Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

Medida pa bini Boneiru ta drenta na vigor djasabra 5 di sèptèmber

E medidanan ku a anunsiá ku lo bai konta pa bini Boneiru for di Kòrsou lo drenta na vigor entrante djasabra awor 5 di sèptèmber.  A pone eksigensia pa biaha pa Boneiru for di Kòrsou awor ku e kantidat di kasonan di Covid-19 ta oumentando. Pa esaki Boneiru ta konsiderá Kòrsou un pais di riesgo haltu. 

Ya kaba tabata konsiderá Aruba i Sint Maarten komo pais di riesgo haltu i a suspendé e ‘air bubble’ ku e islanan aki tambe. Tur persona ku ta bini Boneiru for di Aruba, Sint Maarten òf Kòrsou mester di un pèrmit di gezaghèber Rijna i tin ku bai 14 dia den karentena.  Habitantenan di Boneiru ku kier regresá for di un di e islanan aki tambe mester di un pèrmit di gezaghèber pa bini bèk. Ta eksigí di tur persona ku ta bini Boneiru ku nan ta yena e deklarashon di salú promé nan bini.  E deklarashon di salú mester ser yená digital via www.publichealth.org. Personanan na Bonaire ku kier biaha bai den eksterior, no mester di pèrmit di Gezaghèber. E persona mester kumpli ku e regla di entrada di e pais na unda e ta bai biaha.