA SI ESAKI TA NESESARIO I MI POR BIN KAS BÈK AINDA E ORA EI?

Si ta nesesario pa bini ku un prohibishon pa bula (limitá), no por duna garantia ku ainda bo por bin kas bèk, si bo ta biba na Boneiru. Den práktika semper tin un periodo promé ku realisashon di un prohibishon pa bula. Bo lo por usa e periodo ei pa regresá Boneiru, pero pa esaki tampoko no por duna garantia.

Por lo demas bo tin ku tene kuenta tambe ku e situashon den e paisnan pa kua bo ta biaha: por sierto nan tambe por pone un paro na tur tráfiko aéreo. Den e kaso ei tampoko no ta duna garantia ku bo por bin Boneiru bèk.

KON TA KONTROLÁ KU MAKSIMALMENTE 1000 PASAHERO TA DRENTA BONEIRU PA SIMAN?

Esaki ta tuma lugá pa medio di monitoriá e buelonan ku ta drenta na Boneiru. Por ampliá òf redusí e kantidat di pasahero, kaminda e relashon entre e kantidat di posibel infekshon i kapasidat di kuido di salú di Boneiru lo ta e punto di salida.

KON NOS TA BAI ANDA AWORÓ KU PASAHERONAN KRUSERO ORA KU BARKUNAN KRUSERO BOLBE KUMINSÁ MARA NA BONEIRU?

Por lo pronto no ta konosí ki dia barkunan krusero ta bolbe bin Boneiru. Asina ku esaki bira konosí, gobièrnu lo pone e riesgonan di infekshon ku COVID-19 ku ta akompañá esaki, den kombinashon ku kapasidat di kuido di salú na Boneiru, den balansa i preskribí medidanan adekuá. Na e momentunan aki e medidanan di komportashon ta vigente pa tur hende na Boneiru, tantu habitantenan komo bishitantenan, i por lo tantu pa bishitantenan tambe ku ta yega aki ku barku.