Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Gezaghèber Rijna: Kódigo hel benefisioso pa ekonomia lokal

Kralendijk – Gezaghèber Edison Rijna ta kontentu ku Hulanda a honra su petishon pa Boneiru pasa di un isla ku kódigo oraño pa kódigo hel. .,,E kambio di kódigo ta nifiká un alivio i un speransa pa nos ekonomia. Nos mester tene kuenta sí ku ta dura un tempu promé ku nos ripará e efekto positivo, ”asina Gezaghèber a deklará.

,,Den kombersashon ku sektor hotelero i empresarial nan a splika nos esei.  Loke ta pasa ta ku pasahero ku ke bini Boneiru mester plania nan biahe promé. Nan mester buk, buska lugá pa keda. Tur esaki ta tuma su tempu.Manera mi a bisa siman pasá nos ta sigui wak chèns pa amplia e kantidat di buelo i e kantidat di pais ku por ehekutá buelo pa Boneiru. Asina ku ta bisto kiko por,  lo mi informá komunidat di esei.”

Kódigo hel ta enserá ku pasahero tin mag di biaha i bin Boneiru. Nan mester ta alerta sí pa e riesgonan ku nan lo por kore. 72 ora promé ku nan sali di Hulanda nan mester hasi un PCR tèst. Resultado di esaki mester ta negativo. 48 ora promé ku nan sali di Hulanda nan mester yena e deklarashon di salú di Salubridat Públiko.

Den su rueda di prensa di djamars último promé minister Mark Rutte a anunsiá ku abitante di Hulanda tin mag di biaha pa e islanan den Karibe. Te na e momento ei kódigo oraño tabata konta ainda pa Boneiru. Awe djárason, kódigo hel a drenta ofisialmente na vigor pa e isla.

Boneiru ta i tabata bon prepará pa e kambio di kódigo oraño pa kódigo hel.  Tur sektor ku ta atendé ku turista  a tuma medida.  ,,Ora nos laga mas pasahero bini Boneiru, esei ta nifiká tambe ku nos por haña nos mes ku algun kaso di hende ku a pega ku e vírùs. Pero esei no ta problema. Algun tempu pasá nos a haña tres kaso di Covid-19 serka hende ku a bini Boneiru for di Hulanda. Salubridat Públiko a drenta mesora den akshon i a evitá asina ku e vírùs  a plama,” asina Gezaghèber a bisa.

Leave a Comment