Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Spich di dr. Marian Luinstra-Passchier riba 2 di yanüari

Kralendijk – Mas hende a tèst e último dianan ku den e simannan ku ta tras di lomba. Nos a haña mas resultado positivo di e tèstnan. Na departamento di Salubridat Públiko nos ta hasiendo nos bèst pa haña bon bista di e kasonan. Hopi hende a keda kana ku keho i no a bin tèst. Awor ta sali na kla ku nan a pega ku e vírùs. Tabatin hende ku a pensa ku e vírùs di corona no ta na nos isla. P’esei nan no a bin tèst.

E siman akí so 46 persona a tèst positivo. Por mira kon e delaster simannan a bai den e plachi.

Pa investigá e fuente i kontakto ta tuma hopi tempu i trabou. Nos kier evitá ku e vírùs ta sigui plama. P’esei nos ta yama e personanan ku un hende ku a pega ku e vírùs tabatin kontakto kuné i pone nan den karentena. Si nos yama bo pa bo bai den karentena, hasi esaki. E ta importante pa protehá e personanan rònt di bo. P’esei ta importante pa yama asina bo tin keho. Mas lihé nos sa ku bo a pega ku e vírùs, mas mihó esei ta. Asina ei abo ta evitá ku bo ta kontagiá otro.

Ken e personanan ku a tèst positivo ta? Nos sa ku nan ta habitante di Bonaire. Den e cluster di personanan ku a pega ku e vírùs tin algun grupo grandi i algun chikitu, pues grupo di kontagio. Plachi 2. E koló hel ta indiká ku un persona ta parti di e grupo akí pero e ta den investigashon. Serka e delaster seis personanan nos no ta mira un konekshon ku otro grupo ainda.

Den e gruponan akí ta trata di famia, amigu i kolega. Nos ta mira ku den misa i iglesia tambe tin persona ku a pega ku e vírùs. Tin un cluster, un grupo nobo ku a surgi for di un fiesta i e grupo akí por bin krese ainda. Nos no por mira esei ainda riba e plachi. Nos no sa di tur hende unda e fuente ta. Ta sigui investigá esei ainda.

E vírùs di corona ta aktivo na Boneiru. Naturalmente el a bini di afó. Pero aworakí e ta bou di nos. Nos ta mira ku mas hende ta pega ku e vírùs. E vírùs por plama, pasó hopi hende no ta tene nan mes na instrukshon di higiena, òf no ta wòri mes ku nan. Tin hende ku no tin kunes mes. E sifranan ta mustra resultado di esaki. Nos no por hasi manera e vírùs no tei na Boneiru. E tempu di no wòri a pasa.

Si bo tin keho ku por tin di aber ku Covid-19, no kana rònt kuné. Keda kas i yama 0800-0800 pa traha un sita pa tèst.

 

Leave a Comment