.

Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Kompartí e página aki

Spich di gezaghebber Edison Rijna riba 15 di òktober

Kralendijk – Kerido ko-suidadanonan di Boneiru,

Manera ya konosi, ayera nos a risibí e notisia tristu ku Dr. Hermelijn a fayese den hòspital na Kòrsou debí na komplikashon nan di covid-19. Esaki ta di tres siudadano boneriano ku lamentablemente nos ta pèrdè pa motibu di covid. For di aki mi kier a deseá famianan, sernan kerí i pashèntnan di Dr. Hermelijn hopi forsa pa karga ku e pèrdida aki.

Den e ultimo siman ku a pasa nos por mira un bahada signifikante den e kantidat di kontagio nan aki na Boneiru. Nos ta kontentu ku e sifranan ta sigui abou pero ei mes nos ta kouteloso. Pa e motibu aki awe ainda mi no por anunsia na boso ku nos ta suavisa, aun mas, e medidanan aktual. Manera mi a bisa nos ta kontentu mira ku den e último siman e kontagio a baha hopi.  Pero e kantidat di tèst tambe a baha hopi. Tèst  ta nesesario pa nos tin un idea klá na unda e vírùs ta i mas importante, si ahinda e ta plamando. P’esei mi yamada insistente:  si bo tin keho, bai tèst!

Koutelosamente optimista ku e sifranan ta sigui faborabel, nos a inisiá ku un par di proseso. Ta trata di proseso pa entre otro biahamanetu, i reapertura di gym i casino. Tokante di esakinan mi kier a informa boso un poko mas.

Si e sifranan keda abou i stabil, próksimo djárason mi ta indiká kua medidanan lo keda apliká pa tráfiko aereo.

Aktualmente nos ta preparando pa establesé kondishonnan mas flèksibel pa entrada di bishitante di islanan rondo di nos. Nos prioridat aki ta Kòrsou. Esaki ta rekerí un konsiderashon kuidadoso. Kual sea e sirkunstansia bou di kua nos ta relahá pa Kòrsou, lo apliká medidanan adishonal.  Djárason awor lo mi bisa bai mas en detaye riba e tema akí.

Boneiru na e momentunan aki ahinda tin kódigo oraño pa pasaheronan for di Hulanda Oropeo. Si e sifranan sigui baha, nos ta haña ku ta hustífiká  pa nos manda un petishon pa bai bèk na kódigo hel. Mi ta spera di por hasi esaki den siman binidero. E petishon lo bai  pa Ministerio di Relashonnan Eksterior i einan e ta keda evaluá. Komo ku nos tin un kontakto estrecho ku e ministerio aki, nos ta spera ku Boneiru por haña aprobashon pa bai bèk na kódigo hel den 1 pa 2 dia despues ku nos a manda e petishon. Nos ta keda ku antenshon pa seguridat di nos isla, spesialmente awor ku e kantidat di kontagio na Hulanda ta haltu. Djárason awor lo mi komuniká kua lo ta e kondishonnan pa por drenta Boneiru for di Hulanda.

Mi sa ku ta importante tambe pa sektor turístiko sa ki dia buelonan for di entre otro Merka i otro destinashon nan ta bon biní atrobe na Boneiru. Akinan tambe nos konhuntamente ku e sektor turistiko ta wak i evaluá bou di kua kondishon por hisa e prohibishon nan aki.

Pa loke ta trata gym i kasino, e siman akí nos tabatin kòmbersashon ku representantenan di e sitio nan aki. Tur a traha un plan pa por habri di un forma sigurá. Nos ta spera ku gym i kasinonan por habri atrobe den transkurso di otro siman.

Mi ta kontentu ku poko poko pero sigur nos por ofrese mas perspektiva na nos residentenan i empresarionan. Laga nos traha huntu pa mantene e sifranan abou. Huntu corona smart!

Leave a Comment