Hopi ménos hospitalisashon pa motibu di ómikròn kompará ku dèlta

Home » Hopi ménos hospitalisashon pa motibu di ómikròn kompará ku dèlta

Kralendijk – E kantidat di hospitalisashon pa motibu di e variante ómikròn ta hopi mas abou kompará ku e hospitalisashonnan pa motibu di e variante dèlta. Asina e departamento di Salubridat Públiko ta laga sa despues di investigashon. Huntu ku Aruba, Kòrsou, Sint Maarten i RIVM, e departamento a hasi investigashon di hospitalisashon na e islanan akí i Boneiru. Ta bai pa e periodo di 27 di desèmber 2021 te ku 23 di yanüari 2022. Resientemente a anunsiá resultadonan.

Salubridat Públiko ta kontentu ku resultado di e investigashon. Ta nifiká ku hasta ora e kantidat di kontagio ku e variante ómikròn oumentá, e chèns ta chikitu ku ta sobrekargá hòspital. For di e investigashon ta resultá tambe ku hendenan di riba 60 aña tabatin mas chèns pa hospitalisashon.

Serka hendenan riba 60 aña ku un kontagio di ómikròn, e chèns pa hospitalisashon tabata 11% pa hendenan no bakuná i 3% porshento pa hendenan bakuná. Serka hendenan riba 60 aña ku un kontagio di dèlta, e chèns pa hospitalisashon tabata 32% pa hendenan no bakuná i 7% pa hendenan bakuná. E departamento ta enfatisá ku ta importante pa tene kuenta ku hende grandi i hendenan ku un salú vulnerabel.

Hendenan mas yòn ku 60 aña tabatin ménos ku 1% chèns pa hospitalisashon den kaso di kontagio ku e variante di ómikròn. E investigashon a mustra tambe ku di e hendenan ku a pasa e angua di buster, tiki hende ta resultá den hòspital den kaso di kontagio.

Bo tin keho? Keda kas i yama 0800 0800 e ora ei i laga nan tèst bo gratuitamente. Bo por hasi un tèst propio tambe na kas. Si e tèst propio ta positivo, pa siguridat bo mester hasi un tèst di PCR den e kaya di tèst di Salubridat Públiko. E ora ei bo tin sigur si bo ta kontagiá.

Bo no a pasa e anguanan di corona òf e angua di buster ainda? Na mart bo por pasa e angua di corona òf e angua di buster tur djasabra sin sita di 09:00 -14:00 na Kompleho Deportivo Jorge Nicolaas.

Leave a Comment