Manera hopi di boso sa kaba, nos ta sigui e desaroyonan aktual den nos region minusiosamente i kontinuamente. Na Boneiru for di e komienso nos ta tene kontakto intensivo ku nos partnernan di kadena, e servisionan ousiliar i otro instansianan relevante, tantu lokalmente komo den Reino.

Na e momentu akí tin hopi informe ta sirkulá via medionan sosial i otro kanalnan. Pa e motibu akí nos ta haña importante pa awe duna un imágen kla, basá riba echo i konfiabel di e situashon, di manera ku tur hende na nos isla sa kiko ta pasando i kiko nan por verwagt.

E situashon ta rekerí pa ta alerta, pero no pa surgi intrankilidat. Boneiru ta prepará, e provishonnan básiko ta na òrdu i nos ta keda vigilá e desaroyonan paso pa paso, ku interes di nos komunidat na promé lugá.

Yamada pa trankilidat

Mi ta hasi un yamada enfátiko na nos pueblo pa keda trankil. Nos ta monitoreando e situashon kontinuamente i na e momentu akí no tin motibu pa pániko. No ta nesesario pa ‘hamster’, esta kumpra kantidat grandi di artíkulo den supermarket. Si temporalmente e rèkinan ta mas bashí, esei tin di haber ku e dianan di fiesta. E suministro ta na òrdu i nan ta bai yena e rèkinan.

Nabegashon lokal – konseho di siguridat

Konforme konseho di Ministerio di Asuntunan di Eksterior i Ministerio di Infrastruktura i Maneho di Awa, komo medida di prekoushon i na interes di siguridat, pa nabegashon lokal e konseho urgente ta na vigor pa evitá e awanan teritorial di Venezuela.

Suministro di kombustibel

Pa loke ta trata suministro di kombustibel mi por duna klaridat: tin sufisiente kombustibel den stòk pa e próksimo dos simannan. Banda di esaki nan a konfirmá ku hopi promé ku e dos simannan akí pasa ta yena kombustibel aserka, di manera ku kontinuidat ta keda salbaguardiá.

Aviashon i espasio aéreo

Kontrario na informenan anterior, espasio aéreo di Kòrsou no ta será.

Pa medio di un NOTAM a sali un atvertensia den direkshon di kompanianan di aviashon merikano (FAA), pero no un prohibishon. Esaki ta nifiká ku kompanianan di aviashon, a base di nan propio konsiderashonnan di siguridat, ta disidí si nan ta ehekutá sierto buelonan òf si eventualmente nan ta anulá esakinan. Na e momentu akí te ainda buelo entre e islanan ta tumanda lugá.

Ta konsehá personanan ku a keda afektá debí na anulashon di nan buelo, pa tuma kontakto ku e kompania di aviashon en kestion i ku nan seguro di biahe.

Provishonnan di kuido i provishonnan médiko – business as usual (nada no ta kambia):

Pa e dianan binidero pa dunamentu di kuido e situashon ta keda manera kustumber:

• Air Ambulance ta sigui bula entre e islanan ABC
• Tin sufisiente kapasidat den hòspital
• E botikanan ta disponé di sufisiente remedi den stòk
• E dunamentu di kuido ta kontinuá manera kustumber