Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Spich di Gezaghèber Edison Rijna riba 24 di yüni 2021

Kralendijk – Kerido pueblo,

Awe mi ta enfoká riba kambio den medidanan ku ta na vigor mañan djabièrnè 25 di yüni te ku 22 di yüli 2021. Mi ta para ketu tambe na e kambionan den e kondishonnan pa biaha pa Boneiru, ku ta drenta na vigor na kuminsamentu di yüli 2021.

Laga mi kuminsá ku e medidanan. E sifranan di hende ku a pega ku e vírùs di COVID-19 ta mustra bon. De bes en kuando tin un brote chikitu, partikularmente bou di hóben òf bou di adulto ku no a bakuná. Te ainda e sifranan ta stabil i nan ta keda abou. Loke ta importante ta, ku tin masha tiki hende ku ta gravemente malu i ku no tin hende na hospital pa motibu di Covid-19. Pa e motibu akí nos ta suavisá e medidanan i por pasa di nivel di riesgo dos pa nivel di riesgo unu. Naturalmente nos ta sigui monitoriá e situashon pa wak si ta nesesario pa adaptá e medidanan.

Tin dos regla ku ta keda na vigor ainda. Establesimentunan di hóreka mester sera 00:00 di anochi i no ta permití pa balia den espasio paden. E reglanan aki ta keda na vigor komo ku nos a ripará ku na e lugánan akí e riesgo pa hende pega ku e vírùs ta mas grandi.

Mi ta bai papia awor di e kambionan den kondishonnan pa biaha pa Boneiru. Ta bai hasi mas distinshon entre pasahero ku ta ful bakuná i esnan ku no ta bakuná. Por lo general hende ku no ta bakuná mester hasi mas tèst ku personanan ku sí ta bakuná.

Ta bai distinguí tambe diferente nivel di riesgo pa paisnan.  E kantidat di kaso di COVID-19 a baha asina tantu na Merka i Hulanda, ku probablemente lo konsiderá e paisnan akí pronto komo pais di riesgo abou. Esaki ta nifiká ku entrante kuminsamentu di yüli awor pasaheronan ful bakuná di e paisnan akí no mester di tèst pa nan biaha pa Boneiru. Pasaheronan no bakuná di Merka i Hulanda mester hasi tèst sí ainda.

Ta eliminá karentena obligatorio pa paisnan di riesgo haltu. Na yegada pasaheronan di e paisnan akí no tin nodi di bai den karentena mas. Nan mester tèst sí promé ku nan bula i ta pidi nan tambe pa tèst e di sinku dia despues di yegada.

Pa habitante di Boneiru ku no ta bakuná  i ku ke biaha pa Aruba òf Kòrsou  lo bai tin mas posibilidat. Si un habitante no bakuná biaha pa Kòrsou por ehèmpel i el a tèst na Boneiru, e persona akí por regresá nos isla denter di 72 ora sin ku e mester bolbe laga nan tèst e.  E kambionan akí ta drenta kuminsamentu di yüli na vigor, nos no sa ainda riba ki dia, esaki ta dependé di desishon ku mester tuma ainda na Den Haag. Nos ta informá boso mas pronto ku ta posibel.

Te ku awe ainda ta asina ku mucha di 13  bai ariba mester a pasa tèst ora di biaha pa Boneiru. Ta bini un kambio den e edat stipulá. For di kuminsamentu di yüli 2021 mucha di 12 aña bai ariba mester tèst pa biaha pa Boneiru. Esaki ta pasobra tabatin kambio den regla hulandes i regla  oropeo.

Mi ke bisa tambe ku nos ta preparando pa konektá dato di hende bakuná na Boneiru na e Sertifikado Digital di Corona, e asina yamá Digitale Corona Certificaat, DCC di Hulanda. Nos ta spera ku pronto nos por informá bo mas di esaki. Por lo pronto habitante di Boneiru por usa e karchi di bakunashon original ora di biaha komo prueba ku e persona ta bakuná.

Pronto bo por haña mas informashon tokante e paisnan di riesgo i e kondishonnan pa biaha pa Boneiru riba nos website www.bonairecrisis.com.

Leave a Comment