Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Mas kontagio na skol den promé mitar di novèmber

Kralendijk – Na Boneiru den e promé mitar di novèmber 2021 mas kontagio a tuma lugá na skol atrobe, asina departamento di Salubridat Públiko a duna di konosé. Den e promé siman a registrá 85 kaso di kontagio i den e di dos siman 106.

E oumento mas grandi den e kantidat di kontagio a bini debí na plamamentu bou di mucha di 4-11 aña na skol. Fuente di e kontagionan tabata na skol, na akohida pa mucha i tambe na kas. Serka un di kada tres kontagio e fuente no ta konosí. Den e promé mitar di novèmber tabatin dos klùster, esta grupo di kontagio na skol básiko. Na akohida pa mucha tabatin un (1) klùster.

Di e personanan kontagiá mas òf ménos mitar no tabata bakuná, durante e último dos simannan di òktober tambe esei tabata asina. Di e grupo di enfoke di hende di 18 aña bai ariba 74,8% ta kompletamente bakuná, 84,6% a pasa nan promé angua. Den e grupo di 12 pa 18 aña 51,2% ta kompletamente bakuná i 59,7% a pasa nan promé angua.

Leave a Comment