Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

SPICH DI GEZAGHEBBER EDISON RIJNA RIBA 13 DI NOVÈMBER

Kralendijk – Kerido pueblo,

Awor ku e kantidat di kaso di hende ku a pega ku e vírùs di COVID-19 ta kedando abou, nos por sigui suavisá e reglanan manera menshoná den e ordenansa di emergensia aktual, di fase 3, menasante, pa fase 2, preokupante. Tin algun kambio ku a tuma lugá kaba, manera e regla ku establesimentu di hóreka i kasino por sera mas lat. Otro kambio ku a tuma lugá ta e kambio di kódigo oraño pa kódigo hel.

Promé ku mi menshoná e otro kambionan, mi ke bisa lo siguiente. E siman akí  a bini un kaso di un persona ku a pega ku e vírùs aserka. Ta bon pa nos tene kuenta ku awor ku mas hende por bini Boneiru, nos lo por haña mas tantu biaha kaso di COVID-19. Nos no mester kere ni spera, ku nos por mantené e situashon kaminda tin sero kaso di hende ku a pega ku e vírùs. Esei no ta realista.

Nos mester kustumá ku loke ta importante ta  pa nos tin e vírùs dominá. Nos no mester lubidá ku nos ta bon prepará. Nos a demostrá ku nos por esei kaba. Nos lo tin temporada ku algun òf basta kaso di COVID-19 na Boneiru i otro temporada kaminda nos no tin niun kaso.

Nos komo pueblo mester kustumá pa adaptá, esun biaha na situashon kaminda tin regla estrikto, i adaptá otro biaha na regla mas suave. Di nos parti lo sòru pa e kambionan no ta drástiko i ekstremo. Di otro banda mi ta konta ku boso koperashon, pa boso mantené boso na e reglanan i medidanan.

Awor mi kier pasa pa menshoná e kambionan ku ta bai tin. E kambionan akí ta reglá den un ordenansa di emergensia nobo ku ta drenta na vigor 16 di novèmber awor i ta vense promé di desèmber di e aña akí.

Ta permití pa 25 hende ta presente na un enkuentro den seno privá, ke men na kas, den un espasio públiko òf na laman. Por tene evento organisá si tin pèrmit pa esei, basta  usa maksimal 50% di  kapasidat di e lugá i tin pa mas tantu 50 hende presente. Mester registrá  ken ta presente na e evento. No ta permití pa kanta òf balia durante e evento.

Na entre otro kasino, sauna i establesimentu di hóreka tur bishitante mester registrá promé ku drenta i nan mester kontestá algun pregunta tokante nan salú. Den establesimentu di hóreka tur hende mester ta sintá na lugá fiho. Establesimentu di hóreka por sera 12or di anochi. Kasino tin mag di habri for di seis or di atardi, i sera dos or di mardugá. Di diesdos or di anochi te dos or di mardugá no tin mag di sirbi bebida alkohóliko den kasino.

Por  tene misa òf sirbishi tanten ku tur hende ta sinta 1,5 meter di otro, ta permití pa kanta tambe. Pa e baidónan di misa tin e mesun registrashon i chekeo di salú,  ku tin tambe entre otro na establesimentunan di hóreka.

Na e momentu akí por tene enkuentronan deportivo pero sin públiko. Na eventonan deportivo den sala mester registrá ken ta presente na e evento i tur hende mester kontestá algun pregunta tokante nan salú promé ku e enkuentro. Na eventonan deportivo den aire liber esaki no ta nesesario. Nos ta ketu bai den kombersashon ku organisashonnan di deporte pa wak si tin un manera responsabel pa públiko por ta presente tòg na enkuentro deportivo den futuro serkano.

Ta posibel atrobe pa traha na ofisina mes, promé tabata konsehá pa traha preferiblemente for di kas. Dunadónan di trabou mester sòru pa kumpli sí ku e reglanan i  medidanan ku departamento di Salubridat Públiko a fiha. Por ehèmpel nan mester laga airu pasa dos biaha pa dia den e lugá di trabou.

Pa siman lo tin un máksimo di 7 buelo di Hulanda ku KLM i kuater buelo di TUI. Henter siman lo tin tur dia seis buelo di Kòrsou pa Boneiru. Tur pasahero ku bini Boneiru, sea ta ku avion, avion privá  òf boto,  mester  laga hasi un PCR tèst pa mas tardá 72  promé ku nan sali  pa nos isla. I nan mester yena tambe e deklarashon di salú di Salubridat Públiko promé ku nan sali pa Boneiru. Mester yena e deklarashon di salú via wèpsait www.bonairepublichealth.org

Pasaheronan for di Saba i Statia no tin mester di hasi e PCR -tèst, nan mester yena e deklarashon di salú sí di departamento di Salubridat Públiko promé ku salida. Te promé di desèmber awor no ta permití buelo dirèkt for di Merka pa Boneiru. Nos ta spera ku entrante promé di desèmber por tin buelo dirèkt for di Merka atrobe.

Por último mi ke pidi boso algu. Mi por imaginá mi mes ku nos tur ta trahando plan kaba i preparando pa selebrá e dianan di fiesta huntu ku nos famia i amistatnan. Laga nos tur para ketu kon nos por hasi esei teniendo kuenta ku e reglanan eksistente. No laga nos lubidá òf neglishá e reglanan básiko den dianan di fiesta. Nos niun no ke pa ora aña bòltu nos haña un brote nobo. Mi ta spera ku nos tur por pasa dushi dianan di fiesta i habri aña salú.

Leave a Comment