Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Supervishon i Mantenshon lo kontrolá severo si ta kumpli ku medidanan di corona

E situashon nobo rònt di COVID-19 ta obligá nos tur pa ta alerta pa evitá plamamentu di e vírùs di corona. Durante e dianan binidero inspektornan di Direktorado di Supervishon i Mantenshon di Lei lo informá hóreka i komèrsio por menor tokante e situashon nobo. Den e próksimo dianan nan ta bai aserká empresanan i duna nan informashon. E bishitanan aki ta pa konsientisá tur hende tokante importansia di kumplimentu ku e reglanan nobo.

E ordenansa di emergensia ta konta pa boto tambe. No ta permití fiesta i paseo riba boto sin e medidanan adekuá. Un máksimo di 25 wéspet por akudí na fiestanan privá. Inspektornan di Haf lo supervisá esaki.

Kaminda ta nesesario Supervishon i Mantenshon di Lei lo aktua. Den kaso ku tin hende ku no ta tene nan mes na e ordenansa di emergensia, e inspektornan lo duna instrukshon kon mester kumpli ku e reglanan. Si esaki no kondusí na kumplimentu, e ora ei esaki lo tin komo konsekuensia un prosèsverbal òf un sanshon ku ta inkluí un obligashon pa paga un montante si kontinuá ku e violashon (last onder dwangsom).