Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

A sera bar pasobra trahadónan no ta tene nan mes na karentena

Kralendijk – Riba òrdu di inspektornan di Direktorado di Supervishon i Mantenshon, a sera un bar den Centrumgebied den anochi di 7 di yanüari 2022. Durante un kontròl ku e departamento di Salubridat Públiko a pidi, a resultá ku trahadónan di e bar ku mester tabata den karentena, tabata trahando. E trahadónan mester tabata den karentena komo ku djabièrnè último un kolega di nan tabata kontagiá.

W departamento di Salubridat Públiko tabatin indikashon ku e trahadónan ku mester tabata den karentena, tòg lo a bai trabou. Esaki lo a enserá un riesgo grandi ku e vírùs di corono lo plama. Pa e motibu ei, Departamento di Salubridat a pidi Direktorado di Supervishon i Mantenshon pa tene un kontròl na e bar.

Durante e kontròl, inspektornan di Supervishon i Mantenshon a mustra gerensia di e bar ku mester sera e negoshi. A bisa gerensia tambe kua ta e konsekuensianan si no sera e bar. Gerensia di e bar a skohe e ora ei pa sera e negoshi.

Anteriormente tambe mester a sera e bar. Na prinsipio di 2021 tabatin un fuente grandi di kontagio na e bar akí. Den e promé fin di siman di 2022, pa siguridat Gezaghèber Edison Rijna a sera e bar ku bista riba órden públiko i siguridat.

Awor ku e kantidat di kontagio ku e variante ómikròn ta oumentá rápidamente na Boneiru, ta hopi importante ku hendenan ku mester ta den isolashon òf den karentena, realmente ta tene nan mes na esaki. Ta importante tambe ku tur sektor di komunidat ta tene nan mes na e medidanan nobo ku ta na vigor for di 4 di yanüari 2022. Direktorado di Supervishon i Mantenshon tin un ròl importante den esaki.

Salubridat Públiko ta pidi yudansa di Supervishon i Mantenshon si tin indikashon ku establesimentu i siudadano no ta tene nan mes na e karentena òf isolashon imponé.  Inspektornan di Supervishon i Mantenshon ta tene un kontròl e ora ei. Si ta nesesario, e inspektornan ta intervení.

Via e numbernan 715 5300 i 796 4850, siudadanonan por notifiká Supervishon i Mantenshon ku siudadano òf negoshi no ta tene nan mes na regla òf medida.  Pa un bista di medida, mira: www.bonairecrisis.com

Leave a Comment