Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Spich di dr. Marian Luinstra-Passchier riba 30 di sèptèmber

Kralendijk – Bon tardi tur hende,

 

Na Boneiru nos a keda largu ku e situashon ku no tabatin infekshonnan di e vírùs corona. Fin di ougùstùs esaki a yega su final ora nos a haña algun infekshon separá. Den e di dos siman di sèptèmber e kantidat aki a oumentá. Komo ku den e wikènt di 19 di sèptèmber a resultá ku den un periodo korto hopi resultado positivo a drenta, nos a implementá e medidanan riba 21 di sèptèmber.

 

E siman tras di lomba nos a traha duru na e departementu di Salubridat Públiko pa analisá infekshonnan ku a tuma lugá entre 11 (diesun) i 19 (diesnuebe) di sèptèmber, ekstensivamente dor di hasi entre otro investigashon di fuente i kontakto. Mi ke wak bèk ku boso riba e desaroyonan den e periodo aki i kon e vírùs a plama den e siman ku a pasa.

For di 11 di sèptèmber nos a hasi mas ku 1000 (mil) tèst na e departamentu di Salubridat Públiko, di kua 87 (ochentishete) tabatin un resultado positivo. A hospitalisá un total di 7 (shete) persona i 1 (un) persona a fayesé. Afortunadamente entre tantu tin hende ta rekuperá tambe.

 

A trasladá un di e personanan ku tabata hospitalisá, pa CMC na Kòrsou. Fundashon Mariadal a pone personal, aparato i remedi èkstra na disposishon i por brinda kuido intensivo na pashèntnan di COVID-19. Tòg ta wak kontinuamente serka kada pashènt ku covid-19, unda e por haña mihó kuido na e momentu ei. Tin biaha traslado ta deseá, por ehèmpel pasobra e pashènt ta rekerí un sierto spesialismo médiko òf tratamentu médiko, ku akinan no ta optenibel riba e nivel di ICU. Den un kaso asina por trasladá e pashènt pa un hòspital, ku nos ta traha kuné,  na Kòrsou òf Aruba.

 

Te ku 19 di sèptèmber tabatin solamente un kantidat chikitu di infekshon nobo pa dia. Riba 19 di sèptèmber e spantu a bin na momentu ku 16 hende tabatin resultado positivo riba 1 dia. Dor di esaki Boneiru a drenta den un situashon total nobo. Esaki a nifiká ‘alle hens aan dek’ pa alkansá tur e hendenan ei, pone nan den isolashon i pa start e investigashon di fuente i kontakto. Na mes momentu nos a kuminsá reuní ku vários partido pa konsehá Gezaghèber tokante kiko e kantidat grandi di infekshon aki lo a nifiká pa Boneiru. For di esaki e medidanan di 21 di sèptèmber a resultá i nos análisis di e simannan ku a pasa, tabata e base pa e konseho na Gezaghèber tokante e medidanan nobo.

 

Promé, mi ta bai duna informashon tokante infekshonnan entre 11 i 27 di sèptèmber.

 

A base di e promé informashon, te ku siman pasá, por mira ku mayoria di e personanan ku resultado positivo ta den e grupo di edat di trahadó. Por mira esaki den e grafik aki. Banda di esei nos por mira ku na e momentunan aki hendenan grandi ta keda infektá ménos na Boneiru. Esaki ta faborabel, paso nan ta e grupo vulnerabel ora ta trata di COVID-19. Tambe nos por mira ku den e periodo ei 6 mucha entre 10 i 19 aña a keda infektá.

Pa por komprondé kon e vírùs ta plama na Boneiru i unda e riesgonan di kontagio ta, ta importante pa chèk bon serka kada persona infektá unda nan a keda infektá. Di e 6 muchanan entre 10 i 19 aña nos sa ku e infekshon a tuma lugá den situashon na kas òf di famia. Partikularmente ta importante pa sa pues ku esaki no a sosodé na skol, esaki nos ta monitor minusiosamente pa kontinuamente kontrolá si en bèrdat skol ta keda un sitio seif.

 

Nos no sa di tur pashènt na unda nan a keda infektá. Ademas den sierto kaso no a finalisá e investigashon di fuente ainda, dor di kua ta keda komplementá e informashon kontinuamente. Di mayoria hende si nos sa esaki kaba. Den e siguiente grafik por mira ku e mayoria infekshonnan a tuma lugá den situashon di trabou: mayoria biaha esaki ta na ofisinanan unda no a tene e 1,5 meter di distansia, òf durante pousa di almuerso i kontakto informal na komienso òf fin di e dia di trabou. Banda di esei enkuentronan privá ta un fuente importante di infekshon, dor ku aki tambe hopi biaha no ta tene e 1,5 meter di distansia. Ku hendenan ta keda infektá na kas tambe, no ta ònferwagt. Na kas ta kompliká pa tene distansia for di otro. Esei tin nos atenshon.

 

Bo ta mira masha tiki òf niun infekshon den hóreka, profeshon di kontakto, kuido i skol. E infekshon ku a tuma lugá na skol tabata di dosente pa dosente, no pa alumnonan. P’esei e infekshon aki ta kai bou di e título ‘trabou’ den e grafik aki, pero por sierto e situashon aki tin nos atenshon.

 

A base di nos investigashon di fuente i kontakto, na e momentunan aki nos por identifiká un desena di klùster. Un klùster ta un grupo di persona infektá ku ta konektá ku otro. Esaki por kuminsá den situashon di trabou i despues sigui plama den situashon privá di algun di e personanan infektá. Asina un infekshon ta krese di 1 persona bai 2 i ta sigui bai te ora un kren rondó di dje ta infektá. Manera por mira por redusí mayoria di e infekshonnan bèk na 2 klùster grandi. Mayoria di e otro klùsternan ta infekshonnan den famia.

Dor di isolashon rápido di e persona infektá nos por frena kresementu di e klùsternan aki. Ora un persona ta infektá, pero ta den isolashon, e no por infektá niun otro hende. Dor di esaki nos ta restringí plamamentu mas aleu i e kantidat di infekshon nobo lo baha.

 

Rekapitulando, nos tabatin 87 infekshon nobo den e periodo di 11 te ku 27 di sèptèmber, di kua mayoria persona ta entre 40 i 60 aña di edat. Na skol, den hóreka i profeshon di kontakto a topa ku tiki òf niun infekshon. Mayoria biaha e fuente hustamente ta na trabou, na kas òf durante enkuentronan privá.  A formulá e konseho na Gezaghèber tokante  kua medidanan ta nesesario, a base di e análisis aki.

 

–           P’esei atrobe mi ke enfatisá ku ta importante, pa ora esaki ta posibel, traha for di kas. Si tòg bo mester bai trabou: mantené distansia. Un meter i mei ta mas o ménos largura di 2 brasa di un adulto.

–           I si bo traha afsprak ku bo amigunan òf famia, ounke bo konosé otro asina bon: mantené distansia for di otro.

–           Asina aki ta un meter i mei!

 

Mi ke pone èkstra énfasis un ratu riba e preokupashon ku ta reina bou di mayor i dosentenan na skol. Nos ta komprondé ku bo ta spanta ora bo tende ku un mucha na bo skol tin resultado positivo. No tin hopi mucha ku resultado positivo, pero tin si. Nan tur a keda infektá den situashon di kas òf privá i no na skol. E muchanan tur tin síntoma di malesa, leve. Nan ta na kas. Serka kada alumno nos ta hasi investigashon di fuente i kontakto ekstensivo. Si ta nesesario, e departamentu di Salubridat Públiko ta tuma kontakto ku nan mihó amigunan ku ken nan tin hopi kontakto. Si ta nesesario, nan ta bai den karentena, maske e chèns di infekshon pa nan tambe ta chikitu. Esaki ta pa protehá otro muchanan, pa asina keda seif pa skol. Nos ta pone hopi atenshon na esaki.

 

Mucha ta ménos suseptibel pa e vírùs aki, i si nan keda infektá, hopi biaha nan no ta bira malu òf nan ta haña síntoma hopi leve. Si mucha tin e vírùs, nan ta konsiderablemente ménos kontagioso pa adultonan. Dor di esaki e riesgo di infekshon na skol, ta konsiderablemente mas abou ku por ehèmpel na trabou. Por mira esaki bek den e klùsternan ku nos a mustra boso.

 

E vírùs a aparesé rònt mundu, i for di e luna aki na Boneiru tambe. Ta ferwagt ku e vírùs lo keda entre nos pa largu tempu. Pero ta keda na nos pa biba ku otro di manera ku nos ta mantené e vírùs chikitu, pa kòrta su paso di un manera ku tòg nos por sigui ku nos bida. Esaki por dor di mantené nos mes na e medidanan: mantené sufisiente distansia, tosa den bo èlebog, laba bo mannan regularmente. I si bo tin keho: keda kas i yama e departamentu di Salubridat Públiko na 0800 0800 pa hasi un tèst.

Leave a Comment