.

Lesa den e idioma ku bo ta desea?

Lo bo ke lesa e informashon tras di e lenk riba e pagina tokante konseho estilo di biba na e idioma di eskoho? Nos ta rekomenda pa hasi uso di Google Chrone-browser. Na final di e adrès di wèpsait, por mira e figura Chrome translate icon. Atraves di esaki por skohe e idioma di eskoho pa por mira e pagina. Tene na kuenta ku e numbernan di telefon ku ta aparesé riba e wèpsait ta number di Hulanda.

Download Google Chrome

Konseho pa estilo di bida

E vírùs di corona (COVID-19) tin impakto riba nos bida diario. Pa prevení plamamentu di e vírùs di corona, nos ta evitá sitionan kaminda tin hopi hende riba otro, nos ta tene 1,5 meter di distansia, nos ta keda kas ora nos tin keho di fèrkout i si ta nesesario nos ta traha mas tantu posibel na kas. Kon nos ta mantené un estilo di bida salú den tempu di corona? 

Biba salú ta mantené bo resistensia na nivel. Bo ta bira malu asina lihé i bo ta mihó protehá kontra bakteria i vírùs ku ta hasi hende malu, manera e vírùs di corona. I si bo bira malu tòg, mayoria biaha bo ta rekuperá mas rápido. Biba salú no mester ta kompliká. Ku pasonan chikitu ya kaba bo ta hasi un diferensia. 

Tin konseho pa estilo di bida tokante:

Salú mental

E krísis di corona por influensiá bo salú mental. Bo por ta sinti bo angustiá òf tristu, eksperensiá strès òf desaroyá otro tipo di keho. E konsehonan aki bou ta yuda bo pa duna atenshon èkstra na bo bienestar mental durante e periodo aki.

Kuida bo mes bon. Hasi loke bo mes por hasi i hasi uso di e yudansa ku bo por haña.

Konseho pa na kas
Ta posibel ku komo konsekuensia di e vírùs di corona bo yunan no ta bai skol, bo no por bai bo trabou òf ku bo tin ku traha na kas. Banda di esei tin hende ku tin un salú vulnerabel ku awor akí mas ku ántes ta keda kas.

Konseho tokante salú mental pa mucha, hóben, adulto i hende grandi:

1. Sóru pa mantené un struktura den bo orario diario

Purba pa mas tantu posibel mantené bo struktura diario nòrmal. Esaki bo ta hasi pa medio di lanta, bai drumi i kome  na e mésun oranan ku promé ku e krísis di corona. Plania tambe diferente aktividat pa kada dia pa trese e variashon nesesario. 

Pa mas informashon tokante struktura, wak riba:

2. Sòru pa sufisiente distraishon

Minimalmente un ora pa dia hasi algu pa bo mes ku bo ta saka energia for di dje. Keda enfoká riba e parti positivo tambe: skirbi tur dia tres kos positivo ku bo a eksperensiá, hasi òf mira.

Pa mas informashon tokante distraishon wak riba:

3. Evitá ku bo ta sinta ketu hopi

Bo ta traha (prinsipalmente) na kas? E ora ei interkambiá bo trabou ku sufisiente pousa. Tuma por ehèmpel un pousa mediante un aktividat kòrtiku di moveshon òf sali kana. Moveshon tin un efekto positivo riba bo konsentrashon.

Pa mas informashon tokante kon evitá ku bo ta keda sinta ketu, wak riba:

4. Purba drumi sufisientemente

No hasi uso di pantaya (skrin di televishon, kòmpiuter, tèblet òf telefon) djis promé ku bo bai drumi. Si bo ripará ku bo ta kai den strès pa motibu di notisia tokante e vírùs di corona, e ora ei no buska esei pa medio di wak televishon den bo kamber di drumi. Si bo drumi sufisientemente, bo por anda hopi mas mihó ku strès.

Pa mas informashon tokante drumimentu, wak riba:

  • Snelbeterinjevel.nl: entrenamentu ‘online’ pa traha riba keho di drumimentu, preokupashon òf strès.

5. Laga lòs loke bo no tin influensia riba dje

Ta bon pa bo sa ku sinti bo mes insigur ta parti di bida i purba anda ku esaki. Loke por yuda bo, ta di mira e krísis aki komo un reto pa bira mas fuerte. Pidi yudansa si bo ripará ku esei ta nesesario.

Pa mas informashon tokante laga lòs, wak riba:

6. Buska sosten ora bo tin sintimentu negativo

Papia ku un hende tokante bo situashon i bo sintimentunan. Esaki por ta un paso difísil i topa ku otro hende no ta asina fásil awor akí pa motibu di e vírùs di corona. Tòg kompartí bo emoshonnan ku otro hende ta yuda. Bishitá hendenan ‘online’ òf traha un sita ku un dunadó di ayudo òf dòkter di kas.

Moveshon

Biba salú ta tene bo resistensia na nivel. Bo no ta bira malu asina lihé i bo ta mihó protehá kontra bakteria i vírùs ku ta hasi bo malu, manera e vírùs di corona. I si bo bira malu tòg, mayoria biaha bo ta rekuperá mas rápido. Moveshon ta bon pa bo salú. 

Kon bo ta atendé ku esaki na un manera seif? Tira un bista riba e konsehonan aki bou tokante moveshon den tempu di vírùs di corona (COVID-19).

Hinka moveshon den bo dia i hasi esaki na un manera seif. Esaki ta mas fásil ku bo ta kere.

Konseho pa adulto i hende grandi

Konseho pa sufisiente moveshon pa adulto i hende grandi:

1. Move 2 ora i mei pa siman moderadamente intensivo

Move moderadamente intensivo di manera ku bo ta hala rosea mas rápido, pero bo por papia ainda si. Por ehèmpel kana 20 minüt pa dia, kana ku bo kachó òf bai kore baiskel. Durante ku bo ta traha den kurá òf ku bo ta hasi trabou di kas tambe bo ta move.

Pa mas informashon tokante moveshon, wak riba:

2. Dos biaha pa siman hasi aktividat ku ta hasi bo múskulo- i wesunan mas fuerte

Tur adulto por hasi nan múskulo- i wesunan mas fuerte na kas mediante por ehèmpel ehersisio ku peso, subi i baha trapi, bula kabuya, balia i ‘nordic walking’ (kana ku garoti). E programa na televishon hulandes ‘Nederland in Beweging’ ta laga bo mira bon ehersisio pa adulto i hende grandi.

Pa mas informashon tokante aktividat ku ta hasi bo múskulo- i wesunan mas fuerte, wak riba:

  • YouTube.com: vídeo ku ehersisio pa hasi múskulo i wesu mas fuerte di Allesoversport.nl
  • Maxvandaag.nl: vários kapítulo di e programa di televishon hulandes ‘Nederland in Beweging’

3. Keda riba pia pa bo no kai

Hasi 7 ehersisio chikitu durante bo aktividatnan diario na kas pa keda ‘riba pia’.

Pa mas informashon tokante prevenshon di kaimentu, wak riba:

  • YouTube.com: vídeo ku tep pa moveshon pa hende grandi di ‘VeiligheidNL’
  • Veiligheid.nl: download e foyeto ‘Hup in de benen’ ku tep útil pa keda den moveshon
  • Allesoversport.nl: poster di moveshon ku ehersisio pa hasi na kas

Konseho pa mucha i hóben

Konseho pa sufisiente moveshon pa mucha i hóben (4 te 18 aña):

1. Move durante 1 ora pa dia moderadamente intensivo

Laga nos muchanan move di manera ku nan ta hala rosea mas rápido mediante por ehèmpel hunga pafó den kurá, kana òf kore baiskel. Move pafó ta algu salú pa nos muchanan. Move pafó ta algu salú pa nos muchanan òf stimulá nan pa partisipá atrobe na deporte den tim.

Pa mas informashon tokante moveshon pa mucha i hóben, wak riba:

2. Tres biaha pa siman hasi aktividat ku ta hasi bo múskulo- i wesunan mas fuerte

Hasi múskulo- i wesunan di nos muchanan mas fuerte mediante por ehèmpel balia, bula riba trampolin, bula kabuya i deporte di bala (manera futbòl).

Pa mas informashon tokante move na kas, wak riba:

3. Evitá leshon pa motibu di kaimentu

Evitá aksidente pa medio di hasi palabrashon ku e muchanan tokante hungamentu pafó. Sea ku ta trata di un trampolin, un baiskel di mucha, sapatu ku wil òf ‘skate’ (i uso di protektor pa rudia, èlebog i pòls ora di kore ‘skate’). Hopi aksidente i leshon ta tuma lugá den i rònt di kas. Awor ku nos ta na kas, ta bon pa duna èkstra atenshon na esaki.

Pa mas informashon tokante hunga pafó na un manera seif, wak riba:

Alimentashon

Biba salú ta tene bo resistensia na nivel. Bo no ta bira malu asina lihé i bo ta mihó protehá kontra bakteria i vírùs ku ta hasi bo malu, manera e vírùs di corona. I si bo bira malu tòg, mayoria biaha bo ta rekuperá mas rápido. P’esei ta importante pa (sigui) kome salú. Tira un bista riba e konsehonan aki bou tokante alimentashon salú.

Kome segun e ‘Schijf van Vijf’ (Disko di Sinku) i keda mas salú posibel.

Konseho pa na kas

Konseho pa alimentashon salú pa mucha, hóben, adulto i hende grandi:

1. Aportá na un bon salú pa medio di kome salú

Kome variá for di tur e vaknan di e Disko di Sinku. I kambia pasaboka ku no ta saludabel pa algu mas salú. Pa medio di kome salú bo ta sostené bo resistensia, bo ta redusí e riesgo pa malesa i bo peso ta keda mihó den ekilibrio.

Pa mas informashon tokante kome salú, wak riba:

  • Voedingscentrum.nl: ta mas fásil pa perseverá ku pasonan chikitu, p’esei traha un ‘Eetwissel’, un sistema pa adaptá bo kustumber di kome.

2. Skohe momentunan fiho pa kome pa strukturá bo dia

Te ainda hopi hende ta traha na kas. Ta importante pa tin un ritmo fiho. Pa medio di tin tempu i atenshon pa momentunan fiho di kome, i no kome mas ku bo ta kustumbrá, bo ta tene bo peso mas mihó den ekilibrio.

Pa mas informashon tokante momentunan fiho pa kome, wak riba:

3. Pone kuminda salú manera fruta i bèrdura kaminda bo por mira nan i pone mangel i pasaboka ku no ta saludabel kaminda bo no por mira nan

Kuminda ku bo ta mira òf ku ta bo dilanti bo ta kue kome mas fásil. P’esei bo mester pone kuminda salú kaminda bo por mir’é i kuminda ku no ta salú kaminda bo no por mir’é. Tambe t’asina ku si bo mester hasi mas molèster pa kue algu di kome, bo ta kom’é ménos fásil. Ward’é por ehèmpel den un kashi.

Pa mas informashon tokante pasaboka salú, wak riba:

Alkohòl, humamentu i droga

E vírùs di corona (COVID-19) por sòru pa angustia, tenshon i vèrdrit. Pa e motibu aki tin un riesgo pa oumento di uso di alkohòl, tabaku i droga. E konsehonan aki bou ta yuda ku limitashon di uso di e supstansianan aki.

Limitá uso di alkohol, droga i tabaku. Na e momentunan aki e riesgo ta grandi ku bo ta bai usa nan mas tantu biaha i mas hopi.

Konseho pa na kas

Konseho pa limitashon di uso di e supstansianan aki serka hóben, adulto (hóben) i hende grandi:

1. Limitá humamentu òf purba stòp ku humamentu

Realisá ku hende ku ta huma en general ta kore mas riesgo riba infekshon di nan sistema respiratorio ku hende ku no ta huma. En general hende ku ta huma ta mas sensibel pa e vírùs di corona.

Pa mas informashon tokante humamentu, wak riba:

  • Rokeninfo.nl: yudansa pa ora di limitá òf stòp ku humamentu

2. Purba pa den e tempu aki bebe ménos alkohòl òf keda sin bebe

Realisá ku alkohòl no ta yuda kontra strès di corona. Aunke por parse ku un glas di alkohòl riba término kòrtiku ta redusí strès un ratu, riba término largu uso di alkohòl ta sòru pa un oumento di strès i sintimentu di angustia. Muchu hopi alkohòl por tin komo konsekuensia tambe ku bo no ta kumpli bon mas ku e reglanan di komportashon manera 1,5 meter di distansia.

Pa mas informashon tokante alkohòl, wak riba:

  • Alcoholinfo.nl: yudansa pa ora di limitá òf stòp ku bebementu di alkohòl

3. Hasi uso di e yudansa ku bo por haña

Hasi uso di dunadónan di ayudo, manera dòkter di kas, si bo mester di ayudo pa limitá òf stòp ku alkohòl, humamentu òf droga. Nan ta para kla pa yuda bo. Òf hasi uso di yudansa ‘online’.

Pa mas informashon tokante yudansa pa limitá òf stòp ku bebementu di alkohòl, humamentu òf uso di droga, wak riba:

  • Alcoholinfo.nl: yudansa pa ora di limitá òf stòp ku bebementu di alkohòl
  • Rokeninfo.nl: yudansa pa ora di limitá òf stòp ku humamentu
  • Drugsinfo.nl: yudansa pa ora di limitá òf stòp ku uso di droga

Interakshon sosial

Debí na e vírùs di corona (COVID-19) pa motibu di e 1,5 meter di distansia i trahamentu na kas te ainda nos tin kontakto sosial ku otro na un otro manera. No opstante e echo ku nos por tin ménos kontakto físiko ku otro, interakshon sosial ta keda importante. Tira un bista riba e konsehonan aki bou pa stimulá interakshon sosial durante tempu di corona. 

Yuda otro durante e tempu aki i tene pasenshi ku otro. Nos tin mester di otro pa por perseverá.

Konseho pa na kas

Awor ku e vírùs ta mas bou di kontròl, ta posibel atrobe pa bai bishitá nos hende grandinan. Tin algun hende grandi ku ainda no por risibí bishita, por ehèmpel si nan tin keho di fèrkout òf pasobra nan ta kontagiá ku COVID-19. E tepnan aki bou ta yuda pa keda den kontakto ku e hende grandinan aki:

1. Purba yuda otro hende

Kòmbersá un ratu ku un hende grandi pa medio di ‘video call’ òf hasi un bishita na 1,5 meter di distansia. Puntra nan kon ta bai i si nan mester di yudansa. Kòrda riba bo mayornan, pero puntra un tanta òf tio, besiña òf un otro hende tambe. Yuda otro hende no solamente tin un efekto positivo riba esun ku ta haña e yudansa ei, pero tambe riba abo komo persona ku ta yuda.

Pa mas informashon tokante soledat, wak riba:

2. Hasi loke bo mes por hasi i mester hasi konforme e medidanan

Duna bo aporte na un bon ambiente na kas. Komuniká na un manera kariñoso i humorístiko si bo ta biba huntu ku mas hende den un kas.

Pa mas informashon tokante un bon ambiente na kas, wak riba:

  • Pharos.nl: keda kas i edukashon den tempu di vírùs di corona 
  • Nji.nl: tep pa famia den tempu di vírùs di corona 

3. Paga tinu tambe riba loke bo yunan ta hasi ‘online’

Papia ku bo yu(nan) tokante kon nan por tin kontakto ‘online’ na un manera seif, manera protehá nan propio límite òf pasa over di límite di otronan. Enamoramentu, tentamentu den ‘app’ di grupo, kuriosidat pa loke ta trata sèks; tur ta sigui nòrmalmente, pero awor aki prinsipalmente ‘online’.

Pa mas informashon tokante komportashon ‘online’, wak riba:

  • Seksuelevorming.nl: tep pa kontakto ‘online’ na un manera seif durante tempu di vírùs di corona

4. Tira bista riba otro

Tira bista riba otro. Pa motibu di e vírùs di corona ainda tin algun hende ta obligatoriamente na kas. Por tin kestion di strès pasobra hendenan tin miedu di bira malu òf di pèrdè nan trabou. Pa e motibu aki tenshon por oumentá den kas, ku violensia komo konsekuensia tin ora.

Pa mas informashon tokante kontakto ‘online’, wak riba:

  • Nji.nl: tep pa famia den tempu di vírùs di corona 
  • Veiligthuis.nl: sentro di konseho i denunsia pa violensia doméstiko i maltrato di mucha 
  • Arboportaal.nl: tene kontakto ‘online’ ku koleganan i otro tepnan pa trahamentu na kas 
  • YouTube.com: vídeo di Sentro pa Violensia Seksual (Centrum Seksueel Geweld) tokante kiko mester hasi ora un hende konta ku nan a abusá seksualmente di dje

5. Sea kariñoso pa otro, na kas i den supermarket

Yuda otro pa mantené e 1,5 meter di distansia i perseverá den esaki. Niun hende no por yuda ku kosnan ta bai asina, nos tur ta den e mesun situashon. Huntu nos ta hasi lo mihó di e situashon aki. Sea kreativo tambe den e tempu aki.

Pa mas informashon tokante ser kariñoso, wak riba:

  • YouTube.com: vídeo tokante perseveransia den krísis di corona di RIVM, Instituto di Reino pa Salú Públiko i Medio Ambiente – Rijksinstituut voor Volksgezondheid en Milieu
  • Thebestsocial.media: ‘challenge’ di arte kreativo pa hasi sintamentu na kas mas soportabel 

Seksualidat

Debí na e vírùs di corona (COVID-19) tin hopi pregunta tokante sèks tambe: kiko si por i na kiko bo tin ku duna èkstra atenshon? Tira un bista riba e konsehonan aki bou tokante seksualidat den tempu di corona.

Anda konsientemente ku kontakto físiko i seksual.

Konseho pa na kas

Konseho rònt di seksualidat pa adulto (hóben) i hende grandi:

1. Debí na e regla di 1,5 meter bo por tin sèks solamente ku bo partner fiho

Sèks ku bo partner fiho por, si boso tur dos ke esei. Ya boso ta hopi serka di otro kaba i ta práktikamente imposibel pa desviá otro físikamente. No hasi sèks ku bo partner si e ta isolá pa motibu di (supuestamente) un infekshon ku e vírùs di corona.

Pa mas informashon tokante sèks i e vírùs di corona, wak riba:

  • Soaaids.nl: pregunta i kontesta tokante e vírùs di corona, sèks i malesanan transmití seksualmente (soa)
  • Rutgers.nl: konseho tokante sèks den tempu di corona

2. Bo no tin un partner fiho? Hasi bon palabrashon i limitá e riesgo pa e vírùs di corona

Ta lógiko ku si bo ta soltero tambe bo ke tin kontakto físiko. Ta ékstra importante si pa bo tene e riesgo pa e vírùs di corona mas chikitu posibel den kaso di intimidat i sèks. Palabrá huntu kon bo ta hasi esei di e mihó manera. Tene bo mes na e reglanan relashoná ku e vírùs di corona.

Pa mas informashon tokante sèks i e vírùs di corona, wak riba:

  • Soaaids.nl: pregunta i kontesta tokante e vírùs di corona, sèks i malesanan transmití seksualmente (soa) 
  • Rutgers.nl: konseho tokante sèks den tempu di corona

3. Semper bo por tuma kontakto ku bo dòkter di kas tokante malesanan transmití seksualmente (soa), antikonsepshon, embaraso indeseá òf violensia seksual

Hóbennan i adultonan hóben entre 12 i 25 aña por wak riba www.sense.info ora ku nan tin pregunta tokante seksualidat, antikonsepshon, malesanan transmití seksualmente (soa) òf embaraso. Temporalmente tin ménos ora di konsulta di Sense pa hóbennan i den sierto regionnan no tin e oranan di konsulta aki. Na e liña di ‘chat’ i informashon tambe tin ménos hende ta traha. Semper bo por tuma kontakto ku bo dókter di kas.

Pa mas informashon tokante sèks, wak riba:

4. E píldora di antikonsepshon ta ménos konfiabel ora bo tin sakamentu òf habrimentu di barika

Ta bon pa bo sa ku e píldora di antikonsepshon ta ménos konfiabel ora bo tin sakamentu òf habrimentu di barika. E ora ei ta konsehabel pa guli e píldora un biaha mas atrobe òf konsultá ku bo dòkter di kas. Bo ke bai usa antikonsepshon òf kambia di antikonsepshon? Si bo no por bai bo dòkter di kas, bo por traha tambe un sita pa un konsulta telefóniko di antikonsepshon.

Pa mas informashon tokante e píldora di antikonsepshon, wak riba: