Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Kompartí e página aki

A habri registrashon pa bakunashon na callcenter i wèpsait

Personal den kuido i hendenan riba 60 aña na bùrt

Kralendijk – For di djaluna 22 di febrüari personal den kuido i hendenan riba 60 aña por traha un sita telefónikamente òf online pa bakuná.  E number grátis 0800 0800 di e callcenter di Salubridat Públiko ta alkansabel di djaluna te ku djasabra di 08:00 – 20:00 i djadumingu di 10:00 – 16:00. Riba www.bonairecrisis.com ta posibel pa traha un sita 24 ora pa dia. Si por, Salubridat Públiko ta preferá ku hendenan ta registrá online.

Boneiru a haña e bakuna di Pfizer. Pa e bakuna aki funshoná bon, mester di dos angua. Ora ta registrá telefónikamente i online, esnan ku ta hasi esaki mester kontestá pregunta tokante nan salú. Ta posibel ku ta manda nan nan dòkter di kas promé pa mira si nan por haña e bakuna. E ora ei numá ta planea e sita pa bakunashon despues ku e persona a bai dòkter di kas. Esei por via 0800 – 0800.

Si hendenan no mester bai dòkter di kas promé, nan ta haña dos sita, unu pa e promé i e otro pa e di dos angua. E tempu entre e promé i e di dos angua ta minimalmente tres siman. Despues di e registrashon telefóniko i online ta konfirmá e dos sitanan via imeil. Hendenan ku nan mes no tin imeil, por duna un adrès di imeil di un miembro di famia òf konosí.

Riba e wèpsait www.bonairecrisis.com hende or klek riba e kònòpi ‘registrashon bakunashon Covid’ pa traha un sita. Online nan mester yena un chekeo di salú. Despues ta trata e petishon. Dentro di dos dia di trabou ta meil e sitanan pa e dos anguanan.

No ta posibel pa ora registrá duna un preferensia pa un fecha òf ora. Sí por indiká e sitio deseá. Den e meil pa konfirmá e sitanan, tin e lugá i ora di bakunashon. Riba e dia di e sita mester bai ku un prueba di identidat bálido (reibeweis,  pasaporte òf sédula).

Despues di e promé angua tur hende ta haña un tarheta di bakunashon ku nòmber di e bakuna, e number di ‘batch’ i e fecha ku a pasa e angua. Ta pasa e informashon tambe pa dòkter di kas si un hende a duna pèrmit pa esei den e chekeo di salú. E bakunanan di corona ta skars i karu. Si pa motibu di sirkunstansianan hendenan no por bai nan sita, nan mester tuma kontakto mesora ku e callcenter 0800-0800.

Djaluna 22 di febrüari e bakunashon ta kuminsá pa personal den kuido na e sitio di prek Fundashon Mariadal. Djaluna promé di mart hendenan riba 60 aña ta na bùrt.  Por planea nan bakunashon riba djaluna, djamars, djaweps i djabièrnè di 8.30 – 16.30 na Kompleho Deportivo Jorge Nicolaas na Kaya Amsterdam. Riba djárason e tim di bakunashon ta na e sitio di prek Fundashon Cocari na Rincon.

Leave a Comment