Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Spich di dr. Marian Luinstra-Passchier riba 19 di sèptèmber

Lunanan largu nos tabatin e suerte na Boneiru dor ku nos no tabatin kasonan aktivo di Corona riba nos isla. Pero fin di ougùstùs nos tabatin un par di  kaso aktivo ku a pone un final na esaki.

Siman pasá dòkter Hermelijn a tèst positivo pa e vírus di corona. E i su pashèntnan a spanta di esaki. Pa departamento di salubridat Públiko esaki ta e promé kaso ku tabatin komo konsekuensia un altera apsoluto di nos banda. A enbolbí hopi hende pa krea un bista kla di tur kontakto ku tabatin den e kaso aki.

Hopi lihé a sali na kla ku tabatin vários kaso positivo mas. For di investigashon a sali na kla ku e kasonan positivo por keda repartí den kuater (4) kluster.

E klùsternan aki ta  bai bek den esfera di trabou i kontakto informal pafó di trabou. Ku otro palabra ta trata aki di kontagio lokal i no importá.  Na momentunan aki aparte di e kuater klùsternan tin mas kaso individual. Serka esakinan ainda no por konkluí ku nan ta konektá na e klùsternan eksistente.

Pa e motibu aki a disidí di tuma medidanan adishonal.

Importante pa komunidat sa ku un gran parti di e personanan ku a tèst positivo tin síntoma basta leve. Na e momentunan aki tin 2 persona interná den hospital. Fundashon Mariadal tin ainda sufisiente kapasidat pa tuma mas pashènt den hospital.

Ta hasiendo hopi tèst. Pa duna un bista nos a bai di entre dies pa binti tèst pa dia pa entre kuarenta pa sesenta tèst pa dia. Tambe nos a hasi un adaptashon chikitu den nos maneho di tèst.

For di awe hendenan ku ta biba den kas ku hendenan ku tèst positivo tambe ta bai tèst nan, asta si nan no tin síntoma. Otro hendenan nos ta tèst solamente si nan tin síntoma.

Nos ta wardando riba resultado di vários tèst i no por hasi niun pronóstiko promé ku tempu. Ta dura mas o ménos dos dia promé ku nos tin resultado. Esak i ta nifiká ku semper tin un retraso. Ku e rapides ku e kantidat di kasonan positivo ta subi ta sumamente importante pa klùsternan eksistente keda isolá pa asina e klùsternan aki keda eliminá.

Mi ke pidi tur hende pa ta alerta i pa tene nan mes estriktamente na e reglanan di distansia sosial pasobra esaki ainda ta e manera mas efisiente pa evitá ku e vírus ta sigui plama.

Tene distansia, laba no man, keda kas si bo tin keho i traha sita pa bo hasi tèst.

Skolnan pa awor ta keda habrí. E motibu di esaki ta ku investigashon te awor ta indiká ku muchanan no ta transmití e vírus di Covid-19 lihé di un pa otro i si nan tin e vírùs, masha poko nan ta bira malu. Te ku awor a resultá ku tin masha poko kaso di infekshon na skol. Esaki ta sufisiente motibu pa tene skolnan habrí pa awor aki. Esaki ta na bienestar di nos muchanan tambe.

Leave a Comment