Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

KAMBIO SELEBRASHON FIN DI AÑA RELASHONÁ COVID 19

No ta permití aktividat públiko, regla adaptá pa tiramentu vürwèrk

Kralendijk – Gezaghèber Edison Rijna di Entidat Públiko Boneiru ta anunsiá ku debí na situashon di COVID-19 e aña akí tin kambio den aktividat ku ta permití den e periodo di 20 di desèmber 2020 te ku 17 di yanüari 2021. Gezaghèber ke enfatisá ku no por premirá for di awor kon situashon di COVID-19 lo ta na desèmber di e aña akí i yanüari 2021. Esaki ta nifiká ku mester tene kuenta ku  e regla nan di COVID-19 ku ta bálido  na e momentu ei. Esaki por nifiká ku bo no por usa un pèrmit ku bo a haña debí na e situashon di COVID-19 ku lo por surgi na e momentu ei.

Aktividat públiko i muzik

E aña akí no ta permití pa  organisá aktividat pa dibertí públiko ,aktividat ku ta aksesibel pa públiko òf tokamentu di muzik manera gaita, barí/tambú i aguinaldo.

Grupo di muzik ku ke presentá via livestreaming, mester entregá  un notifikashon por lo ménos 5 dia adelantá na ofisina di Gabinete di Gezaghebber na Plaza Reina Wilhelmina 1. Por manda un notifikashon tambe via  mail na kabinet.gezaghebber@bonairegov.com.

Tira vürwèrk

Tin regla adishonal pa empresario ku ke ke tira vürwèrk.  Empresario ku ke tira vürwèrk riba òf kantu di kaminda públiko por hasi esaki solamente den seno privá.

Ke men solamente huntu ku trahadónan, no mag tin públiko presente.

Gezaghèber ta partisipá ku mester entregá petishon pa pèrmit òf notifikashon den kuadro di Ordenansa General di Polis (APK) pa aktividat den periodo di 20 di desèmber 2020 te ku 17 di yanüari 2021 pa mas tardá 27 di novèmber 2020.

Bende vürwèrk                                                                      

Empresa i otro hende ku ke bende i tira vürwèrk riba òf kantu di kaminda públiko mester tin un pèrmit (di benta) pa hasi esaki. Nan mester  entregá un  petishon pa mas tardá 27 di novèmber 2020 na Departamento di Asuntunan Hurídiko i General (JAZ) na Bulevar J.A. Abraham 27.

Banda di e petishon pa e pèrmit (di benta) aki,  konforme artíkulo 3 di e ‘Vuurwerkbesluit Bonaire’ nan mester notifiká Kolegio Ehekutivo di tur aktividat relashoná ku bendementu, wardamentu i transporte di vürwèrk. Relashoná ku gastunan di limpiesa, e hende ku ta hasi e petishon mester tuma kontakto adelantá ku Selibon NV (717-8159). Huntu ku e petishon mester entregá e prueba ku a paga e gastunan di limpiesa òf un suma di bòrg.

Intenshon di e areglo akí  ta pa haña un bista adelantá di e kantidat di aktividat ku ta bai organisá durante e periodo di 20 di desèmber 2020 te ku 17 di yanüari 2021 relashoná ku mantenshon di órden públiko, trankilidat i siguridat.

Formulario pa  pèrmit

Pa hasi petishon pa pèrmit mester hasi uso di un formulario ku bo por haña na   Departamento di Asuntunan Hurídiko i General (JAZ) situá na Bulevar J.A. Abraham 27 (ántes ofisina di duana). Personanan ku a entregá un petishon promé ku 27 di novèmber 2020  pa un pèrmit di APK  mester buska e pèrmit aki pa mas tardá dia 18 di desèmber 2020 na Departamento di Asuntunan Hurídiko i General (JAZ) na Bulevar J.A. Abraham 27. SI bo no tin pèrmit , bo ta violando lei. . Den kaso di violashon ta tuma medidanan atministrativo òf penal kontra esun ku a violá lei.

Despues di 27 di novèmber 2020 no por tuma ningun petishon pa pèrmit òf notifikashon pa aktividat den periodo di 20 di desèmber 2020 te ku 17 di yanüari 2021 . Gezaghebber ta pidi pa tur hende tuma nota di e término menshoná akí i tuma esaki na konsiderashon. Por haña mas informashon na Departamento di Asuntunan Hurídiko i General (JAZ), telefòn 717 5330, ekstenshon 5321 òf ekstenshon 2271.

Leave a Comment