Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Kompartí e página aki

Entidat Públiko Boneiru preparando pa bakunashon kontra corona

Kralendijk – Entidat Públiko Boneiru na luna di febrüari ta spera di kuminsá ku e programa di bakunashon pa kombatí e vírùs di corona. Asina ku e planifikashon ta konosí, ta informá pueblo ki dia presis i na unda ta kuminsá ku bakunashon i ken ta bini promé na remarke pa esaki. Al final kada adulto na Boneiru por laga bakuná su mes. Pa esaki ta traha huntu ku dòkternan di kas i hòspital Fundashon Mariadal.

Si hendenan laga bakuná nan mes, e chèns pa un brote di e vírùs di corona ta bira kada biaha mas chikitu. Ámpliamente a tèst e diferente bakunanan ku ta bini disponibel i a keda komprobá ku nan ta seif. Den vários pais ya kaba habitantenan a tuma e bakunashon boluntariamente. Na Boneiru tambe e bakunashon ta tuma lugá den un forma boluntario.

Transporte i almasenamentu di e bakunanan mester tuma lugá kuidadosamente. E aparatonan pa esei ta yega Boneiru den kurso di yanüari. Na fin di yanüari ta bin tambe un tim di eksperto di Instituto di Reino pa Salubridat Públiko i Medio Ambiente (RIVM) pa guia i kontrolá tur kos. Departamento di Salubridat Públiko a hasi palabrashon ku RIVM i Ministerio di Salubridat Públiko, Bienestar i Deporte (VWS) kon esaki por tuma lugá na e mihó manera. Banda di esei Departamento di Komunikashon i Protokòl a prepará un kampaña di informashon, di manera ku tur hende ta bon na altura di tur kos rònt di e programa di bakunashon.

E bakuna kontra e vírùs di corona, di kua e promé stòk for di luna di febrüari ta bira disponibel na Boneiru, mester trese un fin na e krísis ku ya pa mas ku un aña tin mundu den su gara. Di e forma aki nos ta spera di kontinuá ku nos bida normal un poko atrobe, sin tin miedu di keda kontagiá ku e vírùs. Mas tantu hende ku laga bakuná nan mes, mas rápido e vírùs por disparsé for di nos bida diario.

Leave a Comment