Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Spich di Gezaghèber Edison Rijna riba 20 di òktober 2021

Kralendijk – Bon tardi tur hende,

Na e momentonan akí nos tin ainda hopi kaso di COVID-19 na Boneiru. Awe nos tin 107 kaso aktivo i tin 6 hende na hòspital pa motibu di COVID-19 i unu na Kòrsou awor. E kantidat di kaso ta stabil pero muchu haltu.

Den e delaster simannan mayoria di hende a pega ku e vírus na skol, akohida pa mucha, na kas òf na trabou. E delaster 7 simannan tabatin 13 grupo di kontagio, esta cluster na skol i na akohida pa mucha. Ta trata mucha ku ta mas yòn ku 12 aña. Por lo general mucha no ta bira masha malu ora nan pega ku e vírùs. Nan por pega otro mucha òf adulto, òf e grandinan rònt di nan sí i esei a sosodé.

Danki na entre otro e kantidat di hende ful bakuná nos no tin nodi di tuma medida mas pisá na e momento akí. Den e grupo di persona di  18 aña bai ariba, 73,3 porshento ta ful bakuná. Den e grupo di  hóben entre 12 te 18 aña, 45,1 porshento ta ful bakuná.

E porsentahenan akí no ta basta haltu ainda pa logra ku e vírus ta  stòp di plama, komo ku e variante  di dèlta ku nos tin awor,  ta masha kontagioso. E bakuna ta protehá hende pa nan no haña keho serio si nan pega ku e vírùs. Un persona ku no ta bakuná,  tin 20 biaha mas chèns ku e mester bai hospital ora e pega ku e vírùs kompará ku un hende ful bakuná.

Asina ku kasonan di COVID-19 oumentá, hende den komunidat  ta puntra ki dia ta bini ku medida mas severo. Nos ta den un fase awor aki kaminda nos ke tuma medida dirigí riba e lugánan kaminda hende ta kore mas tantu riesgo. Asina nos no tin nodi di tuma medida mas pisá ku ta afektá henter komunidat.  Nos ta konsiderando pa prolongá e medidanan aktual di nivel di riesgo 2 te despues di promé di novèmber. I si mester nos lo tuma medida mas severo.

Salubridat Públiko ta hibando aktualmente kombersashon ku skolnan pa wak ki medida èkstra por tuma pa evitá ku e vírùs por sigui plama fásilmente na skol.

Tabatin algun cluster di kontagio na boka di trabou tambe. P’esei mi ta hasi un yamada serio na tur dunadó di trabou pa wak si e ambiente na trabou sufisientemente saludabel. Pa nan paga tinu si por ehèmpel na trabou ta laga aire fresku pasa regularmente i si e trahadónan por tene distansia di 1,5 mei di otro.

Mi ke hasi un otro yamada tambe na tur dunadó di trabou. Nos sa ku tin hende ku bon mirá mester ta den karentena pero ta bai  traha tòg pasobra si nan no traha nan no ta kobra. Mi ke rekordá nan ku dunadónan di trabou por haña kompensashon di ministerio di SZW pa trahadó ku mester ta den karentena. Di e forma ei trahadónan por sigui kobra siendo ku nan ta den karentena.

Hasi uso di e areglo akí i manda e trahadónan kas ora Salubridat Públiko konsehá ku nan mester bai den karentena.  Mi ke kòrda tur dunadó di trabou tambe ku ta Salubridat Públiko ta stipulá ki ora un hende ku ta den isolashon a rekuperá.

Boneiru a bira mientrastantu un pais di riesgo hopi haltu pa e islanan ruman. Pa e motibu akí por ehèmpel e gastunan pa tèst pa bai Kòrsou i bini bèk a subi,  te bira mas karu ku e pasashi mes.

Nos sa ku hopi hende ta biaha pa bishitá famia na Kòrsou por ehèmpel. P’esei mi ta  deliberando ku e otro islanan ruman pa wak si por adaptá e kondishonnan di biahe pa biahero ful bakuná for di Boneiru i asina baha nan gastunan di tèst.

Den futuro serkano ta bai pidi un prueba di bakunashon, esta un QR code, òf un prueba ku un hende a tèst negativo pa por drenta na sierto eventonan. Nos ta hasi esaki pasobra pokopoko nos ke bolbe bèk na un bida normal sin ku nos ta kore riesgo grandi di kontagio.

E plan ta pa Boneiru haña e mesun areglo ku tin na Hulanda. Esta ku personanan no bakuná por tèst grátis pa bai un evento. Awor aki nos ta den deliberashon ku ministerio di VWS pa logra esaki.

Den hóreka nos ta mira ku tin lugá kaminda hopi hende ta balia pafó. Esei ta un riesgo grandi pa tur esnan presente. Ku e qrcode òf e tèst grátis pa hende no bakuná, nos por sòru pa tene e eventonan akí na un manera mas seif. Nos ta trahando duru pa pronto por introdusí e qr code òf prueba di resultado negativo di tèst pa por drenta na evento grandi.

Asina nos tin tur kos reglá ku ministerio di VWS nos ta informá komunidat. Entrante djaluna 25 di òktober lo tin mas kapasidat na e callcenter 0800 0900  pa pidi e qr code.

Na esnan ku no a bakuná ainda mi ke pidi pa por fabor tene distansia di 1,5 meter i evitá di ta den grupo grandi di hende. I mi ta konsehá nan pa bai bakuná. Si bo a haña corona kaba, bo tin mester di solamente un bakunashon pa bo ta kompletamente bakuná i protehá. Mi ke rekordá hende ku no ta bakuná i partikularmente esnan ku tin malesa serio, pa tene kuenta ku nan ta kore mas riesgo pa pega ku e vírùs i bira hopi malu. I mi ta konsehá nan pa bai bakuná,

Di tur e hendenan na Boneiru ku a drenta hòspital for di sèptèmber último, 75 porshento no tabata bakuná. Nos ta mira e mesun porsentahe na paisnan manera Hulanda.

Mi ta konfia ku nos tur ta sigui asumí nos responsabilidat komo bon siudadano. Ku nos ta tene distansia i tene nos mes na e reglanan eksistente. I ku nos ta sigui kuida i yuda otro pa tene Boneiru seif.

Leave a Comment