Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Deklarashon di dòkter Loes Jaspers di Salubridat Públiko relashoná ku insidente ku pasamentu di angua

Kralendijk – Djasabra último tabatin un insidente ku pasamentu di angua na sentro di deporte Jorge Nicolaas. Departamento di Salubridat Públiko ta lamentá esaki hopi. Un hóben tabata na e sentro di deporte pa pasa su di dos angua di corona. E pasadó di angua a usa un angua ku un ratu promé a usa ku un otro hóben. Afortunadamente e pasadó di angua a deskubrí esaki mesora. Na momentu ku a deskubrí esaki, ya a hinka e angua un tiki kaba den brasa di e hóben.

Mesora despues ku e pasadó di angua a deskubrí e fout, a informá hefenan di e tim di pasa angua. Salubridat Públiko a stipulá regla kiko mester pasa den un kaso asina.  Ta usa mesun tipo di reglanan na Hulanda i internashonalmente.  Kompletamente segun e reglanan ei, mesun dia a hiba e dos hóbennan Fundashon Mariadal pa un tèst di sanger.

Djaluna último mama di e hóben a entregá un keho na departamento di Salubridat Públiko. E departamento ta atendé e keho akí.

Na mes momentu e departamento di Salubridat Públiko ke enfatisá ku e departamento semper ta tuma medida di prekoushon ku bista riba seguridat di hendenan ku ta pasa angua. Lamentablemente por pasa ku tin biaha algu ta bai robes pa motibu di fayo humano. Kasi nunka esaki no ta pasa i den kaso ku e pasa nos ta lamentá esaki hopi.

Pa e departamento di Salubridat Públiko kuido despues di e insidente di e hendenan enbolbí tabata hopi importante. Pa e motibu ei, mesora nos a bai kòmbersá ku e mama. Komunidat por konta ku Salubridat Públiko despues di e insidente akí lo ta mas severo i alerta. E departamento ta hasi tur loke ta nesesario pa evitá e tipo di situashonnan akí den futuro.

Leave a Comment