Kon e situashon aktual di siguridat ta pa Boneiru, ku bista riba e tenshonnan entre Merka i Venezuela?
Na e momentu akí e tenshon den region no ta forma un menasa direkto pa e islanan ABC. Defensa i Asuntunan di Eksterior ta tene e situashon minusiosamente na bista i nan ta tene nos i e otro partinan di Reino bon na altura di esaki. Reino Hulandes no ta enbolbí den e operashon Southern Spear dirigí nashonalmente di Merka.
Ta seif pa biaha pa Boneiru?
Ta seif pa biaha pa Boneiru. E konseho di biahe pa Boneiru ta indiká e koló bèrdè. Ministerio di Asuntunan di Eksterior huntu ku Ministerio di Defensa ta monitoreá e situashon kontinuamente i minusiosamente. Por haña e konseho di biahe riba https://www.nederlandwereldwijd.nl/reisadvies
Kiko ròl di Defensa ta pa Boneiru?
Defensa ta responsabel pa defendé teritorio di Reino Hulandes, pues teritorio di Boneiru tambe. Banda di esaki Defensa por duna sosten na outoridatnan lokal pa medio di asistensia militar.
Kon e kolaborashon entre Boneiru i Hulanda Oropeo tokante siguridat regional ta kana?
Tin kontakto direkto i regular entre Boneiru i e ministerionan enbolbí. E partnernan akí kontinuamente ta monitoreá e situashon i si ta nesesario nan ta deliberá tokante medidanan adishonal pa siguridat di e region.
Kon habitantenan ta haña informashon den kaso di un krísis òf menasa?
Ta informá habitantenan via e medionan regular di komunikashon den kaso di un krísis òf menasa. Entidat Públiko Boneiru ta komuniká via su kanalnan di medionan sosial. Den situashonnan di emergensia, Entidat Públiko Boneiru ta komuniká via e wèpsait Bonairecrisis.com i nan por disidí pa organisá un konferensia di prensa.
Kiko mi mes por hasi?
Keda trankil i sigui informashon via e kanalnan ofisial. No plama notisia falsu òf spekulashon. Esaki por kondusí na pániko innesesario. Meskos ku den temporada di orkan, sea prepará pa por ehèmpel interupshon di sierto fasilidatnan. Manera ta konosí, sòru pa bo tin sufisiente kuminda (di bleki) i awa na kas pa por lo ménos 72 ora.
Dikon tin barku di marina ta nabegá mas tantu biaha banda di kosta di Boneiru?
Ku e desaroyonan den región, e barku di stashon di Defensa Área Karibense aktualmente ta nabegá mas tantu biaha rònt di e islanan ABC pa monitoreá e situashon di siguridat. Pa e motibu akí e chèns ta grandi ku bo ta mira e barku nabegá mas tantu biaha banda di Boneiru. E monitoreo ta enserá entre otro konstrukshon i mantenshon di un imágen aktual di e situashon rònt di e islanan ABC. A base di esaki ta resultá aktualmente ku e tenshonnan den region na e momentu akí no ta forma un menasa direkto den direkshon di e islanan ABC.