Bòn bini riba e krísis wèpsait di Entidat Públiko Boneiru. E wèpsait ta ‘online’ ora tin un crisis. Pa e motibu akí, awor bo por haña tur informashon tokante COVID-19 riba e wèpsait.

No por biaha liber mas entre Aruba i Boneiru

Boneiru ta suspendé for di 6 di ougùstùs 2020 e ‘air-bubble’ ku Aruba. E espasio aéreo ta keda habri, pero pasaheronan no por biaha liber mas di Aruba bini Boneiru. A tuma e desishon aki despues ku e kantidat di persona kontagiá ku COVID-19 a subi drástiko na Aruba.

Pa motibu di e tantísimo kasonan nobo di COVID-19 ta mira Aruba komo un pais di riesgo haltu. Manera indiká den e ordenansa di emergensia tur hende ku ta bini awor for di un pais ku riesgo haltu, manera Aruba, mester bai 14 dia den karentena na kas.

Ku a suspendé e ‘air-bubble’ ta nifiká ku a wanta e palabrashon tokante konekshon ku Aruba. Na momento ku e situashon na Aruba normalisá por sigui ku e palabrashon ku ya ta riba mesa.

Turista na Aruba
Tur ku tabata na Aruba despues di 23 di yüli tin ku vigilá nan salú. Si tin keho por tuma kontakto ku departamento di Salubridat Públiko. Outoridatnan na Aruba a apuntá algun kaminda ku tabatin kontaminashon. Ta trata di e sitionan Gusto Night Club, Lola/Craft Bar and Restaurant and Nightclub i Muscles and Lungs Gym.

Si tin hende na Boneiru ku durante nan estadia na Aruba tabata den un di e lugánan aki entre 23 di yüli i 3 di ougùstùs 2020, nan ta obligá na mèldu na departamento di Salubridat Públiko. Por yama number di telefòn 0800-0800.

Repatriashon
Residentenan di Boneiru ku ta na Aruba ainda, por regresá Boneiru ku un karta di dispensashon di gezaghèber. Na momento ku tin bista riba kuantu persona tin ku repatriá lo disidí kon trese nan Boneiru bèk. Na momento ku a habri espasio aéreo a bisa ku biahamentu ta tuma lugá riba propio riesgo. Lo no bini sosten finansiero pa esnan ku aworakí no por regresá. Residentenan di Aruba ku ta na Boneiru ta responsabel pa regla nan mes regreso pa Aruba.

Koredor Médiko
Pa esnan ku ta na Aruba òf tin ku bai ainda pa motibu médiko lo habri un koredor. Ta trata aki tantu pashènt di ZVK for di Boneiru i spesialista médiko. Lo transportá e personanan aki entre airopuerto i hospital. E chèns pa kontaminashon ta hopi chikitu e orei. Ta pidi pashèntnan di ZVK pa tuma kontakto ku ZVK pa haña informashon tokante nan biahe.

Kondishon di biahe
Ta konsehá tur Rubiano ku kier bini Boneiru i tur Boneriano ku kier bai Aruba pa posponé nan biahe. Pasaheronan ku pa un motibu òf otro tòg tin ku bini Boneiru, ta obligá pa yena e deklarashon di salú i tin ku bai 14 dia den karentena manera tin pará den e ordenansa di emergensia. Ku e formulario departamento di Salubridat Públiko ta haña informashon tokante salú di esnan ku ta bini Boneiru. Por haña e formulario na: https://bonairepublichealth.org/nl/form.